‘కిరానా హిల్స్’లో అణుధార్మికత లీకేజీపై నోరు మెదపని పాక్!

పాకిస్థాన్ అణు స్థావరం అని చెబుతున్న కిరానా హిల్స్లో అణుధార్మికత లీకేజీ అంశం ఇప్పుడు అంతర్జాతీయ స్థాయిలో చర్చనీయాంశంగా మారింది. సోషల్ మీడియాలోనూ ట్రెండింగ్ అవుతుంది. తాజాగా కిరానా హిల్స్ లో ఎలాంటి లీకేజీ జరగలేదని ‘ఇంటర్నేషనల్ అటామిక్ ఎనర్జీ ఎమర్జెన్స (ఐఏఈఏ) చెబుతోంది. అదే నిజమైతే, అణుధార్మికత లీకేజీ కాకుంటే అమెరికా నుంచి న్యూక్లియర్ ఎమర్జెన్సీ విమానం ఎందుకొచ్చింది? 

ఈజిప్టు నుంచి రేడియేషన్ ను కట్టిడి చేయడానికి ఉపయోగించే బోరాన్తో మరో విమానం పాక్ గగనతలంలోకి ఎందుకు రావాల్సి వచ్చింది? అసలు కిరానా హిల్స్ పై వస్తున్న వార్తలపై పాకిస్తాన్ ఎందుకు మౌనం పాటిస్తోంది? దాయాది దేశం కిరానా హిల్స్ విషయంలో ఏమైనా దాచిపెడుతుందా? అనే అనుమానాలు కలుగుతున్నాయి. పాకిస్థాన్ సర్గోదా జిల్లాలోని కిరానా హిల్స్ లో  అణు దాడులకు ఉపయోగించే టాక్టికల్ న్యూక్లియర్ వార్హెడ్లను ఉంచినట్లు వార్తలు వచ్చాయి.

దీనికి దాదాపు 20 కిలోమీటర్ల దూరంలోనే ముసఫ్ ఎయిర్ బేస్ ఉంది. భారత్ దాడి చేసిన ఎయిర్ బేస్ లలో ఇది ఒకటి. ఇక్కడి నుంచి కిలారీ హిల్స్ కు కనెక్షన్ ఉందని అంటున్నారు. దీంతో ఇక్కడే వార్హెడ్లకు నష్టం జరిగి రేడియోయాక్టివ్ రిలీజ్ అయ్యి ఉండొచ్చని విశ్లేషణలు వెలువడుతున్నాయి.  భారత్ దాడి చేసిన 11 వైమానిక స్థావరాలు (నూర్ఖాన్, రఫీకి, సుక్కుర్, సియాల్కోట్, మురిద్, పర్సుర్, చునియన్, స్కర్దు, భొలారి, జకోబాబాద్, సర్గోదా) రావల్పిండి సమీపంలోని నూర్ఖాన్ ఎయిర్బేస్ కూడా ఒకటి.

ఇక్కడే భారీ విధ్వంసం సృష్టించే అణు దాడులు చేసే స్ట్రాటజిక్ న్యూక్లియర్ వార్హెడ్లను పాక్ నిల్వచేసిందని అంతర్జాతీయ మీడియా కథనాలు వెలవరించింది. ఈ నేపథ్యంలో ఇక్కడ అణుధార్మికత వెలువడి ఉండవచ్చన్నది ఆ కథనాల సారాంశం. అమెరికాకు చెందిన సీఐఏ మాజీ అధికారి డెరెక్ గ్రాస్మన్ కూడా ఈ వాదనను బలపర్చారు. పాకిస్తాన్ లోని ఎయిర్ బేస్ లపై భారత్ దాడి చేసిన తర్వాత అమెరికా డిపార్ట్మెంట్ ఆఫ్ ఎనర్జీకి చెందిన న్యూక్లియర్ ఎమర్జెన్సీ సపోర్ట్ ఎయిర్క్రాఫ్ట్ బి350 ఎంఎంఎస్ పాక్ గగనతలంలోకి వచ్చినట్లు పలు అంతర్జాతీయ వార్తా సంస్థలు కథనాలు ప్రచురించాయి. ఈ విమానం ద్వారా రేడియోధార్మిక యాక్టివిటీని అంచనా వేస్తారు. 

అణు కర్మాగార ప్రమాదాల తర్వాత రేడియేషన్ లీక్‌లను పర్యవేక్షించడం, రేడియోలాజికల్ సంఘటనల సమయంలో అత్యవసర సేవలకు ఈ విమానాన్ని మోహరిస్తారు. అందుకే దీనిని ‘రేడియేషన్ స్నిప్పర్’ అని కూడా అంటారు. ఫ్లైట్ ట్రాకింగ్ సంస్థ ‘ఫ్లైట్ రాడార్ 24’లో ట్రాక్ చేసిన వివరాల ప్రకారం ఈ విమానం పాక్ గగనతలంలో ప్రయాణించినట్లు చూపిస్తుంది. 

వాస్తవానికి అమెరికాకు చెందిన ఈ విమానాన్ని 2010లో పాకిస్థాన్ ఆర్మీ ఏవియేషన్‌కు అమెరికా అప్పగించినట్లు అంతర్జాతీయ మీడియా రాసుకొచ్చింది. ప్రస్తుతం ఆ విమానం పాకిస్థాన్ వద్దే ఉన్నది కాబట్టి భారత్ ఎయిర్ బేస్ పై దాడి తర్వాత రేడియేషన్ లీక్ అయిందని పాక్ అనుమానించిందా? లేక ముందు జాగ్రత్త చర్యగా బి350 ఎంఎంఎస్ విమానాన్ని మోహరించిందా? అనే ప్రశ్న సోషల్ మీడియాను తొలుస్తోంది.