మందుపాత‌ర పేలి ఎనిమిది మంది జ‌వాన్లు మృతి

దాడికి గురైన బస్సులోని సిబ్బంది దంతెవాడ, నారాయణ్​పుర్​, బీజాపుర్​లో యాంటీ నక్సలైట్ అపరేషన్ పూర్తి చేసుకుని బేస్​ క్యాంప్​నకు తిరుగుప్రయాణమయ్యారు. భద్రతా బలగాల కాన్వాయ్​ బీజాపుర్​లోని కుట్​రూ హరదారిపై వెళుతున్న క్రమంలో అంబేలీ గ్రామం వద్ద మావోయిస్టులు ఐఈడీ పేల్చేశారు. 

భారీ పేలుడు ధాటికి కాన్వాయ్​లోని ఓ వాహనం చెల్లాచెదురుగా పడిపోయింది. దీంతో ప్రాణనష్టం ఎక్కువగా జరిగింది. పేలుడు జరిగిన ప్రాంతంలో పెద్ద గుంత ఏర్పడింది. దీనిపై సమాచారం అందుకున్న వెంటనే సహాయక చర్యల కోసం ఘటనాస్థలికి రీఇన్​ఫోర్స్​మెంట్​ టీమ్స్​ను పంపించినట్లు ఐజీ సుందర్​రాజ్ తెలిపారు. 

ఇదిలా ఉండగా, గత రెండేళ్లలో భద్రతా సిబ్బందిపై నక్సలైట్లు జరిగిన అతిపెద్ద దాడి ఇదేనని ఓ అధికారి వెల్లడించారు.  అయితే కూంబింగ్ త‌ర్వాత తిరిగి వెళ్తున్న జ‌వాన్ల వాహ‌నాన్ని ల‌క్ష్యంగా చేసుకుని పేలుళ్ల‌కు పాల్ప‌డిన‌ట్లు పోలీసులు తెలిపారు. పేలుడు జ‌రిగిన ప‌రిస‌ర ప్రాంతాల్లో పోలీసులు కూంబింగ్ చేప‌ట్టారు. భారీ బందోబ‌స్తు ఏర్పాటు చేశారు. మావోయిస్టుల చేసిన ఈ దాడిపై ఛత్తీస్​గఢ్ ముఖ్యమంత్రి విష్ణు దేవ్​ సాయ్ తీవ్రంగా స్పందించారు.

 “బీజాపుర్​లో నక్సలైట్లు జరిపిన దాడిలో 8 మంది జవాన్లు వీరమరణ పొందారనే వార్త చాలా బాధాకరం. అమరుల కుటుంబాలకు నా ప్రగాఢ సానుభూతి. అమరులైన జవాన్ల ఆత్మలకు శాంతి చేకూరాలని కోరుకుంటున్నాను. బస్తర్​లో జరుగుతున్న నక్సల్స్​ నిర్మూలన చర్యలపై నక్సలైట్లు విసుగు చెందుతున్నారు. అందుకే ఈ పిరికిపంద చర్యలకు పాల్పడుతున్నారు. జవాన్ల బలిదానం వృథా కాదు, నక్సలిజాన్ని అంతం చేసేందుకు మా పోరాటం బలంగా కొనసాగుతుంది” అని ఛత్తీస్‌గఢ్ సీఎం విష్ణు దేవ్ ఎక్స్​లో పోస్ట్ చేశారు.