”ప్రభుత్వ ఉగ్రవాదంపై పోరు” … చంద్రబాబు నిరసన దీక్ష

తెలుగుదేశం పార్టీ ప్రధాన కార్యాలయం, జిల్లా కార్యాలయాలు, టిడిపి నేతల ఇళ్లపై వైసిపి మూక దాడికి వ్యతిరేకంగా పార్టీ జాతీయ అధ్యక్షులు, ప్రధాన ప్రతిపక్ష నేత చంద్రబాబునాయుడు నిరసన దీక్ష చేపట్టారు.  ”ప్రభుత్వ ఉగ్రవాదంపై పోరు” పేరుతో గురువారం ఉదయం 8 గంటల నుంచి శుక్రవారం సాయంత్రం 8 గంటల వరకు 36 గంటలపాటు చంద్రబాబునాయుడు పార్టీ కేంద్ర కార్యాలయం వద్ద నిరసన దీక్ష చేపట్టనున్నట్లు ప్రకటించారు.

ప్రజాసమస్యల పరిష్కారం కోసం తెలుగుదేశం పార్టీ అలుపెరగని పోరాటం చేస్తోందని పేర్కొంటూ దీనిని జీర్ణించుకోలేని వైసిపి ప్రభుత్వం దమనకాండ కొనసాగిస్తోందని మాజీ ముఖ్యమంత్రి మండిపడ్డారు. దీనిని నిలువరించాల్సిన బాధ్యత రాష్ట్రంలోని ప్రతి పౌరునిపై ఉందని మాజీ ముఖ్యమంత్రి పిలుపిచ్చారు. ప్రభుత్వ ఉగ్రవాదంపై పోరుకు ప్రజలు, ఇతర ప్రతిపక్షాలు, ప్రజాస్వామ్యవాదులు, పౌర సంఘాలు కలిసి ముందుకు రావాలని ఆయన విజ్ఞప్తి చేశారు.

అది అభిమానుల స్పందన 

 కాగా, వైసీపీ అభిమానులు టీడీపీపై చూపించిన రియాక్షన్‌కు చంద్రబాబే బాధ్యత వహించి, క్షమాపణ చెప్పాలని ప్రభుత్వ సలహాదారు సజ్జల రామకృష్ణారెడ్డి డిమాండ్ చేశారు. చేతకాని దద్దమ్మలే బూతులు వాడతారని మండిపడ్డారు. తెలుగుదేశం పార్టీని రద్దు చేయాలని ఎన్నికల కమిషన్‌ను కోరతామని సజ్జల తెలిపారు.