లడఖ్ లో ప్రపంచలోనే అత్యంత ఎత్తైన రైల్వే స్టేషన్

హిమాచల్‌ప్రదేశ్‌లోని బిలాస్‌పూర్ నుంచి లడఖ్‌లోని లేహ్ వరకు ఈ రైల్వే మార్గాన్ని నిర్మించనున్నారు. మొత్తం 489 కిలోమీటర్ల పొడవైన ఈ కారిడార్ హిమాలయ పర్వత ప్రాంతాల గుండా ప్రయాణించనుంది. పర్వతాలు, లోయలు, మంచుతో కప్పబడిన ప్రాంతాలను దాటుకుంటూ వెళ్లేలా రైల్వే లైన్‌కు రూపకల్పన చేశారు. ఈ మార్గంలో బెరి, సుందర్‌నగర్, మండి, మనాలి, సిస్సు, దార్చా, కీలాంగ్, సర్చు, పాంగ్, రుమ్త్సే, ఉప్షి, ఖారు వంటి ప్రాంతాలు అనుసంధానం కానున్నాయి. 

చివరగా లేహ్ వద్ద ఈ రైల్వే మార్గం ముగుస్తుంది. ఈ ప్రాజెక్టులో మొత్తం 489 కిలోమీటర్ల మార్గంలో సుమారు 270 కిలోమీటర్లు సొరంగాల ద్వారానే నిర్మించాల్సి ఉంటుంది. అంటే మొత్తం రైల్వే మార్గంలో సగానికి పైగా టన్నెల్స్ ఉంటాయి. ఇది హిమాలయ ప్రాంతాల్లో రైల్వే నిర్మాణం ఎంత క్లిష్టమైనదో తెలియజేస్తోంది. ఈ ప్రాజెక్టులో అందరి దృష్టిని ఆకర్షిస్తున్న అంశం లడఖ్‌లోని టాంగ్లాంగ్ లా పర్వత ప్రాంతం దిగువన ప్రతిపాదించిన రైల్వే స్టేషన్. సముద్ర మట్టానికి సుమారు 17,244 అడుగుల (5,256 మీటర్ల) ఎత్తులో ఈ స్టేషన్ నిర్మించాలని ప్రణాళిక రూపొందించినట్లు తాజా నివేదికలు వెల్లడిస్తున్నాయి. 

ప్రస్తుతం చైనాలోని క్వింగ్‌హై–టిబెట్ రైల్వే మార్గంలో ఉన్న తంగులా స్టేషన్ ప్రపంచంలోనే అత్యంత ఎత్తైన రైల్వే స్టేషన్‌గా గుర్తింపు పొందింది. ఇది సముద్ర మట్టానికి సుమారు 5,068 మీటర్ల ఎత్తులో ఉంది. అయితే భారత్ ప్రతిపాదించిన టాంగ్లాంగ్ లా స్టేషన్ నిర్మాణం పూర్తయితే చైనా రికార్డును అధిగమిస్తుంది. దాదాపు 188 మీటర్ల అధిక ఎత్తులో ఈ స్టేషన్ ఉండనుంది. తద్వారా ప్రపంచ రైల్వే చరిత్రలో భారత్ సరికొత్త రికార్డును సృష్టించే అవకాశం ఉంది.