నీట్ యూజీ పరీక్షలో సామూహిక అక్రమాలు జరగలేదు

అధిక మార్కుల అనేవి వివిధ నగరాలు, కేంద్రాలలో స్థిరంగా ఉన్నాయని ప్రభుత్వం తెలిపింది. ‘సామూహిక అక్రమాలకు సంబంధించిన సూచనలేవీ లేవని లేదా అభ్యర్థులకు అసహజ స్కోర్‌లకు దారితీసే లబ్ది చేకూర్చడం లేదని విశ్లేషణ చూపిస్తుంది. విద్యార్థులు పొందిన మార్కులలో మొత్తం పెరుగుదల ఉంది. ఈ పెరుగుదల నగరాలు, కేంద్రాలలో కనిపిస్తుంది’ అని తెలిపింది. 

భారత ప్రధాన న్యాయమూర్తి డి.వై.చంద్రచూడ్ నేతృత్వంలోని ధర్మాసనం ఆదేశాలకు అనుగుణంగా అఫిడవిట్ సమర్పించారు. అలాగే నీట్ అంశంపై కేంద్ర ప్రభుత్వం కూడా సుప్రీంకోర్టులో అఫిడవిట్ దాఖలు చేసింది. భవిష్యత్తులో అలాంటి లీక్‌లు జరగకుండా లేవనెత్తిన సమస్యలను పరిగణనలోకి తీసుకునేందుకు 7 మంది సభ్యుల నిపుణుల ప్యానెల్‌ను కేంద్రం ప్రతిపాదించింది

ఈ క్రమంలో జులై మూడో వారం నుంచి నాలుగు రౌండ్లలో కౌన్సెలింగ్ ప్రక్రియను నిర్వహించనున్నారు. ఎవరైనా అభ్యర్థి ఏదైనా అవకతవకలకు పాల్పడినట్లు తేలితే, కౌన్సెలింగ్ ప్రక్రియ సమయంలో లేదా తర్వాత కూడా అటువంటి ఆ వ్యక్తి కౌన్సెలింగ్ ఏ దశలోనైనా రద్దు చేయబడుతుంది. ‘నిరాధారమైన ఆందోళనల’ ఆధారంగా 23 లక్షల మంది అభ్యర్థులపై మళ్లీ పరీక్షల భారం పడకుండా చూస్తామని కేంద్రం తెలిపింది. అన్యాయమైన ప్రయోజనం పొందడంలో దోషిగా తేలిన అభ్యర్థులెవరూ ఎలాంటి ప్రయోజనం పొందకుండా చూస్తామని కేంద్ర ప్రభుత్వం స్పష్టం చేసింది.