భారత్ తనను రక్షించుకునే హక్కుకు అమెరికా మద్దతు

పహల్గామ్ ఉగ్రవాద దాడిపై భారతదేశం మరియు పాకిస్తాన్ మధ్య పెరుగుతున్న ఉద్రిక్తతల మధ్య అమెరికా రక్షణ కార్యదర్శి పీట్ హెగ్సేత్ రక్షణ మంత్రి రాజ్‌నాథ్ సింగ్‌కు ఫోన్ చేసి, భారతదేశం తనను తాను రక్షించుకునే హక్కును, ఉగ్రవాదంపై పోరాటాన్ని సమర్థిస్తున్నట్లు అమెరికా గురువారం తెలిపింది. పాకిస్తాన్ ప్రపంచ ఉగ్రవాదానికి ఆజ్యం పోస్తున్న ఈ ప్రాంతాన్ని “అస్థిరపరిచే” “పోకిరి” రాజ్యంగా “బహిర్గతం” చేయబడిందని సింగ్ హెగ్సేత్‌తో స్పష్టం చేశారు.

మరో వైపు విదేశాంగ మంత్రి జైశంకర్‌ ఐక్యరాజ్య సమితి భద్రతా మండలిలోని ఏడుగురు తాత్కాలిక సభ్యులతో ఫోన్‌లో సంభాషించారు. అలాగే, అమెరికా విదేశాంగ మంత్రి మార్కో రూబియోతోనూ కీలక చర్చలు జిరపారు. ఈ దాడిలో పాల్గొన్న ఉగ్రవాదులను, వారికి సహాయం చేసినవారిని, కుట్రదారులను కఠినంగా శిక్షించడానికి భారతదేశం కట్టుబడి ఉందని జైశంకర్‌ సోషల్‌ మీడియా వేదికగా తెలిపారు. 

ఇరు దేశాల నాయకులు భారత్- పాకిస్తాన్ మధ్య పెరుగుతున్న ఉద్రిక్తతలపై చర్చించగా పహల్గాం దాడికి పాల్పడిన వారికి శిక్ష పడేలా చేస్తామని స్పష్టం చేశారు. అమెరికా విదేశాంగ శాఖ ప్రతినిధి టామీ బ్రూస్ మాట్లాడుతూ విదేశాంగ మంత్రి మార్కో రూబియో భారత విదేశాంగ మంత్రి ఎస్ జైశంకర్‌తో ఫోన్‌లో మాట్లాడారని చెప్పారు. ఉగ్రవాదంపై పోరాటంలో భారత్‌కు అండగా నిలబడతామని రూబియో చెప్పారు. ఉగ్రవాదంపై కఠిన చర్యలు తీసుకోవాలని, అదే సమయంలో ప్రాంతంలో శాంతి, స్థిరత్వాన్ని కాపాడాలని భారత్‌ను కోరామని పేర్కొన్నారు.