బంగ్లాదేశ్‌లోని ఛటోగ్రామ్ నగరంలో శుక్రవారం హిందూ మతానికి వ్యతిరేకంగా నినాదాలు చేస్తూ ఇస్లామిక్ ఛాందసవాద గ్రూపులు మూడు హిందూ దేవాలయాలు, సంతానేశ్వరి మాతృ దేవాలయం, శని ఆలయం,సంతానేశ్వరి కాళీ ఆలయంపై ధ్వంసం చేసి ఇటుకబట్టీలు విసిరారు. దేవాలయాల ద్వారాలు, కట్టడాలను బద్దలు కొట్టారు.
ఛటోగ్రామ్‌లోని ఠాకూర్‌గావ్, కొత్వాలి, టైగర్ పాస్ ప్రాంతాలలో ఇస్లామిక్ జిహాదీలు హిందువుల దుకాణాలు, ఇళ్లపై దాడి చేశారు. వారు హిందువులను కొట్టారు. కాని పోలీసులు మూగ ప్రేక్షకులుగా ఉండిపోయారు. అనంతరం శాంతిభద్రతల పరిరక్షణకు సైన్యాన్ని మోహరించారు. ఢాకాలో, ఇస్కాన్‌ను నిషేధించాలని డిమాండ్ చేస్తూ వేలాది మంది జిహాదీలు వీధుల్లోకి వచ్చారు. హెఫాజాత్-ఏ-ఇస్లాం, హిజ్బుత్ తహ్రీర్, జమాతే ఇస్లామీ ఆధ్వర్యంలో ర్యాలీ నిర్వహించారు. జుమ్మా ప్రార్థనల అనంతరం అతి పెద్ద మసీదు బైతుల్ ముఖర్రం నుంచి ర్యాలీ ప్రారంభమైంది.
మరోవైపు బంగ్లాదేశ్ ప్రభుత్వ ఫైనాన్షియల్ ఇంటెలిజెన్స్ యూనిట్ 17 మంది బ్యాంకు ఖాతాలను 30 రోజుల పాటు స్తంభింపజేసింది. వీరిలో జైలు శిక్ష అనుభవిస్తున్న సన్యాసి చిన్మోయ్ కృష్ణ దాస్ కూడా ఉన్నారు, వీరంతా ఇస్కాన్‌తో సంబంధం కలిగి ఉన్నారు. కోల్‌కతాలో, ఇస్కాన్ వైస్ ప్రెసిడెంట్ రాధా రామన్ దాస్ మాట్లాడుతూ, వారి దుస్తులలో సభ్యులు తమ రోజువారీ అవసరాలను చూసుకోవడంలో సమస్యలను ఎదుర్కొంటున్నారని తెలిపారు. ఈ పరిణామాలు సహజంగానే పొరుగున ఉన్న పశ్చిమ బెంగాల్‌లో ప్రభావం చూపాయి.
కోల్‌కతాలో, ఇండియన్ సెక్యులర్ ఫ్రంట్ కార్యకర్తలు హిందువులపై అఘాయిత్యాలను ఆపాలని డిమాండ్ చేస్తూ బంగ్లాదేశ్ డిప్యూటీ హైకమిషన్ వెలుపల నిరసన చేపట్టారు. ఇండియన్ సెక్యులర్ ఫ్రంట్‌కు ఫుర్ఫురా షరీఫ్ పుణ్యక్షేత్రానికి చెందిన మౌలానా అబ్బాస్ సిద్ధిఖీ నాయకత్వం వహిస్తున్నారు. విశ్వహిందూ పరిషత్ మద్దతుదారులందరూ కోల్‌కతాలో నిరసనలు చేపట్టారు.
మరోవంక, పశ్చిమ బెంగాల్ లో పలువురు వైద్యులు బంగ్లాదేశ్ లో హిందువులపై జరుగుతున్న దాడులకు నిరసనగా ఆ దేశ పౌరులకు చికిత్స అందించేందుకు నిరాకరిస్తున్నారు. బంగ్లాదేశ్ ప్రభుత్వ ప్రేక్షక పాత్ర పట్ల సర్వత్రా ఆగ్రవేశాలు వ్యక్తం అవుతున్నాయి. ఇస్కాన్‌కు చెందిన హిందూ పూజారులు, సభ్యులను అరెస్టు చేస్తుండటంతో ఎప్పుడు ఏం జరుగుతుందోనని మైనార్టీలు భయాందోళనలు వ్యక్తం చేస్తున్నారు.
ఈ నేపథ్యంలో భారత్‌కు బయల్దేరిన ఇస్కాన్ సభ్యులు 63 మందిని బంగ్లాదేశ్ ఇమిగ్రేషన్‌ అధికారులు అడ్డుకున్నారు. సరైన ధ్రువపత్రాలు ఉన్నప్పటికీ బెనాపోల్‌ సరిహద్దు చెక్‌పోస్టు వద్ద వారిని నిలిపివేశారు. అనుమానాస్పదంగా ప్రయాణిస్తున్నారే కారణంతో వారిని దేశం వీడేందుకు అనుమతించలేదని స్థానిక మీడియా వెల్లడించింది. ఉన్నతాధికారుల సూచన మేరకే అడ్డుకున్నట్లు పేర్కొంది.
హౌస్ ఆఫ్ కామన్స్‌లో, బ్రిటిష్ కన్జర్వేటివ్ పార్టీ ఎంపీ బాబ్ బ్లాక్‌మన్ యుకె ప్రభుత్వం జోక్యం చేసుకోవాలని డిమాండ్ చేశారు. ఇస్కాన్‌లోని అమాయక శాంతికాముక సభ్యులను ఇస్లామిక్ జిహాదీలు లక్ష్యంగా చేసుకుంటున్నారని, హిందువులు దౌర్జన్యాలకు గురవుతున్నారని ఆయన ఆరోపించారు. వారి ఆస్తులు దోచుకుంటున్నారని, దీనికి ముగింపు పలకాలని ఆయన స్పష్టం చేశారు.
హిందువులు, ఇతర మైనారిటీలకు రక్షణ కల్పించేందుకు భారత ప్రభుత్వం బంగ్లాదేశ్ అధికారులతో మాట్లాడిందని భారత పార్లమెంటులో విదేశాంగ మంత్రి ఎస్. జైశంకర్ వ్రాతపూర్వక సమాధానంలో తెలిపారు. ఎంఇఏ అధికార ప్రతినిధి రణధీర్ జైస్వాల్ మాట్లాడుతూ, బంగ్లాదేశ్‌లో ప్రధానమంత్రి షేక్ హసీనా పదవీచ్యుత తర్వాత జరిగిన పరిణామాలపై భారత ప్రభుత్వం ఆందోళన చెందుతోందని తెలిపారు. జైల్లో ఉన్న ఇస్కాన్ సన్యాసి చిన్మోయ్ దాస్‌కు బంగ్లాదేశ్ కోర్టులు న్యాయం చేస్తాయని ఆయన ఆశాభావం వ్యక్తం చేశారు.
బంగ్లాదేశ్‌లో హిందువులపై జరుగుతున్న అకృత్యాలను తక్షణమే ఆపాలని, ఇస్కాన్ సన్యాసి చిన్మోయ్ దాస్‌ను జైలు నుంచి విడుదల చేయాలని ఆర్‌ఎస్‌ఎస్ సర్కార్యవా దత్తాత్రేయ హోసబాలే శనివారం ఒక ప్రకటనలో డిమాండ్ చేశారు. హిందువులకు రక్షణ కల్పించేలా బంగ్లాదేశ్ ప్రభుత్వంపై ఒత్తిడి తీసుకురావడానికి ప్రపంచ అభిప్రాయాన్ని రేకెత్తించాలని హోసబాలే భారత ప్రభుత్వానికి విజ్ఞప్తి చేశారు.
బంగ్లాదేశ్‌లో నివసిస్తున్న హిందువుల స్థితిగతులపై భారత ప్రభుత్వం చాలా ఆందోళన చెందుతోందన్నది వాస్తవం. హోంమంత్రి అమిత్ షా, విదేశాంగ శాఖ మంత్రి ఎస్. జైశంకర్, జాతీయ భద్రతా సలహాదారు అజిత్ దోవల్‌ల మధ్య గురువారం ఉన్నత స్థాయి సమావేశం నిర్వహించి తీసుకోవాల్సిన చర్యలపై నిర్ణయం తీసుకున్నారు.
ఈ సమస్య పొరుగు దేశానికి సంబంధించినది కాబట్టి, బంగ్లాదేశ్ తాత్కాలిక ప్రభుత్వంపై ఒత్తిడి తెచ్చేందుకు దౌత్య మార్గాలను ఉపయోగిస్తున్నారు. సమస్య ఏమిటంటే తాత్కాలిక ప్రభుత్వానికి నేతృత్వం వహిస్తున్న మహ్మద్ యూనస్ ఇస్లామిక్ ఛాందసవాదుల నుండి తీవ్రమైన ఒత్తిడిని ఎదుర్కొంతున్నారు. వారికి భయపడుతున్నారు. పైగా, హిందువులపై జరుగుతున్న దాడులు మతపరమైనవి కావని, రాజకీయ ప్రేరేపితమైనవి అంటూ ఛాందసవాదులు మద్దతు ఇచ్చే విధంగా యూనస్ వ్యాఖ్యానించడం గమనార్హం.
షేక్ హసీనాను అధికారం నుండి దింపడానికి గుంపులు హింసకు పాల్పడిన తరువాత, ఇతర పార్టీలు, నాయకులు గుంపులకు భయపడటం ప్రారంభించారు. తాత్కాలిక ప్రభుత్వంపై పట్టు సాధించాక జమాతే ఇస్లామీ, హెఫాజాతే ఇస్లాం ఇప్పుడు హింసకు దిగుతున్నాయి. వారి కార్యకర్తలు పోలీసులకు లేదా సైన్యానికి భయపడరు. వారు బంగ్లాదేశ్ ప్రపంచ ఇమేజ్ గురించి పట్టించుకోరు.
బంగ్లాదేశ్‌లో హిందువులపై జరుగుతున్న అకృత్యాలను అరికట్టేందుకు తీవ్రమైన చర్యలు తప్పనిసరిగా స్పష్టం అవుతుంది. కేవలం దౌత్య మార్గాలనే కాకుండా అంతర్జాతీయంగా ప్రజాభిప్రాయాన్ని సమీకరించి అక్కడి ప్రభుత్వంపై వత్తిడి తేవలసి ఉంది. సరిహద్దుల్లో అవసరమైన జాగురత చర్యలు చేపట్టాల్సి ఉంది.
More Stories
అసోంలో బహుభార్యత్వం నిషేధం.. దోషులకు ఏడేళ్ల జైలు
జూబ్లీహిల్స్ విషయంలో మీడియా ఎక్కడ దారితప్పుతున్నదంటే.. !
ప్రముఖ కవి, రచయిత అందెశ్రీ కన్నుమూత