యుపిలో ముగ్గురు ఖలిస్థానీ ఉగ్రవాదులు కాల్చివేత

ఈ ముగ్గురు ఉగ్రవాదులు ఇటీవల పంజాబ్‌లోని ఓ పోలీస్ పోస్ట్‌పై దాడికి పాల్పడినట్టు అధికారులు తెలిపారు. అనుమానాస్పద వస్తువులతో వారు పురానాపుర్‌ ప్రాంతంలో సంచరిస్తున్నట్లు పంజాబ్ పోలీసుల నుంచి సమాచారం అందడం వల్ల ఉత్తర్‌ప్రదేశ్ పోలీసులు అప్రమత్తమయ్యారు. పంజాబ్ పోలీసులతో కలిసి పురాన్‌పుర్‌లో జల్లెడ పట్టారు. ఈ క్రమంలో ఓ ద్విచక్రవాహనంపై ముగ్గురు ఖలిస్థానీ ఉగ్రవాదులు పారిపోతున్నట్టు గుర్తించారు.

వారిని వెంబడించగా పురాన్‌పుర్‌ సమీపంలో ఓ నిర్మాణంలో ఉన్న వంతెన కిందకు వెళ్లారు. అన్ని వైపుల నుంచి పోలీసులు వారిని చుట్టుముట్టారు. పోలీసులను చూసి వారిపై ఉగ్రవాదులు కాల్పులకు పాల్పడ్డారు. అప్రమత్తమైన పోలీసులు వారిపై ఎదురుకాల్పులు జరిపారు. ఈ ఎన్‌కౌంటర్‌లో ముగ్గురు ఖలిస్థానీ ఉగ్రవాదులు తీవ్రంగా గాయపడ్డారు. సమీపంలోని ఆస్పత్రికి తరలించగా చికిత్స పొందుతూ మరణించారు.

ఎన్‌కౌంటర్‌లో హతమైన ఖలిస్థానీ ఉగ్రవాదులను పంజాబ్‌ గురుదాస్‌పుర్‌కు చెందిన గుర్విందర్ సింగ్ (25), వీరేందర్ సింగ్ అలియాస్ రవి (23), జస్​ప్రీత్ సింగ్‌ అలియాస్ పర్తాప్ సింగ్ (18) గా పోలీసులు గుర్తించారు. ఎన్​కౌంటర్​పై పంజాబ్ డీజీపీ గౌరవ్ యాదవ్ ఓ వీడియో సందేశం విడుదల చేశారు. పంజాబ్‌లో ఐఎస్​ఐఎస్​ ప్రాయోజిత ఉగ్రవాదానికి వ్యతిరేకంగా చేపట్టిన ఆపరేషన్‌లో పురోగతి సాధించినట్టు చెప్పారు. పాక్ ప్రాయోజిత “ఖలిస్థాన్ జిందాబాద్” ఫోర్స్ టెర్రర్ మాడ్యూల్‌ ఏరివేత కోసం యూపీ, పంజాబ్ పోలీసులు సంయుక్త ఆపరేషన్ నిర్వహించారని చెప్పారు.