* నక్సలిజంకు ఇందిరా గాంధీ స్వీకరించిన సిద్దాంతమే కారణం
భారతదేశం ఇప్పుడు నక్సల్ రహితంగా మారిందని ప్రకటిస్తూ నక్సలిజాని
‘నక్సలిజంపై భారతదేశం సాగిస్తున్న నిర్ణయాత్మక పోరాటం’ అనే అంశంపై లోక్సభలో జరిగిన చర్చలో మాట్లాడుతూ, భారతదేశంలో మావోయిజం అంతం అంచున ఉందని షా చెప్పారు. అదే సమయంలో, ‘రెడ్ టెర్రర్’ (ఎర్ర ఉగ్రవాదం) కారణంగా ప్రాణాలు కోల్పోయిన పౌరులకు, భద్రతా సిబ్బందికి ఆయన నివాళులర్పించారు. నక్సలిజం లేదా మావోయిజంకు అభివృద్ధికి ఎటువంటి సంబంధం లేదని, కేవలం ఆయుధాల ద్వారా అధికారాన్ని చేజిక్కించుకోవడమే దీని లక్ష్యమని షా తేల్చి చెప్పారు.
నక్సల్స్తో సానుభూతి చూపే కాంగ్రెస్ నాయకులు ఇప్పుడు ‘వారే నక్సలైట్లుగా’ మారిపోయారని అమిత్ షా ఆరోపించారు. మాజీ యూపీఏ ఛైర్పర్సన్ సోనియా గాంధీ, లోక్సభ ప్రతిపక్ష నాయకుడు రాహుల్ గాంధీలను షా ప్రత్యేకంగా ప్రస్తావిస్తూ, సోనియా గాంధీ నేతృత్వంలోని జాతీయ సలహా మండలి (ఎన్ఏసీ)లో నక్సల్ సానుభూతిపరులు సభ్యులుగా ఉన్నారని గుర్తు చేశారు.
అధికారాన్ని కైవసం చేసుకోవడానికే ఈ సిద్ధాంతాన్ని ఆదివాసీల మధ్య వ్యాప్తి చేశారని ఆయన తెలిపారు. “ఈ రోజు, బస్తర్ ప్రాంతం నుండి నక్సలిజం దాదాపుగా నిర్మూలించబడింది,” అని అమిత్ షా వెల్లడించారు. “బస్తర్ ప్రజలు వెనుకబడిపోవడానికి ప్రధాన కారణం, ఆ ప్రాంతంపై ‘రెడ్ టెర్రర్’ నీడ కమ్ముకుని ఉండటమే.అందుకే అభివృద్ధి వారికి చేరలేకపోయింది. ఈ రోజు, ఆ నీడ తొలగిపోయింది. ఇప్పుడు బస్తర్ అభివృద్ధి పథంలో పయనిస్తోంది” అని చెప్పారు.
‘‘దేశాభివృద్ధికి మావోయిస్టు సిద్ధాంతాలు, విధానాలు తీవ్ర ఆటంకం. మావోయిస్టుల రక్తపాత సిద్ధాంతాన్ని ప్రజలంతా వ్యతిరేకిస్తున్నారు. బస్తర్లో నక్సల్స్ అనేక ఏళ్లపాటు సమాంతర ప్రభుత్వం నడిపారు. ఆయుధాలు వీడాలని బస్తర్ వెళ్లి పలుసార్లు కోరాం’’ అని అమిత్ షా గుర్తు చేశారు.
నక్సలిజం నశించాలని గిరిజనులు కూడా కోరుకుంటున్నారని అమిత్ షా స్పష్టం చేశారు.
ప్రజలు ఎదుర్కొనే అన్యాయాలకు సంబంధించి రాజ్యాంగంలో తగిన నిబంధనలు ఉన్నాయని, కానీ ఆయుధాలు చేతబట్టడం దానికి పరిష్కారం కాదని కేంద్ర హోం మంత్రి స్పష్టం చేశారు. నక్సలిజాన్ని సమర్థించేవారు ఒక విషయం గుర్తుంచుకోవాలని చెబుతూ ఆయుధాలు చేతబట్టేవారు కచ్చితంగా తగిన మూల్యం చెల్లించుకోవాల్సి ఉంటుందని ఆయన హెచ్చరించారు.
ఆయుధాలు పట్టిన వారిని మోదీ ప్రభుత్వం కచ్చితంగా బాధ్యులను చేస్తుందని షా స్పష్టం చేశారు. కాంగ్రెస్ పార్టీపై తన విమర్శలను కొనసాగిస్తూ, గిరిజనులకు ప్రయోజనం చేకూర్చే పథకాలను అమలు చేయడానికి ఆ పార్టీ అంగీకరించలేదని షా ఆరోపించారు. ఎందుకంటే, ఆ పథకాల అమలు వారి సిద్ధాంతం ఆధారంగా సాగుతున్న అక్రమ పాలనకు భంగం కలిగిస్తుందని వారు భావించారని ఆయన ఆరోపించారు.
“స్వాతంత్ర్యం వచ్చిన 75 ఏళ్లలో, 60 ఏళ్ల పాటు అధికారం మీ (కాంగ్రెస్) చేతుల్లోనే ఉంది. అలాంటప్పుడు, గిరిజన వర్గాలు ఈనాటికీ అభివృద్ధికి ఎందుకు దూరంగా ఉండిపోయాయి?” అని ఆయన ప్రశ్నించారు. “కేవలం ఇప్పుడు, నరేంద్ర మోదీ రాకతోనే అసలైన అభివృద్ధి జరుగుతుంది” అని తెలిపారు.
“అరవై ఏళ్ల పాటు, మీరు వారికి ఇళ్లు గానీ, స్వచ్ఛమైన తాగునీరు గానీ అందించడంలో విఫలమయ్యారు. వారి కోసం ఒక్క పాఠశాల కూడా నిర్మించలేదు. వారి ప్రాంతాలకు మొబైల్ టవర్లు, బ్యాంకింగ్ సేవలు చేరకుండా అడ్డుకున్నారు. అయినా సరే, ఇప్పుడు మీరే బాధ్యతాయుతమైన పాలన కావాలని డిమాండ్ చేస్తున్నారా?” అని షా ఎద్దేవా చేశారు.
తన ప్రసంగంలో, భగత్ సింగ్, బిర్సా ముండాలను నక్సలైట్లతో పోల్చినందుకు అమిత్ షా ప్రతిపక్షాలను విమర్శించారు. అమాయక ప్రజలను హతమార్చడానికి ఆయుధాలు చేతబట్టిన నక్సలైట్లతో భగత్ సింగ్, బిర్సా ముండాలను ఎవరైనా ఎలా పోల్చగలరని ప్రశ్నిస్తూ, ఇటువంటి కీలక అంశాలను ప్రస్తావించేటప్పుడు ప్రతిపక్షాలు సంకుచిత రాజకీయాలకు అతీతంగా వ్యవహరించాలని హితవు చెప్పారు.
నక్సలైట్లు భగత్ సింగ్, సుభాష్ చంద్రబోస్, తిలకా మాంఝీ లేదా బిర్సా ముండాలను ఎప్పుడూ తమ ఆదర్శాలుగా భావించలేదని, కేవలం మావోను మాత్రమే ఆదర్శంగా స్వీకరించారని కేంద్ర హోం మంత్రి స్పష్టం చేశారు. నక్సలైట్లకు ఆదర్శం భారతీయులెవరూ కాదని, వారికి మావో ఆదర్శమని అమిత్ షా పేర్కొన్నారు.
‘‘రోడ్లు, విద్యుత్ వంటి సదుపాయాలు లేకుండా గిరిజన ప్రాంతాలు ఎలా అభివృద్ధి చెందుతాయి? నక్సల్స్ చిన్న పిల్లలకు తుపాకులు, ఆయుధ సామాగ్రి ఇచ్చారు. ఏజెన్సీ ప్రాంతాల యువత జీవితాలను నక్సల్స్ నాశనం చేశారు. నక్సల్స్ ప్రభావిత ప్రాంతాల్లో నిరక్షరాస్యత ఎక్కువగా ఉంది. విద్య, వైద్య, మౌలిక వసతులను కూడా నక్సల్స్ ధ్వంసం చేస్తున్నారు” అని ఆగ్రహం వ్యక్తం చేశారు.
కేంద్ర సాయుధ పోలీసు బలగాలు (సిఎపిఎఫ్), గిరిజన వర్గాల కృషిని ప్రశంసిస్తూ, నక్సలిజం తన చివరి దశకు చేరుకుందని అమిత్ షా తెలిపారు. ఆయుధాలు చేతబట్టి, మహిళలు, పిల్లలతో సహా అమాయక ప్రజలను పొట్టనపెట్టుకుంటున్న వారితో మోదీ ప్రభుత్వం ఎప్పటికీ చర్చలు జరపదని ఆయన స్పష్టం చేశారు. “ఇదే మా ప్రభుత్వ విధానం. ఆయుధాలు విడనాడిన వారితో మాత్రమే చర్చలు జరుగుతాయి. బుల్లెట్లను ప్రయోగించే వారికి బుల్లెట్లతోనే సమాధానం ఇవ్వబడుతుంది,” అని ఆయన హెచ్చరించారు.
More Stories
ప్రైవేటు వ్యక్తులకు లక్షన్నర ఎకరాల ఆలయ భూములా?
డాలర్కు 95 మార్కును దాటిన రూపాయి .. నిర్మలా భరోసా
తెలంగాణ అసెంబ్లీలో హేట్ స్పీచ్ బిల్లు