చైనా ఏఐ సంస్థపై ప్రపంచ భద్రతా సంస్థల నిఘా

చైనాకు చెందిన కృత్రిమ మేధ (ఏఐ) స్టార్టప్‌ సంస్థ డీప్‌సీక్‌పై ప్రపంచ దేశాల ప్రభుత్వాలు, నియంత్రణ సంస్థలు నిఘా పెంచుతున్నాయి. డేటా భద్రత, వ్యక్తిగత సమాచార గోప్యత, ప్రభుత్వ రహస్య పత్రాల పరిరక్షణకు సంబంధించిన ఆందోళనల నేపథ్యంలో పలు దేశాలు ఆ సంస్థ సేవల వినియోగంపై ఆంక్షలు విధిస్తున్నాయి.  తక్కువ వ్యయంతోనే చాట్‌జీపీటీకి పోటీగా ఏఐ మోడల్‌ను అభివృద్ధి చేసినట్లు 2025 జనవరిలో ప్రకటించిన డీప్‌సీక్‌ ఇప్పుడు పలు దేశాల్లో భద్రతాపరమైన పరిశీలనను ఎదుర్కొంటోంది. 

తాజాగా అమెరికా హోంల్యాండ్‌ సెక్యూరిటీ విభాగం సైతం పౌర ప్రభుత్వ సంస్థల ఐటీ వ్యవస్థల నుంచి డీప్‌సీక్‌ ఉత్పత్తులను తొలగించాలని ఆదేశించింది.  అమెరికా పౌర ప్రభుత్వ సంస్థల ఐటీ వ్యవస్థల నుంచి డీప్‌సీక్‌ ఉత్పత్తులతోపాటు, ఆ సంస్థ ఏఐ మోడళ్లను ఉపయోగించే థర్డ్‌ పార్టీ సేవలను కూడా తొలగించాలని ఆదేశించింది. వాటి కొనుగోళ్లపైనా నిషేధం విధించింది.  ఈ మోడళ్ల ద్వారా సున్నితమైన సమాచారం చైనాకు బదిలీ అయ్యే అవకాశం సహా పలు రకాల భద్రతా ముప్పులు ఉన్నాయని అమెరికా పేర్కొంది.

ఇప్పటికే అమెరికా వాణిజ్య శాఖ, నేవీ సహా పలు ప్రభుత్వ సంస్థలు తమ పరికరాల్లో డీప్‌సీక్‌ వినియోగాన్ని నిషేధించాయి. న్యూయార్క్‌, టెన్నెసీ, వర్జీనియా వంటి రాష్ట్రాలు కూడా ఇలాంటి చర్యలు తీసుకున్నాయి. చైనా సైన్యానికి సహకరిస్తున్నాయనే ఆరోపణలు ఎదుర్కొంటున్న సంస్థల జాబితాలో డీప్‌సీక్‌ను కూడా చేర్చాలని అమెరికాలో కొందరు చట్టసభ సభ్యులు కోరారు.  

డీప్‌సీక్‌ గోప్యతా విధానం ప్రకారం వినియోగదారులు ఏఐకి పంపే ప్రశ్నలు, అభ్యర్థనలు, అప్‌లోడ్‌ చేసే ఫైళ్లతో సహా పలు రకాల సమాచారాన్ని చైనాలోని కంప్యూటర్‌ వ్యవస్థల్లో నిల్వ చేస్తుంది. ఈ విధానం వల్ల సున్నితమైన సమాచారం చైనా పరిధిలోకి వెళ్లే అవకాశం ఉందా? ప్రభుత్వ, సంస్థాగత సమాచార గోప్యతకు ముప్పు ఏర్పడుతుందా? అనే అంశాలపై ఆందోళనలు వ్యక్తమవుతున్నాయి.

ఈ నేపథ్యంలో పలు దేశాలు ప్రభుత్వ ఉద్యోగులు డీప్‌సీక్‌ను వినియోగించకుండా ఆంక్షలు విధించగా, మరికొన్ని దేశాలు వ్యక్తిగత డేటా సేకరణ, వినియోగ విధానాలపై విచారణ చేపట్టాయి.   భద్రతాపరమైన ముప్పులపై ఆందోళనతో ఆస్ట్రేలియా 2025 ఫిబ్రవరిలో ప్రభుత్వానికి చెందిన అన్ని పరికరాల్లో డీప్‌సీక్‌ వినియోగాన్ని నిషేధించింది. ప్రభుత్వ వ్యవస్థల్లో ఈ ఏఐ సేవల వినియోగం వల్ల తలెత్తే ప్రమాదాలను దృష్టిలో ఉంచుకుని ఈ నిర్ణయం తీసుకుంది.

ప్రభుత్వ పత్రాలు, సమాచార గోప్యతకు ముప్పు ఏర్పడే అవకాశాలున్నాయని పేర్కొంటూ భారత ఆర్థిక మంత్రిత్వ శాఖ 2025 ఫిబ్రవరి ప్రారంభంలో ఉద్యోగులకు సూచనలు చేసింది. అధికారిక అవసరాల కోసం చాట్‌జీపీటీ, డీప్‌సీక్‌ సహా ఏఐ సాధనాలను వినియోగించకుండా ఉండాలని కోరింది. ప్రభుత్వ పత్రాలు, కార్యాలయ సమాచారాన్ని ఏఐ సాధనాల్లో నమోదు చేయడం వల్ల వాటి గోప్యతకు సంబంధించిన సమస్యలు తలెత్తవచ్చన్నదే ఈ సూచన వెనుక ప్రధాన కారణం.