ప్రధానమంత్రి నరేంద్ర మోదీకి తాజాగా మరో గౌరవం లభించింది. బ్రెజిల్ పర్యటనలో ఉన్న ఆయన అక్కడి అత్యున్నత పౌర పురస్కారాన్ని అందుకున్నారు. ‘గ్రాండ్‌ కాలర్‌ ఆఫ్‌ ది నేషనల్‌ ఆర్డర్‌ ఆఫ్‌ ది సదరన్‌ క్రాస్‌’ పురస్కారాన్ని ప్రధాని మోదీకీ ప్రదానం చేశారు బ్రెజిల్ అధ్యక్షుడు లూలా డ సిల్వా. భారత్- బ్రెజిల్ దేశాల మధ్య ద్వైపాక్షిక సంబంధాలు బలోపేతం చేయడంలో మోదీ కీలక పాత్ర పోషించినందుకే ఇచ్చినట్లు తెలిపారు. 2014లో ప్రధానిగా బాధ్యతలు స్వీకరించినప్పటి నుంచి మోదీ 26 దేశాల అత్యున్నత పురస్కారాలను అందుకున్నారు.
“ప్రతి రంగంలో రెండు దేశాల సహకారాన్ని బలోపేతం చేసుకోవాలని నిర్ణయించాం. వచ్చే ఐదేళ్లలో ఇరుదేశాల మద్య 20 బిలియన్ల డాలర్లు ద్వైపాక్షి వాణిజ్యం లక్షంగా పెట్టుకున్నాం. అన్ని రకాల వివాదాలు చర్చల ద్వారానే పరిష్కారం అవుతాయని మేము నమ్ముతున్నాం. ఉగ్రవాదంపై ఒకే తాటిపైకి వచ్చి వ్యతిరేకంగా పోరు చేస్తాం. ఉగ్రవాదంపై ద్వంద ప్రమాణాలకు చోటు లేదు” అని ప్రధాని స్పష్టం చేశారు.
భారతదేశం, బ్రెజిల్ మధ్య సంబంధాన్ని బలోపేతం చేయడంలో బలమైన వ్యక్తుల-ప్రజల సంబంధాల ప్రాముఖ్యతను ప్రధాని ఈ సందర్భంగా ప్రస్తావించారు. ఉమ్మడి అభిరుచులు, ప్రజాస్వామ్య విలువలను ప్రస్తావిస్తూ, “క్రీడల పట్ల మన లోతైన ఆసక్తి మనల్ని దగ్గరికి తీసుకువస్తుంది. భారతదేశం-బ్రెజిల్ సంబంధాలు కార్నివాల్ లాగా రంగురంగులగా, ఫుట్‌బాల్ ఆటలాగా శక్తివంతంగా,సాంబా లాగా హృదయాలను కలుపుతూ ఉండాలని మేము కోరుకుంటున్నాము” అని చెప్పారు.
“అంతర్జాతీయ స్థాయిలో, భారతదేశం, బ్రెజిల్ ఎల్లప్పుడూ దగ్గరి సమన్వయంతో పనిచేశాయి. రెండు పెద్ద ప్రజాస్వామ్య దేశాల మాదిరిగానే, మన సహకారం గ్లోబల్ సౌత్‌కు మాత్రమే కాకుండా మొత్తం మానవాళికి సంబంధించినది. ప్రపంచం ఒత్తిడి, అనిశ్చితి సమయాల్లో కొట్టుమిట్టాడుతున్నప్పుడు, భారతదేశం, బ్రెజిల్ భాగస్వామ్యం స్థిరత్వం, సమతుల్యతకు ముఖ్యమైన స్తంభం. ఉగ్రవాదంపై పోరాటంపై మన ఆలోచన ఒకటే. జీరో టాలరెన్స్, జీరో డబుల్ స్టాండర్డ్స్ మన స్పష్టమైన వైఖరి. ఉగ్రవాదాన్ని, ఉగ్రవాద మద్దతుదారులను మనం తీవ్రంగా వ్యతిరేకిస్తాము” అని ఆయన పేర్కొన్నారు.
బ్రెజిల్‌కు అధికారిక పర్యటన సందర్భంగా, ప్రధానమంత్రి నరేంద్ర మోదీకి బ్రెసిలియాలోని అల్వోరాడా ప్యాలెస్‌లో ఘనమైన సంప్రదాయ స్వాగతం లభించింది. బ్రెజిల్ అధికారులు ఆయనకు పూర్తి సైనిక గౌరవాలతో స్వాగతం పలికారు. ఇది భారతదేశం, బ్రెజిల్ మధ్య పెరుగుతున్న భాగస్వామ్యాన్ని సూచిస్తుంది. ఈ పర్యటన వాణిజ్యం, సంస్కృతి, సాంకేతికత, ప్రపంచ సహకారం వంటి రంగాలలో ద్వైపాక్షిక సంబంధాలను పెంపొందించడంపై దృష్టి పెట్టింది. కీలక ఒప్పందాలపై సంతకాలు జరిగే అవకాశం ఉంది.
More Stories
ఆసియాకప్‌లో హద్దుమీరిన పాక్ ఆటగాళ్లు
సొంత ప్రజలపై పాక్ బాంబులు.. 30 మంది మృతి
కెనడాలో ఖలీస్థానీ ఉగ్రవాది ఇంద్రజీత్ సింగ్ గోసల్‌ అరెస్ట్