సుప్రీంకోర్టులో రెండవ అత్యంత సీనియర్ న్యాయమూర్తి జస్టిస్ సంజీవ్ ఖన్నాను తన వారసుడిగా పేర్కొంటూ భారత ప్రధాన న్యాయమూర్తి డి వై చంద్రచూడ్ న్యాయ మంత్రిత్వ శాఖకు లేఖ రాశారు. సంప్రదాయం ప్రకారం పదవీ విరమణ చేసే ప్రధాన న్యాయమూర్తి ఒక సీనియర్ న్యాయమూర్తిని ఉన్నత స్థానానికి సిఫార్సు చేస్తారు. ఈ సిఫార్సును కేంద్ర ప్రభుత్వం ఆమోదించాల్సి ఉంటుంది.
సీజేఐ చంద్రచూడ్ నవంబర్ 10న పదవీ విరమణ చేయనున్నారు. సంప్రదాయం ప్రకారం, తన వారసుడి పేరును కోరుతూ కేంద్ర ప్రభుత్వం గత వారం ఆయనకు లేఖ రాసింది. కేంద్ర ప్రభుత్వ ఆమోదం తర్వాత, జస్టిస్ ఖన్నా భారత 51వ ప్రధాన న్యాయమూర్తిగా నియమితులవుత్తారు. జస్టిస్ ఖన్నా ఆరు నెలల పదవీకాలం ఉంటుంది. మే 13, 2025న పదవీ విరమణ చేయనున్నారు.
జస్టిస్ సంజీవ్ ఖన్నా 1983లో ఢిల్లీ బార్ కౌన్సిల్‌లో న్యాయవాదిగా నమోదు చేసుకున్న తర్వాత న్యాయవాద వృత్తిని ప్రారంభించారు. ఢిల్లీ హైకోర్టు, వివిధ ట్రిబ్యునల్‌లకు వెళ్లడానికి ముందు మొదట్లో తీస్ హజారీ కాంప్లెక్స్‌లోని జిల్లా కోర్టులలో ప్రాక్టీస్ చేశాడు. 2004 నుండి ఆదాయపు పన్ను శాఖకు సీనియర్ స్టాండింగ్ కౌన్సెల్‌గా, ఢిల్లీ నేషనల్ క్యాపిటల్ టెరిటరీకి స్టాండింగ్ కౌన్సెల్‌గా పనిచేసిన అనుభవం ఉంది.
జస్టిస్ సంజీవ్ ఖన్నా ప్రస్తుతం నేషనల్ లీగల్ సర్వీసెస్ అథారిటీకి ఎగ్జిక్యూటివ్ ఛైర్మన్‌గా ఉన్నారు. భోపాల్‌లోని నేషనల్ జ్యుడీషియల్ అకాడమీ గవర్నింగ్ కౌన్సెల్ సభ్యుడు. సంవత్సరాలుగా, జస్టిస్ ఖన్నా ఢిల్లీ జ్యుడీషియల్ అకాడమీ, ఢిల్లీ ఇంటర్నేషనల్ ఆర్బిట్రేషన్ సెంటర్ ఛైర్మన్‌తో సహా అనేక ప్రతిష్టాత్మక పదవులను నిర్వహించారు. 2005లో ఢిల్లీ హైకోర్టు అదనపు న్యాయమూర్తిగా నియమితులైన ఆయన మరుసటి ఏడాది శాశ్వత న్యాయమూర్తి అయ్యారు. 2019 జనవరిలో ఆయన సుప్రీంకోర్టుకు ఎదిగారు. జస్టిస్ ఖన్నా అనేక ముఖ్యమైన తీర్పులలో భాగమయ్యారు. సెంట్రల్ విస్టా ప్రాజెక్ట్‌కు ఆమోదం తెలిపిన బెంచ్‌లో భాగం.
ఢిల్లీ ఎక్సైజ్ పాలసీ కేసుకు సంబంధించి ఎన్‌ఫోర్స్‌మెంట్ డైరెక్టరేట్ కేసులో ఢిల్లీ మాజీ ముఖ్యమంత్రి అరవింద్ కేజ్రీవాల్‌కు ఆయన నేతృత్వంలోని ధర్మాసనం మధ్యంతర బెయిల్ ఇచ్చింది. రాజ్యాంగంలోని ఆర్టికల్ 370 రద్దును సమర్థించిన రాజ్యాంగ ధర్మాసనంలో జస్టిస్ ఖన్నా కూడా భాగమయ్యారు. 2018 ఎలక్టోరల్ బాండ్స్ స్కీమ్‌ను కొట్టివేసిన బెంచ్‌లో ఆయన కూడా సభ్యుడు.
More Stories
జార్జ్ సోరోస్ నిధులు సమకూర్చే సంస్థతో సోనియా!
సరిహద్దు భద్రతకు డ్రోన్ వ్యతిరేక విభాగం
ప్రతిపక్షాలు ప్రజాతీర్పును స్వాగతించాలి