అంబేద్కర్ పై అమిత్ షా వాఖ్యలపై దుమారం… ప్రధాని సమర్ధన!

కేంద్ర మంత్రి అమిత్ షా రాజ్యసభలో త‌న ప్ర‌సంగంలో రాజ్యాంగ నిర్మాత బీఆర్ అంబేద్క‌ర్‌ను అవ‌మానించిన‌ట్లు ఆరోపిస్తూ ఆయన క్షమాపణ చెప్పాలని కాంగ్రెస్ పార్టీ, ఇతర ప్రతిపక్షాలు డిమాండ్ చేస్తుండడంతో పెను దుమారం చెలరేగింది. అమిత్ షాపై సభాహక్కుల తీర్మానం కూడా ఇచ్చాయి. అయితే, ఈ విషయమై కాంగ్రెస్ చేస్తున్న ఆరోపణల పట్ల ప్రధాని నరేంద్ర మోదీ తీవ్రంగా స్పందించారు. 

అంబేద్కర్ ను అవమానపరుస్తూ కాంగ్రెస్ వరుసగా చేస్తున్న `పాపాల జాబితా’ను ఆయన ఎక్స్ వేదికగా వివరించారు. అంబేద్కర్​ను అవమానించిన కాంగ్రెస్ చీకటి చరిత్రను అమిత్ షా బహిర్గతం చేశారని, దీంతో హస్తం పార్టీ ఉలిక్కిపడిందని బుధవారం ఎద్దేవా చేశారు. కాంగ్రెస్ కొన్నేళ్లపాటు దేశంలో అధికారంలో ఉన్నప్పటికీ ఎస్​సీ, ఎస్​టీల సాధికారత కోసం ఏమీ చేయలేదని ప్రధాని ఆరోపించారు.

“అంబేద్కర్​ను అవమానించిన, ఎస్​సీ, ఎస్​టీ వర్గాలను విస్మరించిన కాంగ్రెస్ చీకటి చరిత్రను పార్లమెంట్ వేదికగా అమిత్ షా బట్టబయలు చేశారు. ఆయన చెప్పిన వాస్తవాలను చూసి కాంగ్రెస్ ఉలిక్కిపడింది. అందుకే పాపం వారు ఇప్పుడు నాటకాలాడుతున్నారు. ప్రజలకు నిజమేంటో తెలుసు. అంబేద్కర్​ను లోక్ సభ ఎన్నికల్లో కాంగ్రెస్ రెండు సార్లు ఓడిపోయేలా చేసింది. నెహ్రూ ఆయనకు వ్యతిరేకంగా ఎన్నికల్లో ప్రచారం చేశారు” అంటూ ప్రధాని విమర్శించారు. 

అలాగే బాబా సాహెబ్​కు భారతరత్న ఇచ్చేందుకు కాంగ్రెస్ నిరాకరించిందని, అంబేడ్కర్ చిత్రపటాన్ని పార్లమెంటు సెంట్రల్ హాల్‌లో పెట్టడాన్ని కాంగ్రెస్ వ్యతిరేకించిందని మోదీ గుర్తు చేశారు.  అంబేద్కర్ వారసత్వాన్ని తుడిచిపెట్టడానికి, ఎస్​సీ, ఎస్​టీలను కించపరచడానికి రాజవంశం నేతృత్వంలోని ఒక పార్టీ ప్రతి డర్టీ ట్రిక్స్ ఎలా చేస్తుందో దేశ ప్రజలు పదేపదే చూస్తున్నారని మోదీ విమర్శించారు.

 కాంగ్రెస్ నేతలు వ్యాప్తి చేసే అబద్దాలు వారి పరిపాలనలోని ఆకృత్యాలను దాచగలవని భావిస్తున్నారని, అందుకే ప్రజలు వారిని తీవ్రంగా తప్పుపడుతున్నారని ఎద్దేవా చేశారు. “గత దశాబ్ద కాలంగా డాక్టర్ బాబాసాహెబ్ అంబేద్కర్ ఆశయాలను నెరవేర్చేందుకు మా ప్రభుత్వం అవిశ్రాంతంగా కృషి చేసింది. 25 కోట్ల మందిని పేదరికం నుంచి విముక్తి చేశాం. అలాగే ఎస్​సీ, ఎస్​టీ చట్టాన్ని బలోపేతం చేశాం. స్వచ్ఛ భారత్, పీఎం ఆవాస్ యోజన, జల్ జీవన్ మిషన్, ఉజ్వల యోజన వంటి కార్యక్రమాలను గత పదేళ్లలో చేపట్టాం. పేద, అట్టడుగు వర్గాలకు సంక్షేమ పథకాలను అందించాం” అని ప్రధాని గుర్తు చేశారు. 

“అంబేడ్కర్​తో అనుబంధం ఉన్న ఐదు ప్రసిద్ధ ప్రదేశాలైన పంచతీర్థాన్ని అభివృద్ధి చేసేందుకు మా ప్రభుత్వం కృషి చేసింది. దశాబ్దాలుగా చైత్ర భూమికి సంబంధించిన సమస్య పెండింగ్​లో ఉంది. మా ప్రభుత్వం సమస్యను పరిష్కరించింది. అంతేకాదు నేను స్వయంగా అక్కడ ప్రార్థనకు వెళ్లాను. ” అని ప్రధాని మోదీ ఎక్స్​లో పోస్టు చేశారు.

రాజ్యాంగంపై జరిగిన చర్చ సందర్భంగా బీఆర్ అంబేడ్కర్​ను అవమానించేలా వ్యాఖ్యలు చేసిన కేంద్ర హోంమంత్రి అమిత్ షా రాజీనామా చేయాలని కాంగ్రెస్ పార్టీ బుధవారం ఉదయం డిమాండ్ చేసింది. రాజ్యసభలో రాజ్యాంగ నిర్మాత అంబేద్కర్​పై చేసిన వ్యాఖ్యలకుగానూ అమిత్ షా బహిరంగంగా, పార్లమెంటులో క్షమాపణ చెప్పాలని కోరింది. రాజ్యసభలో అమిత్‌ షా చేసిన వ్యాఖ్యలు బీజేపీకి, ఆర్ఎస్ఎస్ కు రాజ్యాంగంపై ఉన్న ద్వేషానికి అద్దం పడుతున్నాయని ఆరోపించింది.