షేక్ హసీనా పాస్ పోర్టు రద్దు

బంగ్లాదేశ్ లోని తాత్కాలిక ప్రభుత్వం మాజీ ప్రధాని షేక్ హసీనాతో పాటు మాజీ ఎంపీల దౌత్య పాస్ పోర్టులను రద్దు చేసింది. ఈ విషయాన్ని బంగ్లా హోం మంత్రిత్వ శాఖ వెల్లడించింది. ఈ దౌత్య పాస్ పోర్టులు ఉన్నవారు కొన్ని నిర్దిష్ట దేశాలకు వీసా లేకుండా ప్రయాణించొచ్చు.

బంగ్లాదేశ్ లో రిజర్వేషన్లకు వ్యతిరేకంగా చెలరేగిన హింసాత్మక ఘటనలకు జడిసి షేఖ్ హసీనా ఆగస్టు 5 నుంచి భారత్ లో ఆశ్రయం పొందుతున్నారు. ఇప్పుడు బంగ్లాదేశ్ లో ముహమ్మద్ యూనుస్ సారథ్యంలో తాత్కాలిక పాలన కొనసాగుతున్నది. బంగ్లాదేశ్ లో ఇప్పుడున్న ప్రభుత్వమే దౌత్య పాస్ పోర్టులను రద్దు చేస్తూ నిర్ణయం తీసుకుంది.

భాగస్వామ్యులందరితో చర్చించిన అనంతరం హోంశాఖ ఈ నిర్ణయం తీసుకున్నట్లు సంబంధిత వర్గాలు తెలిపాయి. ఇప్పటికే దేశంలోని అన్ని ఇమ్మిగ్రేషన్‌ కౌంటర్లను అప్రమత్తం చేసినట్లు పేర్కొన్నాయి. త్వరలో అధికారిక ఆదేశాలను జారీ చేయనున్నట్లు ఆ వర్గాలు వెల్లడించాయి. భారత్‌కు వెళ్లేందుకు వినియోగించిన దౌత్య పాస్‌పోర్ట్‌ను ఇప్పుడు ప్రభుత్వం రద్దు చేసింది.