8 కోట్ల కుటుంబాల జీవనోపాధి పశుసంపద 

“ఆవుల గురించి మాట్లాడటం కొంతమందికి నేరం కావచ్చు, ఆవులను మనం తల్లిగా గౌరవిస్తాము. ఆవు-గేదెలను ఎగతాళి చేసే వ్యక్తులు దేశంలోని 8 కోట్ల కుటుంబాల జీవనోపాధి అటువంటి పశువుల ద్వారానే నడుస్తోందని మర్చిపోయారు” అంటూ ప్రధాన మంత్రి నరేంద్ర మోదీ చురకలు అంటించారు. 

వారణాసిలోని కార్ఖియోన్‌లోని యుపి స్టేట్ ఇండస్ట్రియల్ డెవలప్‌మెంట్ అథారిటీ ఫుడ్ పార్క్‌లో ‘బనాస్ డైరీ సంకుల్’కి శంకుస్థాపన చేస్తూ పాడి పరిశ్రమను బలోపేతం చేయడం తమ  ప్రభుత్వం ప్రధాన ప్రాధాన్యతలలో ఒకటని స్పష్టం చేశారు.  దేశంలో పాల ఉత్పత్తి 6-7 ఏళ్ల క్రితంతో పోలిస్తే దాదాపు 45 శాతం పెరిగిందని చెప్పారు.

నేడు ప్రపంచంలోని పాలలో దాదాపు 22 శాతం భారతదేశం ఉత్పత్తి చేస్తోందని పేర్కొంటూ ఈ రోజు ఉత్తర ప్రదేశ్  దేశంలోనే అత్యధికంగా పాలను ఉత్పత్తి చేసే రాష్ట్రంగా మాత్రమే కాకుండా, పాడిపరిశ్రమ రంగం విస్తరణలో కూడా గణనీయంగా ముందుందని అభినందించారు.

రైతుల జీవితాలను మార్చడంలో పాడిపరిశ్రమ, పశుపోషణ, శ్వేత విప్లవంలో కొత్త పుంజుకుంటుందని ప్రధాన మంత్రి తన దృఢ విశ్వాసాన్ని వ్యక్తం చేశారు. ముందుగా, దేశంలోని 100 మిలియన్లకు పైగా ఉన్న చిన్న రైతులకు పశుపోషణ అదనపు ఆదాయ వనరుగా మారుతుందని ఆయన పేర్కొన్నారు. 

రెండవది, భారతదేశపు పాల ఉత్పత్తులకు విదేశాలలో భారీ మార్కెట్‌ ఉన్నదని, ఇందులో వృద్ధి చెందడానికి చాలా అవకాశాలు ఉన్నాయని చెప్పారు. మూడవదిగా, మహిళల ఆర్థికాభివృద్ధికి, వారి వ్యవస్థాపకతను, పురోభివృద్ధికి  పశుపోషణ గొప్ప మార్గమని ప్రధాని తెలిపారు. నాల్గవది బయోగ్యాస్, సేంద్రీయ వ్యవసాయం, సహజ వ్యవసాయానికి పశువులు కూడా పెద్ద ఆధారం అని వివరించారు.

బ్యూరో ఆఫ్ ఇండియన్ స్టాండర్డ్స్ దేశం కోసం ఏకీకృత వ్యవస్థను జారీ చేసిందని చెబుతూ ధృవీకరణ కోసం కామధేను ఆవులను కలిగి ఉన్న ఇంటిగ్రేటెడ్ లోగో కూడా ప్రారంభించబడిందని గుర్తు చేశారు. ఈ లోగో కనిపిస్తే స్వచ్ఛతను గుర్తించడం సులువవుతుందని, భారత పాల ఉత్పత్తుల విశ్వసనీయత కూడా పెరుగుతుందని ప్రధాని తెలిపారు.