కెనడా ప్రధాని రేసు నుండి తప్పుకుంటున్నట్లు భారత సంతతికి చెందిన అనితా ఆనంద్ ప్రకటించారు. తాను లిబరల్‌ పార్టీ ఆఫ్‌ కెనడా తదుపరి నాయకుడి రేసు నుండి వైదొలుగుతున్నానని ఆదివారం ఆమె ఓ లేఖలో ప్రకటించారు. ఒక్విల్లే పార్లమెంటు ఎంపిగా తిరిగి ఎన్నికవ్వాలని కోరుకోవడం లేదని పేర్కొన్నారు. తదుపరి ఎన్నికల వరకు పబ్లిక్‌ ఆఫీస్‌ హోల్డర్‌గా తన బాధ్యతలను నిర్వర్తిస్తానని ఆ లేఖలో ప్రకటించారు.
దేశానికి, సమాజానికి అనేక రూపాల్లో సేవ చేయవచ్చు. తమ లిబరల్‌ పార్టీ కోసం, ఓక్విల్లే కోసం, అన్నిటికంటే కెనడా కోసం తాను ఇక్కడ ఉంటానని సోషల్‌ మీడియా ఎక్స్‌లో పేర్కొన్నారు. పార్లమెంట్‌ సభ్యురాలిగా లిబరల్‌ టీమ్‌లోకి తనను స్వాగతించినందుకు, కీలకమైన కేబినెట్‌ పోర్ట్‌ఫోలియోలను అప్పగించినందుకు ప్రధాని ట్రూడోకు హృదయపూర్వక కృతజ్ఞతలు తెలుపుతున్నట్టు ఆమె ప్రకటించారు.
కెనడా హౌస్‌ ఆఫ్‌ కామన్స్‌లో, తమకు ప్రాతినిథ్యం వహించడానికి తనను ఎంపిక చేసినందుకు ఓక్విల్లే ప్రజలకు కృతజ్ఞతలు తెలియజేస్తున్నానని ఆమె తెలిపారు. అధికార లిబరల్‌ పార్టీ కొత్త నేతను ఎన్నుకున్న తర్వాత కెనడా ప్రధాని పదవికి రాజీనామా చేస్తానని జస్టిన్‌ ట్రూడో ప్రకటించడంతో ప్రధాని రేసులో అనితా ఆనంద్ పేరు తెరపైకి వచ్చిన సంగతి తెలిసిందే. ప్రస్తుతం ఆమె కెనడా రవాణా శాఖ మంత్రిగా బాధ్యతలు నిర్వర్తిస్తున్నారు.
More Stories
పీఓకేలో నిరసనలకు దిగివచ్చిన పాక్ ప్రభుత్వం
బ్రిటన్ ప్రధాని కీర్ స్టార్మెర్ 8,9 తేదీల్లో భారత పర్యటన
‘సామాజిక భద్రతలో విశిష్ట కృషి’కి ఐఎస్ఎస్ఏ పురస్కారం-2025