ఎల్ఈటి అగ్రశ్రేణి కమాండర్ ఫౌజీ మూసా కాల్చివేత

జమ్మూ కాశ్మీర్‌లోని బుద్గాం జిల్లాలో మంగళవారం రాత్రి భద్రతా దళాలతో జరిగిన ఎదురుకాల్పుల్లో లష్కర్-ఎ-తైబాకు చెందిన ఒక అగ్రశ్రేణి ఉగ్రవాది హతమయ్యాడు. హతమైన ఉగ్రవాదిని సులేమాన్ షా అలియాస్ ఫౌజీ మూసాగా భద్రతా అధికారులు గుర్తించారు. ‘ఎక్స్’ లో భారత సైన్యానికి చెందిన చినార్ కార్ప్స్ ఒక పోస్ట్‌లో, బుద్గాంలోని యూస్‌మార్గ్ సమీపంలో ఉన్న కోరగ్ ప్రాంతంలో సైన్యం, పోలీసులు, సెంట్రల్ రిజర్వ్ పోలీస్ ఫోర్స్ (సిఆర్‌పిఎఫ్) సంయుక్తంగా ‘ఆపరేషన్ కోరగ్’ అనే పేరుతో ఈ ఆపరేషన్‌ను నిర్వహించినట్లు తెలిపింది.

నిర్దిష్ట నిఘా సమాచారం ఆధారంగా, కోరగ్, యూస్‌మార్గ్ సాధారణ ప్రాంతంలో భారత సైన్యం, జమ్మూ కాశ్మీర్ పోలీసులు, సిఆర్‌పిఎఫ్ దళాలు సంయుక్తంగా గాలింపు చర్యను ప్రారంభించాయి. “అప్రమత్తంగా ఉన్న దళాలు అనుమానాస్పద కార్యకలాపాలను గమనించాయి. వారు సవాలు చేయడంతో, ఉగ్రవాదులు కాల్పులు జరిపారు,…” అని చినార్ కార్ప్స్ తెలిపింది.

“అప్రమత్తంగా ఉన్న సైనికులు అనుమానాస్పద కార్యకలాపాలను గమనించగా, వారు ప్రశ్నించడంతో ఉగ్రవాదులు కాల్పులు జరిపారు. దీంతో ఇరువర్గాల మధ్య భీకర కాల్పులు జరగగా, అందులో ఒక ఉగ్రవాది హతమయ్యాడు,” అని ఆ నివేదిక పేర్కొంది. జమ్మూ కాశ్మీర్‌లో జరిగిన పలు దాడుల్లో ప్రమేయం ఉన్నట్లు ఆరోపణలు ఎదుర్కొంటున్న మూసా కోసం అధికారులు గాలిస్తున్నారు.

గత కొన్నేళ్లుగా పీర్ పంజాల్ పర్వత శ్రేణికి ఇరువైపులా జరిగిన వివిధ ఘటనలతో కూడా అతనికి సంబంధం ఉందని వారు తెలిపారు. అతను గతంలో సెప్టెంబర్ 5న యూస్‌మార్గ్ కొండల్లో జరిగిన ఒక ఎన్‌కౌంటర్ నుండి తప్పించుకోగలిగాడు. ఆ ఆపరేషన్ సమయంలో అతని సన్నిహిత అనుచరుడు యాసిర్ హతమయ్యాడు. బుద్గామ్‌లో చేపట్టిన తాజా ఆపరేషన్ కారణంగా మూసా మళ్లీ భద్రతా దళాల దృష్టిలో పడ్డాడు.

చివరకు దుద్‌పత్రి అటవీ ప్రాంతంలో అతను హతమయ్యాడు. జమ్మూ కాశ్మీర్‌లో లష్కర్-ఎ-తైబా కార్యకలాపాలకు మూసా మరణం ఒక పెద్ద ఎదురుదెబ్బ అని అధికారులు పేర్కొన్నారు. ఈ ఎన్‌కౌంటర్ తర్వాత కూడా సైన్యం, పోలీసులు, సిఆర్‌పిఎఫ్ ఆ ప్రాంతంలో తమ కార్యకలాపాలను కొనసాగిస్తున్నాయి. ఈ ఆపరేషన్‌కు సంబంధించిన మరిన్ని వివరాలు తెలియాల్సి ఉంది.