దీపావళి వేడుకల అనంతరం సోమవారం ఉదయం ఢిల్లీలో గాలి నాణ్యత తీవ్రంగా క్షీణించింది. ఇప్పటికే ఉన్న కాలుష్యానికి బాణసంచా పొగ తోడవడంతో ఈ పరిస్థితి ఏర్పడింది. ఉదయం 6:30 గంటలకు నగరంలో ఏక్యూఐ 366గా నమోదై, ‘చాలా పేలవమైన’ కేటగిరీలోకి వచ్చింది. తెల్లవారుజామున నగరంలోని పలు ప్రాంతాలను దట్టమైన పొగమంచు, పొగ కమ్మేయడంతో దృశ్యమానత గణనీయంగా తగ్గింది.
దీనికి తోడు ఢిల్లీలోని పలు జిల్లాల్లో దట్టమైన, అత్యంత దట్టమైన పొగమంచు ఏర్పడే అవకాశం ఉందని భారత వాతావరణ శాఖ (ఐఎండీ) హెచ్చరించింది. తెల్లవారుజామున నగరంలోని కొన్ని ప్రాంతాల్లో ‘తీవ్రమైన’ కేటగిరీకి చేరిన తర్వాత ఢిల్లీలో కాలుష్య స్థాయిలు తగ్గాయి. సెంట్రల్ పొల్యూషన్ కంట్రోల్ బోర్డ్ (సీపీసీబీ)తెలిపింది. ఐటీఓ పర్యవేక్షణ కేంద్రంలో ఉదయం 4:20 గంటలకు ఏక్యూఐ 406గా నమోదైంది.
ఇదిలా ఉండగా, శనివారం 369గా ఉన్న నగర సగటు ఏక్యూఐ, ఆదివారం 376కు తగ్గింది. ఈ రెండు రీడింగ్‌లు కూడా ‘చాలా పేలవమైన’ కేటగిరీలోకి వచ్చాయి. ఢిల్లీలోని పలు జిల్లాలకు ఐఎండీ జిల్లా స్థాయి పొగమంచు హెచ్చరిక జారీ చేసింది. ఆగ్నేయ ఢిల్లీ, తూర్పు ఢిల్లీ, షహదరా జిల్లాల్లో దట్టమైన నుంచి అత్యంత దట్టమైన పొగమంచు కమ్ముకునే అవకాశం ఉందని తెలిపింది. దీంతో దృశ్యమానత గణనీయంగా తగ్గే ప్రమాదం ఉందని పేర్కొంది.
ఉత్తర, దక్షిణ, మధ్య ఢిల్లీ ప్రాంతాల్లోనూ దట్టమైన పొగమంచు ఏర్పడవచ్చని అంచనా వేసింది. ఉదయం వేళల్లో ఢిల్లీతో పాటు జాతీయ రాజధాని ప్రాంతం (ఎన్సీఆర్) పరిధిలో రాకపోకలకు ఇబ్బందులు ఎదురయ్యే అవకాశం ఉన్నందున ప్రజలు అప్రమత్తంగా ఉండాలని సూచించింది. ఢిల్లీలోని అన్ని ప్రభుత్వ, ప్రైవేట్ పాఠశాలలు 5వ తరగతి వరకు హైబ్రిడ్ విధానంలో పనిచేయాలని ఆదేశాలు జారీ చేశారు.
ఈ ఆదేశం విద్యాశాఖ పరిధిలోని అన్ని ప్రభుత్వ, ప్రభుత్వ-సహాయక, ప్రభుత్వ-సహాయం లేని గుర్తింపు పొందిన ప్రైవేట్ పాఠశాలలకు, అలాగే న్యూ ఢిల్లీ మున్సిపల్ కౌన్సిల్, ఢిల్లీ మున్సిపల్ కార్పొరేషన్, ఢిల్లీ కంటోన్మెంట్ బోర్డ్ ఆధ్వర్యంలో నడిచే పాఠశాలలకు వర్తిస్తుంది. నవంబర్ 6న జారీ చేసిన ఈ ఆదేశం ప్రకారం, 5వ తరగతి వరకు విద్యార్థులను వ్యక్తిగతంగా లేదా ఆన్‌లైన్‌లో తరగతులకు హాజరయ్యేందుకు అనుమతించాలి.
ఇదిలా ఉండగా, ఆప్ జాతీయ కన్వీనర్‌ అరవింద్‌ కేజ్రీవాల్‌ కాలుష్యం పేరుతో దీపావళి, సనాతన ధర్మాన్ని లక్ష్యంగా చేసుకునే ప్రచారాన్ని కేజ్రీవాల్‌ నివాసం నుంచి నిర్వహిస్తున్నారని ఢిల్లీ మంత్రి కపిల్‌ మిశ్రా ఆరోపించారు. ఎక్స్‌ వేదికగా చేసిన పోస్టులో హిందూ పండుగకు వ్యతిరేకంగా నిర్దిష్టమైన కథనాన్ని ప్రచారం చేసేందుకు నాయకులు, డబ్బులు తీసుకునే ప్రముఖులను రంగంలోకి దించనున్నారని మిశ్రా ఆరోపించారు.
కాగా, నగరంలో శీతాకాలంలో కాలుష్యాన్ని నియంత్రించేందుకు ఢిల్లీ ప్రభుత్వం నవంబర్ 6 నుంచి ఢిల్లీ-ఎన్సీఆర్ పరిధిలో గ్రేడెడ్ రెస్పాన్స్ యాక్షన్ ప్లాన్ (గ్రాప్‌) మూడో దశను అమల్లోకి తెచ్చింది. ఏక్యూఐ 401-500 మధ్య నమోదైనప్పుడు ఈ దశను అమలు చేస్తారు. ఇందులో భాగంగా నిర్మాణ, కూల్చివేత పనులపై నిషేధం విధించారు. బీఎస్‌-3 పెట్రోల్, బీఎస్‌-4 డీజిల్ నాలుగు చక్రాల వాహనాల రాకపోకలపైనా ఆంక్షలు విధించారు. ప్రజలు నిబంధ‌న‌లు పాటించి వాయి కాలుష్యం త‌గ్గించాల‌ని అధికారులు సూచించారు.
About The Author
More Stories
ఎన్నికల షాక్ తో ట్రంప్ వాణిజ్య చర్చలు త్వరగా ముగింపు!
అనంతపురంలో మేయర్ ఓటమిపై భగ్గుమంటున్న కమలదళం
అమెరికాలో దీపావళి వేడుకలకు అడ్డుకున్న అతివాద బృందం!