ఉగ్ర‌వాదుల కాల్పుల్లో క‌శ్మీరీ బీజేపీ నేత‌, భార్య మృతి

కాశ్మీర్ లోయలో నేడు భారతీయ జనతా పార్టీ (బిజెపి) కిసాన్ మోర్చా జిల్లా అధ్యక్షుడు, సర్పంచ్ గులాం రసూల్ దార్, అతని భార్యతో సహా అద్దెకుంటున్న ఇంట్లో ఉగ్రవాదులు నేడు కాల్చి చంపారు.  శ్రీనగర్‌కు 50 కిలోమీటర్ల దూరంలో దక్షిణ కాశ్మీర్ అనంతనాగ్ జిల్లాలోని లాల్ చౌక్ ప్రాంతంలో ఈ దుర్ఘటన జరిగింది.

ఉగ్రవాదులు రెడ్వానీ కుల్గామ్‌కు చెందిన బిజెపి నాయకుడు గులాం రసూల్ దార్ ఇంట్లోకి ప్రవేశించి, అతని భార్య జవహీరాను కూడా  విచక్షణారహితంగా కాల్చి చంపారు. ఈ సంఘటన గురించి వివరాలను బిజెపి జమ్మూ, కాశ్మీర్ అధికార ప్రతినిధి అల్తాఫ్ ఠాకూర్ వెల్లడిస్తూ ఈ దారుణమైన చర్య అనాగరికమైనది,  పిరికితనంతో కూడుకున్నదని అంటూ తీవ్రంగా ఖండించారు. 

అమాయక వ్యక్తులపై దాడి చేయడం, చంపడం వంటి చర్యలు తీవ్రవాదుల నిరాశను ప్రతిబింబిస్తాయని ఠాకూర్ మండిపడ్డారు.  దాడి చేసిన వారిని పట్టుకుని కఠినంగా శిక్షించాలని ఆయన పోలీసులను కోరారు.

జమ్మూ కాశ్మీర్ లెఫ్టినెంట్ గవర్నర్ మనోజ్ సిన్హా ట్విట్టర్‌లో దాడిని ఖండించారు. తన అధికారిక హ్యాండిల్ నుండి, “సర్పంచ్  రసూల్ దార్,  అతని భార్య జ్వహారా బానూ, రెడ్వానీ బాల, కుల్గామ్‌పై జరిగిన క్రూరమైన ఉగ్రవాద దాడిని నేను తీవ్రంగా ఖండిస్తున్నాను” అని తెలిపారు. 

“ఇది పిరికితనపు చర్య. హింసకు పాల్పడిన వారిని త్వరలో న్యాయస్థానానికి తీసుకువస్తాం. ఈ దు.ఖ సమయంలో మరణించిన కుటుంబానికి నా ప్రగాఢ సానుభూతి తెలియజేస్తున్నాను” అని పేర్కొన్నారు. అప్నా పార్టీ ప్రధాన కార్యదర్శి రఫీ అహ్మద్ మీర్ ఈ  హత్యను తీవ్రంగా ఖండిస్తూ ఈ సంఘటన అత్యంత శోచనీయమని పేర్కొన్నారు. ఈ  హేయమైన చర్యకు పాల్పడిన నిందితులకు న్యాయం జరగాలని డిమాండ్ చేశారు.

“రెడ్వానీ-కుల్గామ్ సర్పంచ్, గులాం రసూల్ దార్, అతని భార్యలను కాల్చి చంపిన ఈ దారుణ సంఘటనను సామాన్యులకు మరిన్ని కష్టాలు తప్ప మరేమీ సాధించలేవు, ”అని మీర్ వ్యాఖ్యానించాడు. హింసకు ప్రపంచవ్యాప్తంగా ఏ నాగరిక సమాజంలోనూ స్థానం లేదని స్పష్టం చేశారు.

హింసకు గురైన కాశ్మీర్‌లో రాజకీయ ప్రక్రియ చాలా క్లిష్టంగా మారినదని పేర్కొంటూ రాజకీయ కార్యకర్తలు తమ జీవితాలను పణంగా పెట్టి శాంతి ప్రక్రియను బలోపేతం చేయడానికి తమ వంతు కృషి చేస్తున్నారని తెలిపారు. అన్ని రాజకీయ కార్యకర్తల భద్రతా రక్షణను వెంటనే సమీక్షించాలని డిమాండ్ చేశారు. 

కాశ్మీర్ లోయలో బిజెపి స్థానిక నాయకులపై ఈ ఏడాది దాడి చేయడం ఇది మూడోసారి. మార్చి 29 న, శ్రీనగర్‌కు ఉత్తరాన 55 కి.మీ దూరంలో ఉన్న మునిసిపల్ ఆఫీస్ సోపోర్‌పై ఉగ్రవాదులు దాడి చేశారు.  బిజెపికి చెందిన ఇద్దరు మునిసిపల్ కౌన్సిలర్లు షమ్-ఉద్-దిన్ పీర్, రియాజ్ అహ్మద్,  పోలీసు కానిస్టేబుల్ షఫ్కత్ అహ్మద్‌ని కాల్చి చంపారు.

జూన్ 3 సాయంత్రం, బిజెపి కౌన్సిలర్, రాకేష్ పండిట్ తన ఇద్దరు సెక్యూరిటీ గార్డులు లేకుండా  ట్రాల్ ప్రాంతంలో ఉన్నప్పుడు ఉగ్రవాదులు కాల్చి చంపారు.  గత ఏడాది అక్టోబర్‌లో, దక్షిణ కాశ్మీర్‌లోని కుల్గామ్ జిల్లాలో ఉగ్రవాదులు ముగ్గురు యువకులను చంపారు, వీరిలో 29 ఏళ్ల యువజన విభాగం ప్రధాన కార్యదర్శి ఫిదా హుస్సియన్, ఇరవైలలోపు ఇద్దరు ఇతర మద్దతుదారులు ఉన్నారు.

ఆగష్టు 2020 లో, బుద్గామ్‌లోని మోహిండ్‌పోరా ప్రాంతానికి చెందిన బిజెపి కార్యకర్త అబ్దుల్ హమీద్ నాజర్ తీవ్రవాదుల చేతిలో హతమయ్యాడు. గత ఏడాది జులై 8 సాయంత్రం, బిజెపి నాయకుడు షేక్ వసీం బారీ, అతని తండ్రి బషీర్ అహ్మద్, అతని సోదరుడు ఉమర్ సుల్తాన్ ఉత్తర కాశ్మీర్‌లోని బందిపోరా ప్రాంతంలో వారి నివాసం బయట హత్య చేశారు. 

మ‌రో వైపు పూంచ్ సెక్టార్‌లో బీఎస్ఎఫ్ ద‌ళాలు నిర్వ‌హించిన త‌నిఖీల్లో భారీ స్థాయిలో ఆయుధాలు ల‌భ్య‌మ‌య్యాయి. ఇంటెలిజెన్స్ స‌మాచారం ప్ర‌కారం బీఎస్ఎఫ్ ద‌ళాలు జాయింట్ ఆప‌రేష‌న్ చేప‌ట్టాయి. విల్ సంగ‌ద్ అట‌వీ ప్రాంతంలో జ‌రిగిన గాలింపులో ఆయుధాలు దొరికాయి. వాటిల్లో ఏకే 47 రైఫిళ్లు, పిస్తోళ్లు ఉన్నాయి.