సిరియాలో ముగిసిన అధ్యక్షుడు అసద్‌ శకం

సిరియాలో అధ్యక్షుడు అసద్‌ శకం ముగిసినట్లే కనిపిస్తోంది. రాజధాని డెమాస్కస్‌ సైతం తిరుగుబాటుదారు వశమైంది.  తిరుగుబాటుదారులు పాలనా దళాల నుండి తక్కువ ప్రతిఘటనతో నగరంలోకి ప్రవేశించిన తరువాత రాజధాని డమాస్కస్‌ను “విముక్తి పొందింది” అని ప్రకటించారు. డమాస్కస్‌లోని ప్రధాన కూడలిలో వేలాది మంది గుమిగూడి ‘స్వేచ్ఛ’ అంటూ నినాదాలు చేస్తున్న దృశ్యాలు సోషల్‌మీడియాలో వైరల్‌గా మారాయి.

మావారిని విడిపించి, వారి బానిస గొలుసులను తెంపి, సెడ్నాయా జైలులో అన్యాయంగా వారిని బంధించిన ‘బానిస యుగం’ ముగిసిందన్న వార్తను సిరియన్‌ ప్రజలతో పంచుకుంటామని రెబల్స్‌ పేర్కొన్నారు. డమాస్కస్‌లో తుపాకీ కాల్పుల శబ్దం వినిపించిందని, కాల్పులకు గల కారణం తెలియలేదని స్థానికులు తెలిపారు.

అధ్యక్షుడు బషర్ అల్-అస్సాద్ రాజధాని నుండి పారిపోయారని, దశాబ్దాలుగా అధికారంపై తన పట్టును కోల్పోయారని పేర్కొన్నారు. “డమాస్కస్ విముక్తి పొందింది. నిరంకుశ బషర్ అల్-అస్సాద్ పడగొట్టబడ్డాడు. పాలన జైళ్లలో అణచివేతకు గురైన ఖైదీలు విడుదల చేయబడ్డారు” అని ఒక ప్రతినిధి ఆదివారం రాష్ట్ర టెలివిజన్‌లో ఒక ప్రకటనను చదివి వినిపించారు.

 “స్వేచ్ఛ సిరియాలోని అన్ని ఆస్తులను రక్షించమని మేము ప్రజలను, యోధులను అడుగుతున్నాము… అన్ని వర్గాల సిరియన్లందరికీ సిరియా స్వేచ్ఛగా జీవించండి,” అన్నారాయన. ఆదివారం తెల్లవారుజామున అసద్‌ దేశాన్ని విడిచి పారిపోయారు. మరోవైపు ప్రతిపక్షాలకు ప్రభుత్వాన్ని అప్పగించేందుకు సిద్ధంగా ఉన్నట్లు ప్రధాని మహమ్మద్ ఘాజీ జలాలీ పేర్కొన్నారు. దీంతో సిరియాలో కొత్త అధ్యాయం ప్రారంభమైందని రెబల్స్‌ చెబుతున్నారు.

కాగా, సిరియా సంక్షోభంపై ఆ దేశ ప్రధాని మహమ్మద్ ఘాజీ జలాలీ స్పందిస్తూ ప్రతిపక్షాలకు ప్రభుత్వాన్ని అప్పగించేందుకు సిద్ధంగా ఉన్నామని వీడియో సందేశంలో చెప్పారు. ప్రతిపక్షాలకు విధులను బదిలీ చేయడానికి ప్రభుత్వం అన్ని విధాలా సిద్ధంగా ఉందని తెలిపారు. ‘నేను నా ఇంట్లో ఉన్నాను. దేశం విడిచిపెట్టలేదు. సిరియాకు చెందినవాడిని నేను. అందుకే ఈ దేశం విడిచిపెట్టను. దయచేసి తిరుగుబాటుదారులు ప్రజా ఆస్తులను ధ్వంసం చేయొద్దు’ అని ఘాజీ జలాలీ వ్యాఖ్యానించారు.

సిరియా రాజధాని డమాస్కస్​ను తిరుగుబాటుదారులు అధీనంలోకి తీసుకోవడం వల్ల అధ్యక్షుడు అసద్ తన కుటుంబంతో కలిసి దేశాన్ని విడిచివెళ్లారని వార్తలు వస్తున్నాయి. దీంతో అసద్ నేతృత్వంలోని ప్రభుత్వం కుప్పకూలినట్లు కనిపిస్తుంది. అసద్ నిష్క్రమణతో సిరియాలో 54 ఏళ్ల ఆయన కుటుంబ పాలనకు తెరపడినట్లవుతుంది.

అసద్ తండ్రి హఫీజ్ 1970లో సిరియాలో ప్రభుత్వంపై తిరుగుబావుటా ఎగురవేసి అధికారంలోకి వచ్చారు. ఆయన మరణించేంతవరకు (2000) సిరియాను పాలించారు. ఆ తర్వాత అసద్ సిరియా పగ్గాలు అందుకున్నారు. తాజాగా తిరుగుబాటుదారులు దేశ రాజధానిని అధీనంలోకి తీసుకోవడం వల్ల సిరియాను వీడినట్లు తెలుస్తుంది.

డమాస్కస్​లో కాల్పుల జరపొద్దని తిరుగుబాటు దళం హయాత్‌ తహరీర్‌ అల్‌- షామ్‌ (హెచ్‌టీఎస్‌) నేత అబూ మహమ్మద్ అల్ గోలానీ తెలిపారు. ప్రభుత్వ సంస్థలను తమకు అధికారికంగా అప్పగించేవరకు ప్రధానమంత్రి పర్యవేక్షణలోనే ఉంటాయని స్పష్టం చేశారు. సిరియా ప్రధాన మంత్రి మహమ్మద్ ఘాజీ జలాలీ ప్రతిపక్షాలకు ప్రభుత్వాన్ని అప్పగించేందుకు సిద్ధమని ప్రకటించిన నేపథ్యంలో తిరుగుబాటు నేత ఈ వ్యాఖ్యలు చేయడం ప్రాధాన్యం సంతరించుకుంది.

అసద్ పాలన నుంచి డమాస్కస్ విముక్తి పొందిందని సిరియా ప్రతిపక్ష నాయకుడొకరు తెలిపారు. చీకటి కాలంపోయి సిరియాలో కొత్త శకం ప్రారంభమైందని పేర్కొన్నారు. మరోవైపు, డమాస్కస్​లో తిరుగుబాటుదారులు సంబరాలు చేసుకుంటున్నారు. గాల్లోకి తుపాకులు కాల్చి వేడుకలు చేసుకున్నారు. సెంట్రల్ స్క్వేర్స్‌ వద్ద అసద్‌కు వ్యతిరేకంగా నినాదాలు చేశారు. కారు హారన్లు మోగిస్తూ సంబరాలు చేసుకుంటున్నారు. అసద్ నేరస్థుడని, నిరంకుశత్వం కలిగి వ్యక్తి అని నినాదాలతో హోరెత్తిస్తున్నారు.