కానిస్టేబుల్‌ హత్య కేసు నిందితుడు రియాజ్ కాల్చివేత

నిజామాబాద్ పట్టణంలో విధి నిర్వహణలో ఉన్న సీసీఎస్ కానిస్టేబుల్ ప్రమోద్‌ను కరుడుగట్టిన నేరస్తుడు షేక్ రియాజ్ ఈ నెల 17న కత్తితో అత్యంత దారుణంగా పొడిచి చంపాడు. వాహనాల దొంగతనం కేసులో రియాజ్‌ను అదుపులోకి తీసుకుని బైక్‌పై తీసుకెళ్తుండగా కత్తితో విచక్షణారహితంగా దాడి చేశాడు. ఈ ఘటనలో గాయపడిన ప్రమోద్ చికిత్స పొందుతూ మరణించాడు.

దీంతో అప్రమత్తమైన పోలీసులు షేక్ రియాజ్ కోసం గాలింపు చర్యలు చేపట్టారు. ఈ క్రమంలో సారంగపూర్‌లోని అటవీ ప్రాంతంలో పడివున్న ఓ పాడుబడిన లారీలో దాక్కుని ఉండగా పోలీసులకు పట్టుకున్నారు. ఆ సమయంలో పోలీసుల నుంచి పారిపోయేందుకు రియాజ్ ప్రయత్నించాడు. ఈ క్రమంలో అతనికి గాయాలు కావడంతో ఆదివారం రాత్రి నిజామాబాద్ ప్రభుత్వ ఆస్పత్రికి తీసుకొచ్చారు.

నిజామాబాద్ జీజీహెచ్‌లో చికిత్స పొందుతున్న సమయంలో ఆస్పత్రి నుంచి పారిపోయేందుకు రియాజ్ ప్రయత్నించాడు. సోమవారం తన పక్కనే ఉన్న ఏఆర్ కానిస్టేబుల్ గన్ లాక్కొని బెదిరింపులకు పాల్పడ్డాడు. ఈ క్రమంలో పోలీసులు కాల్పులు జరపడంతో రియాజ్ మరణించాడు. రియాజ్ ఎన్‌కౌంటర్‌పై డీజీపీ శివధర్ రెడ్డి స్పందిస్తూ ఆదివారం రోజున తనను పట్టుకుంటున్న ఆసిఫ్‌ అనే వ్యక్తిపై రియాజ్‌ దాడి చేశాడని, సోమవారం మరో కానిస్టేబుల్‌ను గాయపరిచి పారిపోయేందుకు యత్నించాడని చెప్పారు.