రష్యా ఆయిల్‌‌ కొనుగోలుకు భారత కంపెనీల టెండర్లు!

ఉక్రెయిన్‌‌‌‌పై దాడి చేసినందుకు రష్యాపై ఆంక్షలు కొనసాగుతున్నప్పటికీ,   ఆ దేశం నుంచి ముడి చమురును మాత్రం తక్కువ ధరకు కొనేందుకు భారత ఆయిల్ కంపెనీలు ఆసక్తి చూపుతున్నాయి.  రష్యా ఆయిల్‌ను దేశంలోని ప్రభుత్వ ఆయిల్ మార్కెటింగ్ కంపెనీలు భారీగా కొనుగోలుకు సిద్ధమయ్యాయి.  రష్యాపై ఆంక్షలు కొనసాగుతుండడంతో  రష్యా క్రూడాయిల్ ఉరల్స్‌‌‌‌ రేటు మార్కెట్‌‌‌‌లో తక్కువగా ఉంది. 

ప్రస్తుతం మార్కెట్‌‌‌‌లోని బ్యారెల్ బ్రెంట్‌‌‌‌ క్రూడాయిల్ రేటు కంటే ఉరల్స్ రేటు 20–25 డాలర్లుగా తక్కువగా ఉందని మార్కెట్ వర్గాలు చెబుతున్నాయి. దేశంలోని ఆయిల్ కంపెనీలు గత ఏడాది నవంబర్‌‌‌‌‌‌‌‌ నుంచి పెట్రోల్‌‌‌‌, డీజిల్ రేట్లను మార్చలేదు. పెరుగుతున్న క్రూడాయిల్ రేట్ల భారాన్ని తగ్గించుకోవాలంటే తక్కువ రేటుకే దొరుకుతున్న రష్యా ఆయిల్‌‌‌‌ను కొనుక్కోవడం మంచిదని కంపెనీలు భావిస్తున్నాయి. 

దేశంలోని అతిపెద్ద ఆయిల్ మార్కెటింగ్ కంపెనీ ఇండియన్ ఆయిల్ కార్పొరేషన్‌‌‌‌ (ఐఓసీ)  3 మిలియన్ బ్యారెళ్ల క్రూడాయిల్‌ను దిగుమతి చేసుకునేందుకు  ఒప్పందం కుదుర్చుకున్నట్లు సంబంధిత వర్గాలు తెలిపాయి.   హెచ్‌‌‌‌పీసీఎల్‌‌‌‌ కూడా మే నెల అవసరాల కోసం 10 లక్షల బ్యారెళ్ల రష్యా ఆయిల్ కోసం టెండర్లు వేసిందని చెబుతున్నారు. 

ఈ రెండు కంపెనీలు నేరుగా రష్యా ప్రభుత్వం నుంచి ఆయిల్ కొనకుండా, ఉరల్స్‌‌‌‌ను అమ్మే  కంపెనీ విటల్‌‌‌‌  నుంచి కొనుగోలు చేయడానికి టెండర్లు పెట్టుకున్నాయి. ఓఎన్‌‌‌‌జీసీ సబ్సిడరీ కంపెనీ మంగళూరు రిఫైనరీ అండ్ పెట్రోకెమికల్స్‌‌‌‌ (ఎంఆర్‌‌‌‌‌‌‌‌పీఎల్‌‌‌‌) కూడా 10 లక్షల  బ్యారెళ్ల ఆయిల్‌‌‌‌ను కొనేందుకు టెండర్లు వేయనుందని వార్తలొస్తున్నాయి. 

రష్యా ఆయిల్ రేటు తక్కువగా ఉన్నప్పుడే కొనుక్కోవాలని కంపెనీలు ఆత్రుత పడుతున్నాయి.  అయితే రష్యన్ ఆయిల్‌‌‌‌ కొనేందుకు రిలయన్స్ ఇండస్ట్రీస్‌‌‌‌ ఆసక్తి చూపించడం లేదు. ఈ కంపెనీకి అమెరికాలో వ్యాపారాలు ఎక్కువగా ఉండడమే కారణం. రష్యా నుంచి కొనుగోలు చేస్తే అమెరికాలో తమ వ్యాపార ప్రయోజనాలకు ఇబ్బందికరం కావచ్చని వెనుకడుగు వేస్తున్నారు.  

చెల్లింపులతోనే సమస్య 

రష్యాపై పశ్చిమ దేశాల ఆంక్షలు కొనసాగుతున్నా ఆ దేశం నుండి వస్తువులు కొనుగులుపై మాత్రం ఎటువంటి ఆంక్షలు   పెట్టలేదు. అంటే ఈ దేశం నుంచి  ముడి చమురును, ఇతర వస్తువులను  ఏ దేశమైనా  కొనుక్కోవచ్చు. అయినప్పటికీ పశ్చిమ దేశాల ఆంక్షలు ముదిరితే నష్టపోతామని  రష్యన్ ఆయిల్‌‌‌‌ను కొనే వ్యాపారులు భావిస్తున్నారు. 

ఇంకా అమెరికా, జపాన్ వంటి దేశాల్లోనే మెజార్టీ వ్యాపారాలు రష్యా కంపెనీ ఉరల్స్‌‌‌‌ నుండి కొనమని కూడా ప్రకటించారు. దీంతో రష్యన్ ఆయిల్ మార్కెట్‌‌‌‌లో చాలా తక్కువ రేటుకి ట్రేడవుతోంది. ఈ అవకాశాన్ని మన కంపెనీలు వాడుకోవాలని చూస్తున్నాయి. కానీ, ఈ ఆయిల్‌‌‌‌ను అమ్మే కంపెనీలకు  చెల్లింపులు చేయడంలో ఇబ్బందులు ఎదురయ్యే అవకాశాలున్నాయి. 

పశ్చిమ దేశాలు విధించిన ఆంక్షల ప్రకారం, రష్యాకు చెందిన కంపెనీకి స్విఫ్ట్‌‌‌‌ కింద పేమెంట్స్‌‌‌‌ చేయడానికి వీలులేదు. కానీ, రష్యన్ ఆయిల్‌‌‌‌ను అమ్మే వేరే దేశపు కంపెనీకి స్విఫ్ట్‌‌‌‌ కింద పేమెంట్స్ చేయొచ్చు. 

రష్యాకు మద్దతు ఇచ్చిన్నట్లే 

కిందటేడాది రష్యా నుంచి రోజుకి సగటును 45 వేల బ్యారెళ్లను మాత్రమే మనం దిగుమతి చేసుకున్నాం. రష్యా నుంచి ఆయిల్‌‌‌‌ను తెచ్చుకోవడంలో రవాణా ఖర్చులు, ఇన్సూరెన్స్ ఖర్చులు ఎక్కువగా ఉండడంతోనే ఈ దేశ ఆయిల్‌‌‌‌ను కొనేందుకు మన ఆయిల్ మార్కెటింగ్ కంపెనీలు పెద్దగా ఆసక్తి చూపించడం లేదు. 

కానీ, ప్రస్తుతం పరిస్థితులు మారాయి. రష్యా క్రూడాయిల్ రేటు మార్కెట్‌‌‌‌లో 20–25 డాలర్లు తక్కువకే దొరుకుతుండడంతో ఈ ఆయిల్‌‌‌‌ను కొనేందుకు ఎగబడుతున్నాయి. రష్యా ఆయిల్‌ను భారత్  కొనడంపై యూఎస్ వైట్‌‌‌‌హౌస్ స్పందించింది.

 ‘రష్యా ఆయిల్ కొనకూడదనే ఆంక్షలేవి లేవు. కానీ,  ఉరల్స్ కొంటే ఉక్రెయిన్‌‌‌‌పై దాడిలో రష్యాకు మద్దతు ఇచ్చిన్నట్లే ’ అని వైట్‌‌‌‌హౌస్‌‌‌‌ ప్రెస్ సెక్రెటరీ జెన్‌‌‌‌ సకి స్పష్టం చేశారు. చరిత్ర పుస్తకాల్లో ఎవరివైపు ఉంటారో ఆలోచించుకోవాలని ఆమె భారత్ కు  హితవు చెప్పారు. తాము విధించిన ఆంక్షలను పాటించాలని కోరారు.