హెచ్‌సీఏలో రూ. 20 కోట్ల మోసం.. అజారుద్దీన్‌కు ఈడీ స‌మ‌న్లు

నిధుల మళ్లింపు జరిగిందని భావించిన హెచ్‌సీఏ విచారణకు ఆదేశించింది. ఈ మేరకు ఫోరెన్సిక్ ఆడిట్ మార్చి 2020 నుంచి ఫిబ్రవరి 2023 వరకు దర్యాప్తు చేపట్టింది. నిధుల దుర్వినియోగం, ప్రైవేట్ ఏజెన్సీలకు నగదు మళ్లింపు జరిగినట్లు గుర్తించింది. దర్యాప్తు అనంతరం హెచ్‌సీఏ సీఈవో సునీల్ కాంటే బోస్ పోలీసులకు ఫిర్యాదు చేశారు.

ఏసీబీ న‌మోదు చేసిన మూడు ఎఫ్ఐఆర్‌ల ఆధారంగా ఈడీ విచార‌ణ మొద‌లుపెట్టింది. ఉప్ప‌ల్ స్టేడియం కోసం డీజీ సెట్లు, ఫైర్‌ఫైటింగ్ సిస్ట‌మ్స్‌, కెనోపీల ఖ‌రీదులో అక్ర‌మాలు జ‌రిగిన‌ట్లు ఆరోప‌ణ‌లు ఉన్నాయి. గ‌త ఏడాది అక్టోబ‌ర్‌లో అజారుద్దీన్‌పై నాలుగు క్రిమిన‌ల్ కేసులు న‌మోదు అయ్యాయి. సుమారు రూ. 3.85 కోట్ల నిధుల్ని దుర్వినియోగం చేసిన‌ట్లు ఆరోప‌ణ‌లు ఉన్నాయి. ఉప్ప‌ల్ పోలీసు స్టేష‌న్‌లో ఆ కేసులు బుక్ చేశారు. చీటింగ్‌, ఫోర్జ‌రీ, నేర‌పూరిత కుట్ర కింద అజార్‌పై కేసులు పెట్టారు. 

హెచ్‌సీఏకు చెందిన నాలుగు కేసుల్లోనూ గ‌తంలో సిటీ కోర్టు అజార్‌కు బెయిల్ మంజూరీ చేసింది. 2019లో హెచ్‌సీఏ అధ్య‌క్షుడిగా అజార్ ఎన్నిక‌య్యారు. ఆయ‌న 2023 ఫిబ్ర‌వ‌రి వ‌ర‌కు ఆ బాధ్య‌త‌లు నిర్వ‌ర్తించారు. కాగా, తనపై నమోదైన కేసును రాజకీయ ప్రేరేపిత కుట్రగా అజారుద్దీన్ అభివర్ణించారు. తన ప్రతిష్టను దెబ్బతీయడానికి ప్రత్యర్థులు కుట్రపన్నారని ఆరోపించారు. దీనిపై న్యాయపోరాటం చేస్తానని తెలిపారు.