గాజాను అష్టదిగ్బంధనం చేసిన ఇజ్రాయెల్‌

ఎటునుంచి మృత్యువు వస్తుందో తెలియక చావు భయంతో నరకయాతన అనుభవిస్తున్నారు. గతంలో 2005-06లో తాత్కాలికంగా, 2007లో శాశ్వతంగా ఇలా గాజా దిగ్బంధంలో చిక్కుకుంది. ఇక, 2007లో గాజాను హస్తగతం చేసుకున్న నాటి నుంచి ఈ 15 ఏండ్లలో ఇజ్రాయెల్‌పై హమాస్‌ ఐదుసార్లు దాడులకు దిగింది.

గాజాలోని సుమారు 1000 ప్రాంతాలపై ఇజ్రాయెల్‌ దాడులు చేసింది. 159 ఇండ్లు, 1210 ఇతర నిర్మాణాలు కుప్పకూలాయి. దీంతో ఇప్పటికే గాజాలో లక్ష మందికి పైగా నిరాశ్రయులను సురక్షిత ప్రాంతాలకు తరలించారు. తిండి, నీరు లేకపోవడంతో వారంతా ఇబ్బందులు ఎదుర్కొంటున్నారు. 

మరోవైపు సరిహద్దులు దాటి ఇజ్రాయెల్‌లోకి చొచ్చుకొచ్చిన హమాస్‌ మిలిటెంట్లను ఐడీఎఫ్‌ దళాలు ఏరివేశాయి. సరిహద్దులను సైన్యం పటిష్ఠం చేసింది. రక్షణ కంచెల వద్ద యుద్ధ ట్యాంకులతో ఇజ్రాయెల్‌ దళాలు నిరంతరం పహారా కాస్తున్నాయి. అదనంగా 3 లక్షల మందిని ఇజ్రాయెల్‌ రంగంలోకి దించింది. ఇరువైపులా 1300 మందికి పైగా మరణించారు.

మెరుపుదాడి చేస్తూ ఇజ్రాయెల్‌లో ఊచకోతకు దిగిన హమాస్‌ మిలిటెంట్లను ఇజ్రాయెల్‌ మట్టుబెట్టింది. రాత్రికి రాత్రే 500 మంది మిలిటెంట్లను హతమార్చింది. కాగా, ఇప్పటికే హమాస్‌ మిలిటెంట్లు సుమారు 130 మందికిపైగా ఇజ్రాయెల్‌, ఇతర దేశాల వారిని బందీలుగా చేసుకున్నారు. హమాస్‌ చేసిన దాడుల్లో అమెరికాకు చెందిన 9 మంది పౌరులు మరణించినట్టు ఆ దేశం ప్రకటించింది. 12 మంది థాయిలాండ్‌ పౌరులు, బ్రెజిల్‌, బ్రిటన్‌, ఫ్రాన్స్‌, నేపాల్‌, మెక్సికో, ఉక్రెయిన్‌లకు చెందిన పౌరులు చనిపోయారు.