దిత్వా తుపానుతో శ్రీలంక అతలాకుతలం

దిత్వా తుపాను శ్రీలంకలో పెను విషాదాన్ని, బీభత్సాన్ని కలిగించింది. పలుచోట్ల కొండచరియలు కూలి, భారీ వరదలు సంభవించడంతో ద్వీప దేశంలో తీవ్ర ఆస్తి, ప్రాణ నష్టం జరిగింది. ఈ విపత్తులో ఇప్పటి వరకు 123 మంది మరణించగా, 130 మంది గల్లంతైనట్లు తెలుస్తోంది. శ్రీలంక అధ్యక్షుడు అనుర కుమార దిసానాయకే ద్వీపం అంతటా అత్యవసర పరిస్థితిని ప్రకటించారు. 

భారత్ తక్షణమే స్పందించింది. ఆదేశానికి మానవతా సాయం అందించేందుకు ఆపరేషన్ సాగర్ బంధు అనే పేరుతో అక్కడి ప్రజలకు అన్ని రకాలుగా సాయం చేస్తోంది. మరోవైపు కుండపోతగా వర్షాలు, బలమైన ఈదురుగాలులు వీస్తున్నాయి.  శ్రీలంకలో వారం రోజులుగా కురుస్తున్న వర్షాల కారణంగా అనేక ఇళ్లు ధ్వంసమయ్యాయని  విపత్తు నిర్వహణ కేంద్రం తెలిపింది. ఈ క్రమంలో 43వేల మందికి పైగా ప్రజలను సురక్షిత ప్రాంతాలకు తరలించామని డీఎంసీ జనరల్‌ డైరెక్టర్‌ సంపత్‌ చెప్పారు. రెస్క్యూ సిబ్బంది సహాయక చర్యలు కొనసాగుతున్నాయని, లోతట్టు ప్రాంతాల్లో పరిస్థితి మరీ దయనీయంగా ఉందని తెలిపారు. 

శక్రవారం కెలాని నది ఒడ్డు మునిగిపోయిందని, వందల మందిని తాత్కాలిక పునరావాసాలకు తరలించామని పేర్కొన్నారు. వారితో పాటు అక్కడ ఉన్న మిగిలినవారిని కూడా సురక్షిత ప్రాంతాలకు తరలించడంపై కసరత్తు చేస్తున్నట్లు వివరించారు.  కాగా తమిళనాడు తీరం వైపుగా తుపాను కదులుతోంది. నైరుతి బంగాళాఖాతం, ఆనుకుని ఉన్న శ్రీలంక తీరంలో ‘దిత్వా’ తుపాను ఉత్తర, వాయువ్య దిశగా నెమ్మదిగా కదుతులుతుందని విపత్తుల నిర్వహణ సంస్థ మేనేజింగ్‌ డైరెక్టర్‌ ప్రఖర్‌ జైన్‌ తెలిపారు.

ప్రస్తుతం ట్రికోమలికి వాయువ్యంగా 80 కి.మీలు, పుదుచ్చేరికి దక్షిణ ఆగ్నేయంగా 330 కి.మీలు, చెన్నైకి దక్షిణంగా 430 కి.మీల దూరంలో కేంద్రీకృతమై ఉంది.  తుపాను ఉత్తర-వాయవ్య దిశగా కదులుతూ శనివారం అర్ధరాత్రి నాటికి లేదా ఆదివారం తెల్లవారుజాములోపు ఉత్తర తమిళనాడు, పుదుచ్చేరి, దక్షిణ కోస్తా (ఏపీ) తీరాలను సమీపించే అవకాశముంది. 

ఆదివారం వరకూ తుపానుగా తీవ్రత కొనసాగించి, రాత్రికి తీవ్ర వాయుగుండంగా బలహీనపడే అవకాశముందని భారత వాతావరణ విభాగం (ఐఎండీ) తెలిపింది. సోమవారం ఉదయానికి చెన్నైకి సమీపంగా వెళ్తుందని, తర్వాత తీరం వెంబడి ప్రయాణించి, సముద్రంలోనే బలహీనపడవచ్చని అంచనా వేసింది.  తుపాను ప్రభావంతో రాబోయే మూడు రోజుల్లో ఏపీలోని దక్షిణ కోస్తా, రాయలసీమలోని కొన్ని ప్రాంతాల్లో విస్తారంగా వర్షాలు కురిసే అవకాశముందని అమరావతి వాతావరణ కేంద్రం పేర్కొంది. ఆదివారం శ్రీపొట్టిశ్రీరాములు నెల్లూరు, చిత్తూరు, తిరుపతి, అన్నమయ్య జిల్లాలకు రెడ్‌ అలర్ట్‌ జారీ చేసింది.

మరోవైపు భారత్ ఆపరేషన్ సాగర్ బంధు పేరుతో ఆహార పదార్థాలు సహా ఇతర సహాయ సామగ్రిని కొలంబోకు తరలించింది. వాయుసేనకు చెందిన సీ130 సైనిక రవాణా విమానంతో పాటు నావికా దళానికి చెందిన ఐఎన్​ఎస్ విక్రాంత్, ఐఎన్​ఎస్ ఉదయ్​గిరి ఇందులో పాలుపంచుకుంటున్నాయి. సీ130 సైనిక రవాణా విమానంలో 21 టన్నుల సామగ్రిని కొలంబోకు తరలించారు. వరద ప్రభావిత ప్రాంతాల్లో సహాయ చర్యలు చేపట్టేందుకు 80 మంది ఎన్డీఆర్​ఎఫ్ సిబ్బందిని కూడా భారత్, శ్రీలంకకు తరలించింది.

ప్రధాన మంత్రి నరేంద్ర మోదీ శ్రీలంకలో ప్రాణ నష్టంపై సంతాపం వ్యక్తం చేస్తూ  బాధితుల క్షేమం కోసం ప్రార్థిస్తున్నట్లు ట్వీట్ చేశారు. “మన సన్నిహిత సముద్ర పొరుగు దేశానికి సంఘీభావంగా, ఆపరేషన్ సాగర్ బంధు కింద సహాయక సామగ్రి, సాంకేతిక మద్దతును పంపాం” అని మోదీ తెలిపారు. ఈ సహాయక చర్యలు తమ ‘నైబర్‌హుడ్ ఫస్ట్’ విధానం, ‘విజన్ మహాసాగర్’ మార్గదర్శకత్వంలో జరుగుతున్నట్లు ప్రధాని స్పష్టం చేశారు.

అవసరమైతే మరింత సాయమందించడానికి సిద్ధంగా ఉన్నట్లు ప్రధాని ప్రకటించారు. శ్రీలంక ప్రభుత్వ అభ్యర్ధన మేరకు తరలింపు చర్యలకు గానూ ప్రస్తుతం కొలంబోలో వున్న ఐఎన్‌ఎస్‌ విక్రాంత్‌ నుండి హెలికాప్టర్లను కూడా భారత్‌ మోహరించింది.