మహిళా క్రికెట్ జట్టు సారధిగా హర్మన్‌ప్రీత్ కౌర్ నిష్క్రమణ

హర్మన్‌‌ప్రీత్ తన ఇన్‌స్టాగ్రామ్ వేదికగా ఒక సుదీర్ఘమైన సందేశాన్ని పంచుకుంటూ.. “ఈ రోజు నేను భారత మహిళా క్రికెట్ జట్టు అన్ని ఫార్మాట్ల కెప్టెన్సీ నుంచి తప్పుకుంటున్నాను. ఇది ఎంతమాత్రం సులభమైన నిర్ణయం కాదు. ఎన్నో ఏళ్ల జ్ఞాపకాలు, భావోద్వేగాలు, త్యాగాలు దీని వెనుక ఉన్నాయి. జట్టు ప్రయోజనాల కోసం నా రక్తం, చెమట, సమయాన్ని ధారపోశాను. కొన్నిసార్లు నా వ్యక్తిగత ఆశయాలను కూడా పక్కనపెట్టాను” అని తెలిపారు. 

“జట్టు భవిష్యత్తు ఇప్పుడు ఎంతో ఆశాజనకంగా ఉంది. నా కర్తవ్యాన్ని నెరవేర్చాననే ప్రశాంతతతో, గర్వంతో ఈ నిర్ణయం తీసుకుంటున్నాను. కెప్టెన్సీ ముగియవచ్చు, కానీ భారత క్రికెట్‌పై నా ప్రేమ ఎప్పటికీ మారదు. ఇకపై మళ్లీ ఆటపై ఉన్న స్వచ్ఛమైన ప్రేమతో స్వేచ్ఛగా ఆడటానికి సిద్ధంగా ఉన్నాను.” అని పోస్ట్‌ చేశారు.

తొలి బాధ్యతలు: 2012లో తాత్కాలిక కెప్టెన్‌గా బాధ్యతలు చేపట్టి మహిళల టీ20 ఆసియా కప్ అందించారు.
పూర్తి స్థాయి సారథ్యం: 2016లో టీ20లకు, అనంతరం అన్ని ఫార్మాట్లకు పూర్తి స్థాయి కెప్టెన్‌గా ఎంపికై దశాబ్ద కాలం పాటు విజయవంతంగా నడిపించారు.
ప్రపంచ కప్ కల నిజం: 2025లో స్వదేశంలో జరిగిన వన్డే ప్రపంచ కప్‌ను గెలిపించి, భారత్‌కు చారిత్రాత్మక విజయాన్ని అందించారు.
ట్రాక్ రికార్డ్:
టీ20లు: 155 మ్యాచ్‌ల్లో 92 విజయాలు (మహిళల టీ20లలో అత్యధిక విజయాలు సాధించిన కెప్టెన్)
వన్డేలు: 51 మ్యాచ్‌ల్లో 30 విజయాలు

గౌహతిలో బీసీసీఐ కార్యదర్శి దేవాజిత్ సైకియా, హెడ్ కోచ్ అమోల్ మజుందార్, వైస్ కెప్టెన్ స్మృతి మంధాన, హర్మన్‌ప్రీత్‌ల మధ్య జరిగిన కీలక భేటీ అనంతరం ఈ పరిణామం చోటుచేసుకుంది. అన్ని ఫార్మాట్లలోనూ భారత్ తదుపరి సారధిగా స్టార్ ఓపెనర్ స్మృతి మంధాన బాధ్యతలు చేపట్టే అవకాశాలు మెండుగా ఉన్నాయి. అక్టోబర్ 16 నుంచి జింబాబ్వే సిరీస్ ప్రారంభం కానున్న నేపథ్యంలో, బీసీసీఐ త్వరలోనే కొత్త కెప్టెన్ పేరును అధికారికంగా ప్రకటించనుంది.