* పాక్ ఓటర్ గుర్తింపు కార్డులు, కరాచీ చాకోలెట్లు, మైక్రో-ఎస్డీ చిప్
పాకిస్తానీ ఓటరు గుర్తింపు కార్డులు, కరాచీలో తయారు చేసిన చాక్లెట్లు, బయోమెట్రిక్ రికార్డులతో కూడిన మైక్రో-ఎస్డీ చిప్ స్వాధీనం చేసుకోవడంతో జూలై 28న ఆపరేషన్ మహాదేవ్‌లో మరణించిన ముగ్గురు లష్కర్ ఉగ్రవాదులు పాకిస్తాన్‌కు చెందినవారని తేలింది. అంతేకాకుండా, పహల్గామ్ దాడి ప్రదేశంలో లభించిన షెల్ కేసింగ్‌ల బాలిస్టిక్ విశ్లేషణ కూడా ఉగ్రవాదుల నుండి స్వాధీనం చేసుకున్న ఏకే-103 రైఫిల్స్‌పై ఉన్న స్ట్రైయేషన్ మార్కులతో సరిపోలింది.
ఏప్రిల్ 22న 26 మంది పౌరులను బలిగొన్న మారణహోమం వెనుక ఈ ముగ్గురి హస్తం ఉందనే విషయంలో ఎటువంటి సందేహం లేదు. ఇటీవల భద్రతా సంస్థలు విడుదల చేసిన ఎన్‌కౌంటర్ తర్వాత ఆధారాల నుండి ఈ ఫలితాలు వెలువడ్డాయి. పహల్గామ్ దాడి జరిగిన దాదాపు మూడు నెలల తర్వాత, జూలై 28న శ్రీనగర్‌లోని దచిగామ్ ప్రాంతంలో ఆపరేషన్ మహాదేవ్‌లో భద్రతా దళాలు ఆ ఉగ్రవాద ముగ్గురిని మట్టుబెట్టాయి.
భద్రతా సంస్థలు విడుదల చేసిన నివేదికలో సులేమాన్ షా పహల్గామ్ దాడికి ప్రధాన సూత్రధారి, ప్రధాన షూటర్‌గా గుర్తించారు. అబూ హమ్జా “ఆఫ్ఘని” రెండవ తుపాకీదారుడు కాగా, యాసిర్, అలియాస్ జిబ్రాన్, మూడవ తుపాకీదారుడు. పాకిస్తాన్ ఎన్నికల సంఘం జారీ చేసిన రెండు లామినేట్ చేసిన ఓటరు ఐడి స్లిప్‌లను సులేమాన్ షా, అబూ హమ్జా మృతదేహాల నుండి స్వాధీనం చేసుకున్నారు.
లాహోర్ (ఎన్ఏ-125), గుజ్రాన్‌వాలా (ఎన్ఏ-79)లోని ఓటర్ల జాబితాలో వరుసగా ఓటరు సీరియల్ నంబర్లు కనుగొన్నారు. మరింత సాంకేతిక పురోగతిలో, దెబ్బతిన్న ఉపగ్రహ ఫోన్ నుండి స్వాధీనం చేసుకున్న మైక్రో-ఎస్డీ కార్డులో ముగ్గురు వ్యక్తుల ఎన్ఏడిఆర్ (పాకిస్తాన్ జాతీయ పౌర రిజిస్ట్రీ) బయోమెట్రిక్ రికార్డులు ఉన్నాయి. ఇది వారి పాకిస్తాన్ పౌరసత్వాన్ని నిర్ధారిస్తుంది.
కోల్పోయిన డేటాలో వేలిముద్రలు, ముఖ టెంప్లేట్‌లు, కుటుంబ వృక్ష రికార్డులు ఉన్నాయి. వారి నమోదిత చిరునామాలు పాకిస్తాన్ ఆక్రమిత కాశ్మీర్ (పీఓకే)లోని రావాలాకోట్ సమీపంలోని చంగా మాంగా (కసూర్ జిల్లా), కోయియాన్ గ్రామంలో ఉన్నాయి. అంతేకాకుండా, హతమైన ఉగ్రవాదుల వస్తువులలో ‘కాండీల్యాండ్’ , ‘చోకోమాక్స్’ చాక్లెట్‌ల (రెండు బ్రాండ్‌లు కరాచీలో ఉత్పత్తి చేసినవి) రేపర్లు కనుగిన్నారు. ఇది వారి పాకిస్తాన్ సంబంధాలను మరింతగా నిర్ధారిస్తుంది.
ఏప్రిల్ 22న విహారయాత్రకు వెళ్లి సుందరమైన బైసరన్ లోయ అందాలను ఆస్వాదిస్తున్న అమాయక పర్యాటకులను చంపిన ఉగ్రవాదులు ఈ ముగ్గురేనని ఫోరెన్సిక్, బాలిస్టిక్ విశ్లేషణలు మరింత నిర్ధారించాయి. బైసరన్ దాడి ప్రదేశంలో లభించిన 7.62×39 ఎంఎం షెల్ కేసింగ్‌ల విశ్లేషణ ఉగ్రవాదుల నుండి స్వాధీనం చేసుకున్న మూడు ఏకే-103 రైఫిల్స్‌పై ఉన్న గీత గుర్తులతో సరిపోలింది.
అంతేకాకుండా, పహల్గామ్‌లో చిరిగిన చొక్కాపై లభించిన రక్తం నుండి సేకరించిన మైటోకాన్డ్రియల్ ప్రొఫైల్‌లు దచిగామ్‌లో స్వాధీనం చేసుకున్న మూడు మృతదేహాల డీఎన్ఏకి సమానంగా ఉన్నాయి. ఉగ్రవాదుల కదలికను నిఘా సంస్థలు కూడా గుర్తించాయి. ఈ ముగ్గురూ మే 2022లో గురేజ్ సెక్టార్ సమీపంలో నియంత్రణ రేఖ (ఎల్ఓసి) దాటారు. పాకిస్తాన్ వైపు నుండి వారి మొదటి రేడియో చెక్-ఇన్‌ను నిఘా సంస్థలు అడ్డుకున్న తర్వాత ఇది నిర్ధారించచారు.
ఏప్రిల్ 21, 2025న, ఉగ్రవాదులు బైసరన్ నుండి 2 కి.మీ దూరంలో ఉన్న హిల్ పార్క్ వద్ద ఉన్న సీజనల్ గుడిసెలోకి (స్థానిక పరిభాషలో ధోక్ అని పిలుస్తారు) వెళ్లారు. దీనిని ఇద్దరు కాశ్మీరీ స్థానికులు పర్వైజ్, బషీర్ అహ్మద్ ధృవీకరించారు. వారు రాత్రిపూట వారికి ఆశ్రయం కల్పించి, వండిన భోజనం అందించినట్లు అంగీకరించారు. ఏప్రిల్ 22న, ఉగ్రవాదులు బైసారన్ గడ్డి మైదానానికి నడిచి, మధ్యాహ్నం 2.30 గంటలకు దాడి చేసి, ఈశాన్య దిశగా దచిగామ్ దట్టమైన అడవి వైపు పారిపోయారు. సులేమాన్ షా గార్మిన్ వాచ్ నుండి స్వాధీనం చేసుకున్న జిపిఎస్ కోఆర్డినేట్‌లు ప్రత్యక్ష సాక్షులు నివేదించిన ఖచ్చితమైన కాల్పుల స్థానాలకు సరిపోలుతున్నాయి.
More Stories
చిత్తూర్ మేయర్ దంపతుల హత్య కేసులో ఐదుగురికి ఉరిశిక్ష
భగవద్గీతపై టిటిడి ఎమ్మెల్యే వివాదాస్పద వ్యాఖ్యల దుమారం
యమునా నదిని పరిశుభ్రం చేయడం అసాధ్యం కాదు!