సీనియర్ నటుడు గిరిబాబు కన్నుమూత!

చిన్నతనం నుంచే నటనపై తీవ్రమైన ఆసక్తి ఉండటంతో, పాఠశాల రోజుల్లోనే అనేక నాటకాల్లో చురుగ్గా పాల్గొని తనలోని నటుడిని బయటకు తీశారు. సినిమాల్లో రాణించాలనే బలమైన కోరికతో ఆ రోజుల్లో మద్రాసు వెళ్లారు. ఆ తర్వాత 1973లో విడుదలైన ‘జగమే మాయ’ చిత్రంతో ఆయన వెండితెరకు పరిచయమయ్యారు. సుమారు ఐదు దశాబ్దాలకు పైగా సాగిన ఆయన సినీ ప్రయాణంలో ఏకంగా 600లకు పైగా సినిమాల్లో నటించి అరుదైన రికార్డు సృష్టించారు.

కెరీర్ ప్రారంభంలో కొన్ని చిత్రాల్లో హీరోగా నటించిన గిరిబాబు, ఆ తర్వాత ప్రతినాయకుడిగా (విలన్) అద్భుతమైన గుర్తింపు తెచ్చుకున్నారు. తనదైన హావభావాలతో, విలక్షణ సంభాషణలతో తెలుగు ప్రేక్షకులను ఎంతగానో అలరించారు. ఆ తర్వాత కాలంలో వైవిధ్యమైన హాస్య, కుటుంబ కథా చిత్రాల్లో విభిన్న పాత్రలు పోషించి మెప్పించారు. 

ఆయన కెరీర్‌లో ‘కురుక్షేత్రం’, ‘కరుణామయుడు’ వంటి ఎపిక్ చిత్రాలు ప్రత్యేక స్థానాన్ని సంపాదించుకున్నాయి. నటుడిగానే కాకుండా దర్శక, నిర్మాణ రంగాల్లోనూ తన అదృష్టాన్ని పరీక్షించుకున్న ఆయన, పలు చిత్రాలను నిర్మించి డైరెక్ట్ చేశారు. ‘సింహగర్జన’, ‘మెరుపుదాడి’, ‘ఇంద్రజిత్‌’, ‘రానారంగం’, ‘నీ సుఖమే నే కోరుతున్నా’ వంటి చిత్రాలతో నిర్మాణం, దర్శకత్వ రంగాల్లోనూ తనదైన ముద్ర వేశారు. 

కథలు, స్క్రీన్‌ప్లే రచనలోనూ ఆసక్తి చూపించారు. నటన, దర్శకత్వం, నిర్మాణం.. ఇలా సినీ రంగంలోని పలు విభాగాల్లో పనిచేసి తనకంటూ ప్రత్యేక గుర్తింపు సంపాదించుకున్నారు. ఇక ఆయన కుమారుడు రఘు బాబు కూడా టాలీవుడ్‌లో ప్రముఖ కమెడియన్‌గా, నటుడిగా రాణిస్తున్నారు.  వెండితెరపై హీరోగా, విలన్‌గా, తండ్రిగా ఎన్నో వైవిధ్యమైన పాత్రలతో ప్రజల గుండెల్లో నిలిచిపోయారు.