చంపత్ రాయ్, అనిల్ మిశ్రా ఎవరు?

అయోధ్యలోని రామమందిరానికి విరాళంగా వచ్చిన నిధులను దుర్వినియోగం చేసినందుకు ఎనిమిది మందిని అరెస్టు చేసిన మరుసటి రోజే, ప్రతిపక్షాల విమర్శలను ఎదుర్కొంటున్న ‘శ్రీ రామ జన్మభూమి తీర్థ క్షేత్ర ట్రస్ట్’కు చెందిన ఇద్దరు కీలక వ్యక్తులు  ప్రధాన కార్యదర్శి చంపత్ రాయ్, ట్రస్టీ అనిల్ మిశ్రా నైతిక బాధ్యత వహిస్తూ తమ పదవులకు రాజీనామా చేశారు.

వీరిద్దరిపై నేరుగా ఎటువంటి ఆరోపణలు లేనప్పటికీ, అరెస్టు అయిన ఎనిమిది మందిలో రాయ్ మాజీ డ్రైవర్ రామ్ శంకర్ యాదవ్ (అలియాస్ తిన్ను యాదవ్) కూడా ఉండటం గమనార్హం.  చంపత్ రాయ్ మరియు అనిల్ మిశ్రాల రాజీనామాలను భక్తులలో విశ్వాసాన్ని పునరుద్ధరించే దిశగా ఒక కీలకమైన అడుగుగా భావించవచ్చు. పూర్తి పారదర్శకత, జవాబుదారీతనానికి కట్టుబడి ఉన్నామని, రామ్ లల్లాకు చెందిన ప్రతి పైసాకు సరైన లెక్కలు చూపిస్తున్నామని ట్రస్ట్ స్పష్టం చేసింది.

చంపత్ రాయ్ 79 ఏళ్ల చంపత్ రాయ్ ఉత్తరప్రదేశ్‌లోని బిజ్నోర్ జిల్లా, నగీనా తహసీల్‌లో జన్మించారు. భౌతికశాస్త్రంలో పోస్ట్-గ్రాడ్యుయేషన్ పూర్తి చేసిన తర్వాత, ఆయన బిజ్నోర్‌లోని ఒక కళాశాలలో దాదాపు 11 ఏళ్లపాటు బోధించారు. చిన్నప్పటి నుంచే ఆర్‌ఎస్‌ఎస్‌ తో సంబంధం ఉన్నప్పటికీ, ఆ తర్వాత పూర్తిస్థాయిలో అందులో చేరి ‘ప్రచారక్’గా బాధ్యతలు చేపట్టారు.

ఏడాది తర్వాత, ఆయన ‘గట్ నాయక్’ (శాఖ నిర్వాహకుడు)గా, ఆపై ‘సహ-జిల్లా కార్యవాహ’ (జిల్లా సంయుక్త కార్యదర్శి)గా నియమితులయ్యారు. అత్యవసర పరిస్థితి సమయంలో అరెస్టయిన వారిలో ఆయన కూడా ఉన్నారు. ఆ తర్వాత, 1981నుండి 1984 మధ్య, డెహ్రాడూన్‌లో సంఘ్  ‘జిల్లా ప్రచారక్’గా పనిచేశారు. ఆపై పక్కనే ఉన్న సహరాన్‌పూర్, తరువాత మీరట్‌కు వెళ్లారు.

జూలై 1986లో విశ్వ హిందూ పరిషత్ (వీహెచ్‌పీ) ‘ప్రాంత సహ సంఘటనా కార్యదర్శి’గా బాధ్యతలు చేపట్టారు. ఆ తర్వాత సంస్థ ప్రాంతీయ విభాగాలలో ఒకదానిలో ‘సంఘటనా కార్యదర్శి’గా పనిచేశారు. 1991లో రామ జన్మభూమి ఉద్యమం ఉధృతంగా ఉన్న సమయంలో, రాయ్ అయోధ్యకు బదిలీ అయ్యారు. 1991 నుండి 1995 వరకు, ఆయన ఉత్తరప్రదేశ్  వీహెచ్‌పీ  ‘సహ-సంఘటనా కార్యదర్శి’గా వ్యవహరించారు.

1996లో సంస్థ ‘కేంద్ర సహ-కార్యదర్శి’గా ఢిల్లీకి బదిలీ అయ్యారు. వీహెచ్‌పీ లో కార్యదర్శి, సంయుక్త ప్రధాన కార్యదర్శి, ప్రధాన కార్యదర్శిగా పనిచేసిన తర్వాత, 2018లో అంతర్జాతీయ ఉపాధ్యక్షుడిగా పదోన్నతి పొందారు. ‘శ్రీ రామ జన్మభూమి తీర్థ క్షేత్ర’ ప్రధాన కార్యదర్శిగా నియమితులై, ఆ సంస్థకు కీలక ముఖంగా మారినప్పుడు రాయ్ అందరి దృష్టిని ఆకర్షించారు.

అయోధ్యలోని ‘కార్‌సేవక్‌పురం’ను తన కేంద్రంగా చేసుకుని, అక్కడి నుండే ఆలయ నిర్మాణ పనులను ఆయన పర్యవేక్షించారు. విరాళాల విషయంలో ప్రతిపక్షాల ఆరోపణలకు కేంద్రంగా ఉంటున్నప్పటికీ  అయోధ్య, లక్నోలలోని  వీహెచ్‌పీ  కీలక నాయకులు ఆయనకు అండగా నిలిచారు. రాయ్ తన చుట్టూ ఉన్న వ్యక్తులను నమ్మడం వల్ల “పర్యవేక్షణలో లోపం” జరిగి ఉండవచ్చని వారు పేర్కొన్నారు. 

 65 ఏళ్ల మిశ్రా, 2020లో ఏర్పాటైన ‘శ్రీ రామ జన్మభూమి తీర్థ క్షేత్ర’ ట్రస్ట్‌లోని 15 మంది ట్రస్టీలలో ఒకరు. జనవరి 22, 2024న జరిగిన రామమందిర ప్రాణప్రతిష్ఠా మహోత్సవానికి ముందు, మిశ్రా, ఆయన భార్య ఉష “ప్రధాన యజమానులుగా” (ముఖ్య నిర్వాహకులుగా) ఉండి పూజా కార్యక్రమాలను నిర్వహించారు. 

జనవరి 16న మంత్రోచ్ఛారణల మధ్య సరయూ నదిలో పుణ్యస్నానం ఆచరించడం ద్వారా ఆయన ‘రామ్ లల్లా’ విగ్రహ ప్రాణప్రతిష్ఠకు సంబంధించిన పూజా కార్యక్రమాలను ప్రారంభించారు. ఆ తర్వాత, ఆయన ఉపవాసం ఉంటూ ప్రాయశ్చిత్త, సంకల్ప, కర్మకుటి పూజలను నిర్వహించారు. ఈ ప్రక్రియ ఎనిమిది గంటల పాటు కొనసాగింది. మిశ్రా అయోధ్యలో నివసిస్తున్నారు.

ట్రస్టీగా బాధ్యతలు చేపట్టినప్పటి నుండి, ఆలయ నిర్మాణ పనుల పురోగతి గురించి మీడియా, స్థానికులు, ప్రముఖ సందర్శకులతో తరచుగా సంభాషిస్తూ వస్తున్నారు. మిశ్రా ఉత్తరప్రదేశ్‌లోని అంబేద్కర్ నగర్ జిల్లాకు చెందిన పటౌనా గ్రామానికి చెందినవారు. అత్యవసర పరిస్థితి సమయంలో ఆయన ఆర్ఎస్ఎస్ లో చేరారు. క్రమంగా బాధ్యతల్లో ఎదిగి, అవధ్ ప్రాంతంలో ఆర్ఎస్ఎస్ ‘ప్రాంత్ సహ-కార్యవాహ’గా, ఆ తర్వాత ‘ప్రాంత్ కార్యవాహ’గా పనిచేశారు. 

ఆయన రామమందిర ఉద్యమంలో కూడా పాలుపంచుకున్నారు. ప్రస్తుతం ఆర్ఎస్ఎస్ అవధ్ ప్రాంతీయ విభాగంలో సభ్యుడిగా ఉన్నారు. మిశ్రా ప్రభుత్వ వైద్య అధికారిగా (హోమియోపతి) పనిచేసి 2020లో పదవీ విరమణ చేశారు. పదవీ విరమణ తర్వాత, ఆయన అయోధ్యలో ఆర్ఎస్ఎస్ కార్యకలాపాలు, ఆలయ నిర్మాణ పనులలో నిమగ్నమయ్యారు. మిశ్రాకు ఇద్దరు కుమారులు, వీరిద్దరూ వైద్యులే, వారిలో ఒకరు జర్మనీలో వైద్య వృత్తిని కొనసాగిస్తున్నారు.