నీట్‌ యూజీ 2024 పేపర్ లీక్ కేస్ దేశవ్యాప్తంగా తీవ్ర వివాదస్పదమైన సంగతి తెలిసిందే. అయితే తాజాగా ఈ కేసును దర్యాప్తులో భాగంగా సీబీఐ కీలక విషయాలను గుర్తించింది. ఈ వ్యవహారంలో పరీక్షకు కొన్ని గంటల ముందు మొత్తంగా 144 మంది అభ్యర్థులు ప్రశ్నాపత్రాన్ని అందుకున్నారని సీబీఐ గుర్తించింది. వీరంతా ల్రీకేజీ సూత్రధారులకు డబ్బులు చెల్లించినట్లు పేర్కొంది.
ఈ కేసుకు సంబంధించి కేంద్ర దర్యాప్తు సంస్థ గత వారం మూడో ఛార్జ్‌ షీట్ను దాఖలు చేసింది. పరీక్ష జరగడానికి కొద్ది గంటల ముందు పంకజ్‌ కుమార్‌ అనే వ్యక్తి చేతుల మీదుగా నీట్‌ ప్రశ్నాపత్రం లీకైనట్లు సీబీఐ గుర్తించింది. ఝార్ఖండ్‌లోని హజారీబాగ్‌లోని ఒయాసిస్‌ స్కూల్‌ నుంచి ఈ ప్రశ్నా పత్రాలు లీక్ అయ్యాయి. ప్రిన్సిపల్‌, వైస్‌ ప్రిన్సిపల్‌ సహకారంతోనే పేపర్ బయటకు వచ్చినట్లు ఛార్జి షీట్‌లో సీబీఐ వెల్లడించింది.
నీట్‌ పరీక్ష జరిగిన రోజు మే 5న ఉదయం 8 గంటలకు ప్రశ్నా పత్రాలు పాఠశాలకు వచ్చాయి. ఆ సమయంలో పరీక్షా కేంద్రానికి కోఆర్డినేటర్‌గా ఉన్న హసనుల్‌ హక్‌, ఐఐటీ జెంషడ్‌పుర్‌కు చెందిన ఓ సివిల్‌ ఇంజినీర్‌ను ప్రశ్నాపత్రం బాక్స్ ఉన్న గదికి పంపించాడు. ప్రత్యేకమైన టూల్‌కిట్‌ సాయంతో అతడు ఆ పెట్టెను తెరిచాడు. ప్రశ్నా పత్రం మొత్తాన్ని ఫొటో తీసుకున్నాడు. అనంతరం దాన్ని యథావిధిగా పెట్టెలో పెట్టేసి సీల్‌ చేశాడు.
అక్కడి నుంచి బయటకు వచ్చిన తర్వాత ఆ వ్యక్తి క్వశ్చన్‌ పేపర్‌ను ఓ గెస్ట్‌హౌస్‌లో ఉన్న మరో వ్యక్తికి షేర్ చేశాడు. అక్కడే ఉన్న తొమ్మిది మంది వైద్య విద్యార్థులు కూడా ప్రశ్నాపత్రానికి సమాధానాలు పూర్తి చేశారు. వాటిని వివిధ ప్రాంతాల్లో ఉన్న తమ గ్యాంగ్‌ సభ్యులకు పంపించుకున్నారు. డబ్బులు చెల్లించిన అభ్యర్థులకు ఆ ప్రశ్నా పత్రాలను చేరవేసినట్లు సీబీఐ దర్యాప్తులో తేలింది. కాగా, ఈ పేపర్ లీకేజీ వ్యవహారం గురించి 298 మంది సాక్షులు, 290 డాక్యుమెంట్లు, 45 మార్గాల్లో లభించిన సమాచారం ఆధారంగా 5500 పేజీల ఛార్జ్‌ షీట్ను సీబీఐ రూపొందించింది.
More Stories
నేపాల్ అలజడులతో చిక్కుకున్న మానసరోవర్ యాత్రికులు
దేశవ్యాప్తంగా ఓటర్ల జాబితా సవరణకు కసరత్తు
భారత్‌- నేపాల్ సరిహద్దుల్లో హై అలర్ట్‌