ప్రమాదం నుండి బయటపడిన భారతీయ పైలట్ కెప్టెన్ స్మిత్ మచ్చార్

* ఒక పైలట్‌గా, నేను నా విధిని మాత్రమే నిర్వర్తించాను!

ఫ్లైదుబాయ్ విమానం ఎఫ్ జెడ్1073ను నడుపుతుండగా తన కో-పైలట్ చేసిన భయంకరమైన కాక్‌పిట్ దాడిలో కత్తిపోట్లకు గురైన భారతీయ పైలట్ కెప్టెన్ స్మిత్ మచ్చార్ ప్రస్తుతం ప్రమాదం నుండి బయటపడి, అధునాతన వైద్య పర్యవేక్షణలో కోలుకుంటున్నారు. తన వీరోచిత చర్యతో 174 మంది ప్రయాణికుల ప్రాణాలను కాపాడి, విమానంపై నియంత్రణ సాధించాలన్న తన కో-పైలట్ ప్రయత్నాన్ని విఫలం చేసిన ఈ పైలట్ ఆరోగ్య పరిస్థితిపై, రాయబారి దీపక్ మిట్టల్ ఆసుపత్రిలో పైలట్‌ను పరామర్శించిన అనంతరం యూఏఈలోని భారత రాయబార కార్యాలయం ఈ సమాచారాన్ని అందించింది.

పైలట్ “మంచి ఆరోగ్యంతో” ఉన్నారని, కెప్టెన్ మచ్చార్ చికిత్స, క్షేమం కోసం భారత అధికారులు స్థానిక అధికారులతో సంప్రదింపులు జరుపుతున్నారని రాయబార కార్యాలయం ఒక ఎక్స్ పోస్ట్‌లో తెలియజేసింది. “రాయబారి @d_mittal73 ఆసుపత్రిలో కెప్టెన్ స్మిత్ మచ్చర్, అతని కుటుంబాన్ని పరామర్శించారు. కెప్టెన్ మచ్చర్ మంచి ఆరోగ్యంతో ఉన్నారు. బాగా కోలుకుంటున్నారు. అతని నిరంతర వైద్య సంరక్షణ, శ్రేయస్సును నిర్ధారించడానికి రాయబార కార్యాలయం స్థానిక అధికారులతో సన్నిహిత సమన్వయంతో ఉంది,” అని ఆ పోస్ట్‌లో పేర్కొన్నారు.

కెప్టెన్ మచ్చర్ శ్రేయస్సు, వేగంగా కోలుకోవడం పట్ల సంతృప్తి వ్యక్తం చేస్తూ, ఆ భారత జాతీయుడికి మద్దతు, వైద్య సంరక్షణ అందించినందుకు భారత రాయబారి ఎమిరేట్స్ ప్రభుత్వానికి ధన్యవాదాలు తెలిపారు. “కెప్టెన్ స్మిత్‌ను కలవడం చాలా భరోసానిచ్చింది. అందిస్తున్న మద్దతు, వైద్య సంరక్షణకు యూఏఈ ప్రభుత్వానికి ధన్యవాదాలు,” అని రాయబారి దీపక్ మిట్టల్ ఎక్స్ లో రాశారు.

భారత రాయబారి ఆసుపత్రిని సందర్శించిన విషయాన్ని ప్రస్తావిస్తూ, విదేశీ వ్యవహారాల మంత్రిత్వ శాఖ ప్రతినిధి రణధీర్ జైస్వాల్ ఒక ఎక్స్ పోస్ట్‌లో ఇలా రాశారు: “రాయబారి @d_mittal73 ఆసుపత్రిలో కెప్టెన్ స్మిత్ మచ్చర్ మరియు అతని కుటుంబాన్ని పరామర్శించారు.” కెప్టెన్ స్మిత్మచ్ఛార్‌కు వాణిజ్య విమానయానంలో 13 సంవత్సరాలకు పైగా అనుభవం ఉంది. ప్రధానంగా బోయింగ్ 737 విమానాలలో దాదాపు 9,750 గంటల పాటు విమానం నడిపిన అనుభవంతో పాటు, గతంలో స్పైస్‌జెట్‌లో 11 సంవత్సరాలు లైన్ ట్రైనింగ్ కెప్టెన్‌గా కూడా పనిచేశారు.

భయంకరమైన పరిస్థితులలో అసాధారణమైన ధైర్యసాహసాలు ప్రదర్శిస్తూ, ఘట్‌కోపర్‌లోని భానుశాలి వాడి నివాసి, ముంబైలో జన్మించిన భారతీయ పైలట్ కెప్టెన్ స్మిత్ మచ్చర్ ఆ భయంకరమైన సంఘటన గురించి ఓ విలేకరితో మాట్లాడుతూ కెప్టెన్ మచ్చర్ ఎంతో వినయంగా స్పందించారు: “ఒక పైలట్‌గా, నేను నా విధిని మాత్రమే నిర్వర్తించాను. విమానం సురక్షితంగా ల్యాండ్ అయింది, అందరూ ప్రమాదం నుండి బయటపడ్డారు—దానికే నేను కృతజ్ఞుడను.”