ఏడాదిన్నరలో భారత్‌లోకి 51 మంది విదేశీ ఉగ్రవాదులు

గత ఏడాదిన్నర వ్యవధిలో జమ్ముకశ్మీర్ మీదుగా 51 మంది విదేశీ ఉగ్రవాదులు మనదేశంలోకి చొరబడ్డారని భద్రతా సంస్థల నివేదికలు చెబుతున్నాయి. 2023 నవంబరు నాటికి భారత్‌లో ఉన్న విదేశీ ఉగ్రవాదుల సంఖ్య 71. ప్రస్తుతం ఈ సంఖ్య 122కు పెరిగిందని అధికార వర్గాలు తెలిపాయి. గతంలో ఒకేసారి 122 మంది ఉగ్రవాదులు సరిహద్దు దాటి భారతదేశంలోకి చొరబడ్డారు. వారు జమ్మూకశ్మీర్ అంతటా వ్యాపించిపోయారని ఒక అధికారి చెప్పారు.

“పహల్గాం జరిగిన ఉగ్రదాడిలో విదేశీ ఉగ్రవాదులు కూడా పాల్గొన్నారు. ఈ దాడిని నిర్వహించడంలో విదేశీ ఉగ్రవాదులకు స్థానిక ఉగ్రవాదులు, వివిధ ఉగ్రవాద సంస్థల అండర్ గ్రౌండ్ వర్కర్లు సహాయ సహకారాలను అందించారు” అని అధికార వర్గాలు స్పష్టం చేశాయి. భారత్‌లోకి చొరబడుతున్న చాలామంది ఉగ్రవాదులు గతంలో సిరియాలోని ఐసిస్ శిబిరాల్లో ఉగ్రవాద శిక్షణ పొందారు.

జమ్ముకశ్మీరు మీదుగా భారత్‌లోకి చొరబడిన విదేశీ ఉగ్రవాదుల్లో కొందరు తమ స్థావరాలను భారత్‌లోని వివిధ రాష్ట్రాల్లో ఏర్పాటు చేసుకున్నట్లు అధికారులు చెబుతున్నారు. ప్రత్యేకించి దక్షిణ భారతదేశంలోని రాష్ట్రాలపై వారు ఫోకస్ పెట్టారన్న సమాచారం భారత భద్రతా సంస్థలను ఆందోళనకు గురిచేస్తోంది.  “భారత్‌లో రహస్యంగా ఉంటున్న విదేశీ ఉగ్రవాదుల ప్రధాన లక్ష్యం ఐసిస్ మాడ్యూల్స్‌ను ప్రోత్సహించడం. భారత వ్యతిరేక కార్యకలాపాలకు పాల్పడేలా చేయడం”అని జాతీయ దర్యాప్తు సంస్థ (ఎన్ఐఏ)కు చెందిన సీనియర్ అధికారి ఒకరు వివరించారు.