ఢిల్లీ, గుజరాత్‌లోని పోలీసులు 1,300 కిలోల మాదక ద్రవ్యాలతో కూడిన ముఖ్యమైన డ్రగ్ ఆపరేషన్‌ను కనుగొన్నారు. ఈ మందులను ఢిల్లీకి పంపిణీ చేయడానికి ముందు దక్షిణ అమెరికా దేశాల నుండి గుజరాత్‌లోని ఓ ఫార్మాస్యూటికల్ కంపెనీకి శుద్ధి చేయడానికి రవాణా చేశారు. రెండు ప్రాంతాల నుంచి గత మూడు నెలలుగా ఇంటెలిజెన్స్‌ ఇన్‌పుట్‌లు, పరిశోధనల ఆధారంగా రూ.13,000 కోట్ల విలువైన 1,289 కిలోల కొకైన్, 40 కిలోల హైడ్రోపోనిక్ గంజాయిని అధికారులు స్వాధీనం చేసుకున్నారు.
ఢిల్లీ, గుజరాత్ పోలీసుల ఉమ్మడి దాడులలో వీటిని పట్టుకున్నారు. పండుగల సీజన్‌, రాబోయే పెద్ద ఈవెంట్‌ల కోసం ఈ డ్రగ్స్ దేశంలోకి అక్రమంగా రవాణా చేయబడినట్టు సమాచార. తాజాగా గుజరాత్ అంకలేశ్వర్‌లోని అవకర్ డ్రగ్స్ లిమిటెడ్ కంపెనీలో జరిపిన సోదాల్లో పోలీసులు 518 కిలోల కొకైన్‌ను సీజ్‌ చేశారు. దీని విలువ రూ.5,000 కోట్లుగా ఉంటాయని అంచనా వేశారు.
గుజరాత్ లో శుద్ధి చేసి, ఢిల్లీకి పంపి, అక్కడి నుండి అమ్మకం కోసం దేశంలోని వివిధ ప్రాంతాలకు రవాణా చేస్తున్నారు. ఈ కేసుకు సంబంధించి దక్షిణ ఢిల్లీకి చెందిన వ్యాపారవేత్త తుషార్‌ గోయల్‌తో సహా ఇప్పటివరకు 12 మంది వ్యక్తులను అరెస్టు చేశారు. గోయల్‌, లండన్‌లో ఉండే ఆయన సహచరుడు జతీందర్‌ పాల్‌ సింగ్‌ గిల్‌, నిషిద్ధ సరుకుల రవాణాకు సహకరించిన మరో ఇద్దరిని కూడా అరెస్టు చేశారు.
”గుజరాత్‌లోని అంక్లేశ్వర్‌కు చెందిన ఓ కంపెనీ డ్రగ్స్‌ను శుద్ధి చేస్తున్నట్టు విచారణలో తేలింది. డ్రగ్స్‌ను మొదట గోవాలో అందుకున్నారు. ఆ తర్వాత సంస్థ యాజమాన్యంలోని కర్మాగారంలో శుద్ధి చేశారు” అని ఢిల్లీ పోలీసుల్లోని కొన్ని విశ్వసనీయ వర్గాలు చెప్పాయి. ఇతర డ్రగ్స్‌తో పాటు నిషిద్ధ వస్తువులను శుద్ధి చేసి పంపేందుకు కంపెనీ నకిలీ అనుబంధ సంస్థను ప్రారంభించిందని ఢిల్లీ పోలీసు వర్గాలు తెలిపాయి.
మాదకద్రవ్యాలను యూపీకి పెద్ద సరుకులలో పంపించి, ఆ తర్వాత ఢిల్లీకి రవాణా చేశారు. అక్కడ సరుకును నిల్వ చేయటానికి, కొనుగోలుదారులను కనుగొనటానికి గోయల్‌, ఇతరులు బాధ్యత వహిస్తారు. ఈనెల 1న గోయల్‌కు చెందిన మహిపాల్‌పూర్‌లోని గోదాముపై స్పెషల్‌ సెల్‌ దాడి చేసి 562 కిలోల కొకైన్, 40 కిలోగ్రాముల హైడ్రోపోనిక్ గంజాయిని స్వాధీనం చేసుకున్నారు.
అక్టోబరు 10న తదుపరి విచారణలో ఢిల్లీలోని రమేష్‌ నగర్‌లోని ఒక దుకాణంలో అదనంగా 208 కిలోల కొకైన్‌ను స్వాధీనం చేసుకున్నారు. ఫార్మా సొల్యూషన్‌ సర్వీసెస్‌కు గుజరాత్‌లోని కంపెనీకి లింక్‌లతో అధికారులు డ్రగ్స్‌ను గుర్తించారు. ముఖ్యంగా, సరఫరాదారులు దేశంలోని ఇతర ప్రాంతాలకు డ్రగ్స్ సరఫరా కోసం ఢిల్లీని రవాణా కేంద్రంగా ఉపయోగిస్తున్నారు.
అవ్కార్ డ్రగ్స్ లిమిటెడ్ కంపెనీకి చెందిన ముగ్గురు యజమానులకు దేశంలోని ఇతర ప్రాంతాలకు డ్రగ్స్‌ను శుద్ధి చేసి సరఫరా చేసినందుకు కోట్లలో చెల్లిస్తామని హామీ ఇచ్చారని ఓ అధికారి తెలిపారు. ఈ కేసులో బయటపడ్డ పొరపాట్లకు అనుగుణంగా ఢిల్లీ, గుజరాత్‌లోని పలు ప్రాంతాల్లో దాడులు నిర్వహిస్తున్నారు.
అంతేకాకుండా, వడోదర నివాసి అయిన అమిత్, దుబాయ్ నుండి నిర్వహిస్తున్న అంతర్జాతీయ సిండికేట్ కింగ్‌పిన్ వీరేందర్ బసోయా అలియాస్ వీరూ డైరెక్షన్‌లో పనిచేస్తున్న ఇంగ్లాండ్ ఆధారిత హ్యాండ్లర్‌లతో సంబంధాలు కలిగి ఉన్నారని అనుమానిస్తున్నట్లు ఆ అధికారి తెలిపారు. అయితే, డ్రగ్స్ ఖచ్చితమైన మార్గంను ఇంకా కనుగొనలేదని, పోలీసు బృందం దానిపై పని చేస్తుందని ఆయన చెప్పారు.
ఈ గుజరాత్ ఆధారిత కంపెనీ వెబ్‌సైట్‌ ప్రకారం ప్రభుత్వేతర కంపెనీగా వర్గీకరించబడింది. దీనిని 2016, సెప్టెంబర్‌ 23న స్థాపించారు. ఈ సంస్థకు ఎలాంటి తయారీ లైసెన్స్‌ లేదని ప్రభుత్వ వర్గాలు తెలపటం గమనార్హం. కార్పొరేట్‌ వ్యవహారాల మంత్రిత్వ శాఖ ప్రకారం కంపెనీ చివరిగా తన బ్యాలెన్స్‌ షీట్‌ను గతేడాది మార్చి 31న దాఖలు చేసింది.
More Stories
సామాజిక పరివర్తనే లక్ష్యంగా సంఘ శతాబ్ది
పాక్‌లో యథేచ్ఛగా మానవ హక్కుల ఉల్లంఘన
దేశంలోనే అత్యంత సంపన్న మహిళగా రోష్ని నాడార్‌