ప్రభుత్వ భూములమ్మి ఎన్నికల్లో గెలవాలనుకొంటున్న కేసీఆర్

రైల్వే టెర్మినల్, చర్లపల్లి రైల్వే స్టేషన్ విస్తరణకు స్థలం అడిగితే లేదని బీఆర్ఎస్ ప్రభుత్వం తెలిపిందని పేర్కొన్నారు.  రాజకీయ పార్టీకి భూమి ఇచ్చేందుకు మనసు వస్తుంది కానీ, పేదల ఇండ్లకు ఇచ్చేందుకు మనసు రాదు? అని కిషన్ రెడ్డి ప్రశ్నించారు. కాంగ్రెస్, బీఆర్ఎస్ రెండు పార్టీలు కుమ్మక్కై వందల కోట్ల విలువైన భూములను అక్రమంగా తీసుకున్నాయని ఆరోపించారు. 

కోకాపేటలో ఎకరం రూ.100 కోట్లు పలుకుతుంటే, బీఆర్ఎస్ పార్టీ 11 ఎకరాలు తీసుకుందని గుర్తు చేశారు. గతంలో ఫార్మాసిటీ పేరుతో అసైన్డ్ భూములను, పేదల భూములను బలవంతంగా లాక్కొని రియల్ ఎస్టేట్ దందాలు చేస్తుంటే హైకోర్టు రద్దు చేసిందని చెప్పారు. ప్రభుత్వ భూముల అమ్మకం రాష్ట్ర భవిష్యత్ కు మంచిది కాదని కేంద్ర మంత్రి హెచ్చరించారు. 

భూముల వేలాన్ని బీజేపీ అడ్డుకుంటుందని స్పష్టం చేశారు. తెలంగాణను బీఆర్ఎస్ ప్రభుత్వం అప్పుల పాలు చేసిందని మండిపడ్డారు. లక్షల కోట్లు అప్పులు చేసిందని తెలిపారు. ఇతర రాష్ట్రాలు ఆదాయాన్ని పెంచుకునేందుకు ప్రయత్నిస్తుంటే బీఆర్ఎస్ ప్రభుత్వం మాత్రం మిగులు రాష్ట్రాన్ని అప్పులు పాలు చేసిందని ధ్వజమెత్తారు.