కంగ‌నా ‘ఎమర్జెన్సీ’కి సెన్సార్ సర్టిఫికెట్

బాలీవుడ్ ఫైర్ బ్రాండ్ కంగ‌నా ర‌నౌత్‌కు ఎట్ట‌కేల‌కు ఉపశమనం ల‌భించింది. ఆమె న‌టించిన తాజా చిత్రం ‘ఎమర్జెన్సీ’కి సెన్సార్ క్లియ‌ర్ అయ్యింది. తాజాగా ‘ఎమర్జెన్సీ’ సినిమాకు సెన్సార్ బోర్డ్ సర్టిఫికెట్ ఇచ్చిన‌ట్లు తెలిపింది. ఈ సంద‌ర్భంగా సోష‌ల్ మీడియా వేదిక‌గా పోస్ట్ పెట్టింది.  ఎమర్జెన్సీ సినిమాకు సెన్సార్ సర్టిఫికెట్ లభించిందని తెలుపడానికి సంతోషిస్తున్నాం. త్వ‌ర‌లోనే ఈ సినిమా విడుద‌ల తేదీని ప్ర‌క‌టిస్తాం. ఓపిక‌తో మాకు మ‌ద్ద‌తుగా నిలిచిన వారంద‌రికీ ధ‌న్యవాదాలు అంటూ కంగ‌నా ఎక్స్ వేదిక‌గా వెల్ల‌డించింది.

భార‌త దేశ మాజీ ప్ర‌ధాని ఇందిరాగాంధీ రాజకీయ జీవితం ఆధారంగా వ‌స్తున్న ఈ చిత్రం కోర్టులో సెన్సార్ ఇబ్బందులు ఎదుర్కోన్న విష‌యం తెలిసిందే. ఈ సినిమా సెప్టెంబ‌ర్ 6న విడుద‌ల కావాల్సి ఉండ‌గా.. సినిమాకు సెన్సార్ స‌ర్టిఫికెట్ ఇవ్వ‌కపోవ‌డంతో వాయిదా పడింది. ఈ సినిమాలో త‌మ‌ను త‌క్కువ‌గా చూపించారంటూ విడుద‌ల అడ్డుకోవాల‌ని మధ్యప్రదేశ్‌లోని ఒక వ‌ర్గం న్యాయ‌స్థానాన్ని ఆశ్ర‌యించింది.

అయితే దీనిపై విచార‌ణ జ‌రిపిన కోర్టు వారి వాదనలను పరిగణలోకి మూవీలోని కొన్ని సన్నివేశాలను తొల‌గించాల‌ని సెన్సార్‌ బోర్డుకు సూచించింది. అయితే ఈ సినిమాలోని కొన్ని సీన్స్ క‌ట్ చేస్తే.. సర్టిఫికెట్‌ ఇస్తామని సెన్సార్‌ బోర్డు నిర్మాణ సంస్థ‌కు చెప్పింది. దీంతో ఈ విష‌యంపై నిర్మాణ సంస్థ సెన్సార్ బోర్డ్ పెట్టిన ష‌ర‌తుల‌కు ఒప్పుకోవ‌డంతో తాజాగా సెన్సార్ సర్టిఫికెట్‌ను జారీ చేసింది.

ఈ సినిమాలో ఇందిరాగాంధీగా కంగనా నటిస్తుండ‌గా.. జీ స్టూడియోస్‌, మణికర్ణిక ఫిలిమ్స్‌ బ్యానర్లు నిర్మిస్తున్నాయి. ఈ చిత్రంలో అనుపమ్‌ ఖేర్‌, మహిమా చౌదరి, మిలింద్‌ సోమన్‌, శ్రేయాస్‌ తల్పాడే తదితరులు కీలక పాత్రల్లో నటిస్తున్నారు.