కాంగ్రెస్ నేతల జేబులు నింపడానికే కాచిగూడ ఎస్సీ హాస్టల్ బలి

* సంక్షేమ వసతి గృహాల్లో రూ.800 కోట్ల కుంభకోణం

తెలంగాణలోని సాంఘిక సంక్షేమ (ఎస్సీ) వసతి గృహాల నిర్వహణలో కాంగ్రెస్ ప్రభుత్వం ఘోరంగా విఫలమైందని, ఎస్సీ హాస్టళ్ల నిర్వహణ పేరుతో రాష్ట్రంలో కాంగ్రెస్ నేతల పెద్ద మాఫియా నడుస్తోందని బీజేపీ ఎస్సీ మోర్చా రాష్ట్ర అధ్యక్షులు కాంతి కిరణ్ తీవ్రస్థాయిలో ఆరోపించారు. బీజేపీ ఎస్సీ మోర్చా జాతీయ పిలుపు మేరకు తెలంగాణ వ్యాప్తంగా ఉన్న ఎస్సీ హాస్టళ్ల స్థితిగతులపై క్షేత్రస్థాయి అధ్యయనం చేపట్టినట్లు తెలిపారు.

హైదరాబాద్‌తో పాటు రాష్ట్రంలోని పలు ఎస్సీ వసతి గృహాలను పరిశీలించడానికి వెళ్తుంటే, కాంగ్రెస్ ప్రభుత్వ వైఫల్యాలు బయటపడతాయనే భయంతో సిబ్బంది తమను లోపలికి అనుమతించకుండా గేట్లు మూసేస్తున్నారని మండిపడ్డారు. విద్యార్థులను కలిసి సమస్యలు తెలుసుకోకుండా అడ్డుకోవడం వెనుక ప్రభుత్వ పెద్దల కుట్ర దాగి ఉందని ఆరోపించారు.

ఉమ్మడి ఆంధ్రప్రదేశ్ నుంచి ఎంతోమంది ఐఏఎస్, ఐపీఎస్ అధికారులు, మేధావులు, రాజకీయ నాయకులను తీర్చిదిద్దిన చారిత్రక కాచిగూడ ఎస్సీ హాస్టల్ గత బీఆర్ఎస్ ప్రభుత్వ నిర్లక్ష్యంతో 2020 కరోనా కాలం నుంచి మూతపడి శిథిలావస్థకు చేరిందని గుర్తుచేశారు. ప్రజాపాలన అని చెప్పుకుంటున్న కాంగ్రెస్ అధికారంలోకి వచ్చినా ఆ హాస్టల్‌ను పునరుద్ధరించకపోవడం దారుణమని విమర్శించారు.

ఆ హాస్టల్‌లో ఉండాల్సిన విద్యార్థులను కాంగ్రెస్ నాయకులకు చెందిన ప్రైవేట్ భవనాల్లోకి తరలించి, ఒక్కో భవనానికి నెలకు రూ.5 లక్షల వరకు అద్దెలు చెల్లిస్తూ తమ పార్టీ కార్యకర్తలకు మేత వేస్తున్నారని, ప్రజాధనాన్ని యథేచ్ఛగా దోచిపెడుతున్నారని ఆయన మండిపడ్డారు. గతంలో హాస్టల్ పూర్వ విద్యార్థులు, జాయింట్ యాక్షన్ కమిటీ (జెఏసీ) నాయకులు సీఎంను కలిసి విన్నవించగా, ఉప ముఖ్యమంత్రి భట్టి విక్రమార్క, సాంఘిక సంక్షేమ శాఖ మంత్రి అడ్లూరి లక్ష్మణ్ కుమార్, అలాగే ఇదే హాస్టల్ రూమ్ నెంబర్ 33లో ఉండి చదువుకున్నానని చెప్పుకునే ఎమ్మెల్సీ అద్దంకి దయాకర్ లతో కూడిన ప్రభుత్వ బృందం కాచిగూడ హాస్టల్‌ను సందర్శించిందని గుర్తుచేశారు.

ఆ శిథిల భవనాన్ని కూల్చేసి రూ.30 కోట్లతో నూతన భవనం నిర్మిస్తామని స్వయంగా డిప్యూటీ సీఎం వాగ్దానం చేసి ఆరు నెలలు గడుస్తున్నా నేటికీ నయాపైసా కేటాయించలేదని ధ్వజమెత్తారు. అసలు వీరు ప్రకటించిన రూ.30 కోట్లు ఆ పాత భవనాన్ని కూల్చడానికి కూడా సరిపోవని ఎద్దేవా చేశారు.

ఎస్సీలపై నిజంగా చిత్తశుద్ధి ఉంటే ఆ ముగ్గురు నేతలు ముఖ్యమంత్రి ఇంటి ముందు ధర్నా చేసి కాచిగూడ హాస్టల్ నిర్మాణానికి నిధులు సాధించాలని సవాల్ విసిరారు. ప్రస్తుతం ప్రైవేట్ భవనాల్లో తలదాచుకుంటున్న ఎస్సీ విద్యార్థులకు కనీస మౌలిక వసతులు, బాత్‌రూమ్‌లు, నాణ్యమైన భోజనం, చలికాలంలో కప్పుకోవడానికి సరైన దుప్పట్లు, స్నానానికి బకెట్లు కూడా లేవని ఆయన ఆవేదన వ్యక్తం చేశారు.

హాస్టల్‌కు వెనుక ఉన్న స్థలంతో కలిపి మొత్తం రెండు ఎకరాల ప్రభుత్వ భూమిలో అత్యాధునిక హంగులతో కూడిన లర్నింగ్ సెంటర్, డిజిటల్ లైబ్రరీ, నాణ్యమైన భోజన వసతితో కూడిన భారీ భవన సముదాయ నిర్మాణానికి ప్రభుత్వం వెంటనే రూ.100 కోట్లు కేటాయించాలని కాంతి కిరణ్ డిమాండ్ చేశారు. అలాగే తాత్కాలికంగా నిర్వహిస్తున్న ప్రైవేట్ హాస్టళ్లలో యూజీసీ గైడ్‌లైన్స్ ప్రకారం పోషకాహారం, దుప్పట్లు, దినపత్రికలు, టీవీ, ఇంటర్నెట్ సౌకర్యాలు యుద్ధప్రాతిపదికన కల్పించాలని స్పష్టం చేశారు.

రాష్ట్రంలోని అన్ని ఎస్సీ హాస్టళ్లపై సమగ్ర అధ్యయనం చేసి త్వరలోనే బీజేపీ ఎస్సీ మోర్చా తరఫున ప్రభుత్వానికి సమగ్ర నివేదిక సమర్పిస్తామని తెలిపారు. ఇప్పటికైనా రాష్ట్ర ప్రభుత్వం స్పందించకపోతే, ఎస్సీ యువత భవిష్యత్తు కోసం బీజేపీ ఎస్సీ మోర్చా ఆధ్వర్యంలో ముఖ్యమంత్రి నివాసాన్ని ముట్టడిస్తామని, విద్యార్థుల హక్కులు సాధించేవరకు బీజేపీ పోరాటం ఆగదని హెచ్చరించారు.

కాగా, పేద విద్యార్థుల సంక్షేమ వసతి గృహాల్లో రూ.800 కోట్ల కుంభకోణం జరిగిందని బిజెపి అధికార ప్రతినిధి తాడూరి శ్రీనివాస్ ఆరోపించారు. విద్యార్థుల జీవితాలతో రాష్ట్ర ప్రభుత్వం చెలగాటం ఆడుతున్నదని పేర్కొంటూ బ్లాక్ లిస్ట్‌లో ఉన్న ‘నాకాఫ్’ సంస్థకు రెడ్ కార్పెట్ పరిచిందని, బీసీలను నిలువునా వంచిస్తున్నదని ఆయన తూర్పారపట్టారు.

రాష్ట్రంలోని సాంఘిక సంక్షేమ, గిరిజన, బీసీ, మైనారిటీ, దివ్యాంగుల సంక్షేమ శాఖల పరిధిలోని మూడు వేలకు పైగా రెసిడెన్షియల్ పాఠశాలలు, హాస్టళ్లు, కస్తూర్బా విద్యాలయాలు, ఆశ్రమ పాఠశాలలు, అంగన్‌వాడీ కేంద్రాలకు నిత్యావసర సరుకుల సరఫరా పేరుతో రేవంత్‌రెడ్డి ప్రభుత్వం రూ.800 కోట్ల భారీ కుంభకోణానికి తెరలేపిందని తాడూరి తీవ్ర స్థాయిలో ధ్వజమెత్తారు.

పారదర్శకత పేరిట కేంద్రీకృత టెండర్లు పిలిచి, గతంలో పలు రాష్ట్రాల్లో తీవ్ర అవినీతి ఆరోపణలతో బ్లాక్ లిస్ట్‌లో ఉంచిన ‘నాకాఫ్’ సంస్థకు ఈ వందల కోట్ల కాంట్రాక్టును కట్టబెట్టడం వెనుక భారీ ముడుపులు చేతులు మారాయని ఆయన ఆరోపించారు.