* అర్చకుల వేతనం రూ.15 వేలకు పెంపు

ఆంధ్రప్రదేశ్‌లో బలవంతపు మత మార్పిళ్ల నిరోధంపై కఠినంగా వ్యవహరించాలని, హిందూ దేవాలయాల్లో ఇతర మతస్తులు ఉండకూడదని ముఖ్యమంత్రి చంద్రబాబునాయుడు స్పష్టం చేశారు. ఇకపై ఎక్కడా బలవంతపు మత మార్పిడులు ఉండకూడదని ఆ దిశగా దేవాదాయ శాఖ కార్యక్రమాలు అమలు చేయాలని ఆలయ అధికారులకు సూచనలు చేశారు. దేవాలయాల్లో భక్తుల మనోభావాలకు ప్రాధాన్యత ఇవ్వాలని, అపచారాలకు తావు లేకుండా అధ్యాత్మికతకు పెద్ద పీట వేయాలని అధికారులకు సూచించారు.

దేవాలయాల్లో పరిశుభ్రత, ప్రసాదంలో నాణ్యత, ప్రశాంత వాతావరణం కనిపించేలా చర్యలు చేపట్టాలని సూచించారు. రిలీజియస్ టూరిజం ప్రమోషన్ కోసం దేవాదాయ, ఫారెస్ట్, టూరిజం శాఖల మంత్రులతో కమిటీ వేయనున్నట్లు సీఎం చంద్రబాబు నాయుడు తెలిపారు.  ఆర్యవైశ్య సంఘాల కోరిక మేరకు వాసవీ కన్యకాపరమేశ్వరి అమ్మవారి ఆత్మార్పణ చేసుకున్న రోజును దేవాదాయ శాఖపరంగా గుర్తించి నిర్వహించేందుకు చంద్రబాబు నిర్ణయించారు.

దేవాలయాల ట్రస్ట్ బోర్డులో అదనంగా మరో ఇద్దరికి అవకాశం కల్పించనున్నామన్నారు. ఆలయ ఆదాయం రూ. 20 కోట్లు కంటే అధికంగా ఉంటే 15 మంది బోర్డు సభ్యులుగా ఉంటారు. దీన్ని 17కు పెంచనున్నారు.  ఇలా అన్ని ట్రస్ట్ బోర్డుల్లో ఇద్దరు చొప్పున అదనంగా సభ్యుల సంఖ్యను పెంచనున్నారు. ట్రస్ట్ బోర్డులో ఒక బ్రాహ్మణుడు, ఒక నాయీ బ్రాహ్మణుడు తప్పకుండా ఉండేలా చూస్తామని చంద్రబాబు ఎన్నికల సమయంలో హామీ ఇచ్చారు.

ఆ మేరకు సభ్యుల సంఖ్యను పెంచి వారికి అవకాశం కల్పించనున్నారు.  దేవాలయ ఆస్తుల పరిరక్షణకు కమిటీలను ఏర్పాటు చేయాలని, పరిశుభ్రత, ప్రసాదంలో నాణ్యత, ప్రశాంత వాతావరణం కనిపించేలా చర్యలు తీసుకోవాలని అధికారులకు సీఎం దిశానిర్దేశం చేశారు. అలాగే, సింహాచలం పంచగ్రామాల సమస్యకు శాశ్వత పరిష్కారం కోసం చర్యలు తీసుకోవాలని చెప్పారు.

ప్రతి దేవాలయంలో ఆన్​లైన్ విధానం అమలు చేయాలని, అన్ని సర్వీసులు ఆన్​లైన్ ద్వారా అందాలని సీఎం స్పష్టం చేశారు. గుడికి వచ్చే భక్తులు దర్శనం చేసుకుని వెళ్లడమే కాకుండా ప్రత్యేక పూజలు చేసుకునేందుకు అవకాశం కల్పించాలన్నారు. అవసరమైతే ప్రైవేటు సెక్టార్ భాగస్వామ్యంతో హోటళ్ల నిర్మాణం చేపట్టి భక్తులకు వసతులు కల్పించాలని సీఎం అన్నారు. ధనికులే కాకుండా సామాన్య, మధ్య తరగతి ప్రజలు కూడా బస చేసే పరిస్థితి ఉండాలని నిర్దేశించారు. గతంలో దేవాలయాల్లో జరిగిన పలు ఘటనలపై లోతుగా విచారణ జరపాలని ఆదేశించారు.