చైనా సరిహద్దులో భూభాగం కొల్పేందుకు సిద్ధంగా లేము

భారత సైన్యం విధి నిర్వహణ, కార్యకలాపాల్లో సమర్థతను పెంచేందుకు ప్రస్తుత సంస్కరణలు, పునర్నిర్మాణం, పరివర్తనలపై ప్రధానంగా దృష్టి పెడతానని ఆయన ఆదివారం చెప్పారు.  సైన్యానికి దేశ నిర్మాణంలో గొప్ప కీర్తిప్రతిష్టలు ఉన్నాయని, దేశ రక్షణ కోసం కృషిని కొనసాగిస్తామని చెప్పారు.

సమకాలీన, భవిష్యత్ సవాళ్లను ఎదుర్కోవడానికి కార్యాచరణ సంసిద్ధత కోసం ఉన్నత ప్రమాణాలకు భరోసా ఇవ్వడమే తన అత్యంత ప్రాధాన్యత అని పేర్కొన్నారు. భౌగోళిక రాజకీయ పరిస్థితి వేగంగా మారుతోందని తెలిపారు. మనకు అనేక సవాళ్ళు ఉన్నాయని చెబుతూ అన్ని విభాగాలతో కలిసి ఎలాంటి సవాలునైనా ఎదుర్కొనడానికి సిద్ధంగా ఉండటం భారత సైన్యం కర్తవ్యమని తెలిపారు.

గతంలో సేవలందించిన ఆర్మీ చీఫ్‌లు చేసిన కృషిని  కొనసాగిస్తానని చెప్పారు.  “సామర్థ్య అభివృద్ధి,  సేనల ఆధునీకరణకు సంబంధించి స్వదేశీకరణ, ఆత్మనిర్భర్త ప్రక్రియ ద్వారా కొత్త సాంకేతికతలను ఉపయోగించుకోవడమే నా ప్రయత్నం” అని ఆయన చెప్పారు.

భారత వాయు సేన, భారత నావికా దళాల చీఫ్‌లతో తనకు పరిచయం ఉందని పేర్కొంటూ  త్రివిధ దళాల మధ్య సమన్వయం, సహకారం, ఉమ్మడితత్వాలకు ఇది నాంది అని చెప్పారు. త్రివిధ దళాలు కలిసికట్టుగా పని చేస్తామని, దేశ భధ్రత, రక్షణ కోసం కృషి చేస్తామని హామీ ఇస్తున్నానని స్పష్టం చేశారు.

భారత సైన్యానికి నాయకత్వం వహించే బాధ్యతను తనకు అప్పగించడం గర్వకారణమని తెలిపారు. దేశ భద్రత, సమగ్రతలను కాపాడటంలో భారత సైన్యానికి గొప్ప పేరు ప్రఖ్యాతులు ఉన్నాయని పేర్కొంటూ  అదే విధంగా దేశ నిర్మాణం కోసం కూడా సైన్యం కృషి చేసిందని తెలిపారు.

జనరల్ మనోజ్ ముకుంద్ నరవనే స్థానంలో జనరల్ మనోజ్ పాండే ఆర్మీ చీఫ్‌గా శనివారం బాధ్యతలు స్వీకరించారు. ఆర్మీ చీఫ్ పదవీ కాలం మూడేళ్ళు లేదా వయసు 62 సంవత్సరాలు, ఈ రెండిటిలో ఏది ముందు అయితే, అప్పుడు పదవీ విరమణ చేయాల్సి ఉంటుంది.