బాలల లైంగిక వేధింపుల కంటెంట్‌.. మెటాపై ఎఫ్‌ఐఆర్‌

కాగా, చిన్నారుల హక్కుల పరిరక్షణ కోసం పనిచేసే జాతీయ బాలల హక్కుల పరిరక్షణ కమిషన్‌ (ఎన్ సిపిసిఆర్) కూడా ఈ వ్యవహారాన్ని తీవ్రంగా పరిగణించింది. మెటా ప్లాట్‌ఫామ్‌లలో చిన్నారుల లైంగిక దోపిడీకి సంబంధించిన కంటెంట్‌ అందుబాటులో ఉండటంతో పాటు, అలాంటి అంశాలకు సంబంధించిన ప్రకటనలు ఎలా ప్రసారమయ్యాయనే విషయంపై వివరణ కోరుతూ జులై 3న మెటాకు నోటీసులు జారీ చేసింది. 

చిన్నారుల లైంగిక దోపిడీకి సంబంధించిన ప్రకటనలు, కంటెంట్‌ విషయంలో సంస్థ అనుసరిస్తున్న విధానాలను వివరించాలని కోరింది. నోటీసులకు వారం రోజుల తర్వాత మెటా తన సమాధానాన్ని సమర్పించింది. అయితే సంస్థ ఇచ్చిన వివరణతో కమిషన్‌ సంతృప్తి చెందకుండా, పూర్తి వివరాలను తెలుసుకునేందుకు అధికారిక విచారణకు నిర్ణయించింది. ఈ నేపథ్యంలో సెప్టెంబర్‌ 16న విచారణకు హాజరు కావాలని మెటా ఇండియా మేనేజింగ్‌ డైరెక్టర్‌, సంస్థ ప్రతినిధులకు సమన్లు జారీ చేసినట్లు ప్రభుత్వ వర్గాలు వెల్లడించాయి. 

ఈ వ్యవహారంలో అత్యంత ఆందోళన కలిగిస్తున్న అంశం చిన్నారుల లైంగిక దోపిడీకి సంబంధించిన కంటెంట్‌ ప్రకటనల రూపంలో అందుబాటులోకి వచ్చిందన్న ఆరోపణలు. సాధారణంగా సోషల్ మీడియా సంస్థలు తమ ప్లాట్‌ఫామ్‌లలో ప్రచురించే ప్రకటనలు, పోస్టులు, వీడియోలపై నియంత్రణ వ్యవస్థలను కలిగి ఉంటాయి. అయినప్పటికీ, నిషేధిత కంటెంట్‌ ప్రకటనల రూపంలో కనిపిస్తే దాన్ని గుర్తించడంలో సంస్థల పర్యవేక్షణ వ్యవస్థల పనితీరుపై ప్రశ్నలు తలెత్తుతాయి.