రెండేళ్ల క్రితం అక్టోబర్ 7న ఇజ్రాయిల్ లో మారణహోమం సృష్టించిన హమాస్ ఉగ్రవాద సంస్థ ఇజ్రాయెల్‌లోకి చొచ్చుకొచ్చి దాదాపు 1,219 మందిని విచక్షణారహితంగా కాల్చి చంపారు హమాస్ ఉగ్రవాదులు. 251 మందిని బందీలుగా తీసుకెళ్లిపోయారు. దీంతో ప్రతీకారంతో రగిలిపోయిన ఇజ్రాయెల్ హమాస్‌నూ భూస్థాపితం చేస్తామని ప్రతిజ్ఞ చేసి రెండేళ్లుగా హమాస్‌పై భీకర దాడులు చేస్తోంది. 

ఈ దెబ్బకు హమాస్ పెద్ద తలకాయలన్నీ లేచిపోయాయి. హమాస్ అంతం అవుతుందన్న క్రమంలో అమెరికా జోక్యంతో తాత్కాలిక కాల్పుల విరమణ ఒప్పందం కుదిరింది. ఈ నేపథ్యంలో ఓ షాకింగ్ విషయం వెలుగులోకి వచ్చింది. హమాస్ ఇంకా అంతం కాలేదని, పాకిస్తాన్‌ వేదికగా మళ్లీ పురుడుపోసుకుంటోందని ఓ నివేదిక వెల్లడించింది. పాకిస్తాన్ ఇప్పుడు హమాస్ ఆపరేటివ్స్‌కు కొత్త వేదికగా మారిందని అమెరికాకు చెందిన మిడిల్ ఈస్ట్ మీడియా రీసెర్చ్ ఇన్‌స్టిట్యూట్ (ఎంఈఎంఆర్ఐ) తన నివేదికలో పేర్కొంది.

గాజాలో హమాస్‌ను డీమిలిటరైజ్ చేయడంపై అంతర్జాతీయ సమాజం దృష్టి సారించిందని, కానీ ఆ ఉగ్రవాద సంస్థ తన పునరుజ్జీవనం కోసం పాకిస్తాన్‌నూ వేదికగా ఎలా అభివృద్ధి చేసుకుంటుందో విస్మరించలేమని తెలిపింది.  పాకిస్తాన్, పాక్ ఆక్రమిత కాశ్మీర్ హమాస్ భావజాలానికి స్వర్గధామంగా మారుతున్నాయనేవి కేవలం భయాలు, ఊహలు మాత్రమే కాదని వెల్లడించింది. కార్యరూపం దాల్చుతున్నట్లు తెలిపింది. 

ఇలా హమాస్‌కు కొత్త గ్రౌండ్‌గా మారడం వల్ల ఉగ్రవాదంపై పాకిస్థాన్ పోరాటన్ని ప్రశ్నార్థకం చేస్తుందని నివేదిక చెప్పింది. నాటోయేతర అమెరికా మిత్ర దేశంగా కూడా పాకిస్తాన్ భవిష్యత్తు ప్రశ్నార్థకం అవుతుందని తెలిపింది.