ఇటలీలో దుకాణాల లూటీ.. ఆస్తుల ధ్వంసం

పెరుగుతున్న జీవన వ్యయానికి వ్యతిరేకంగా మిలన్, బోలోగ్నా, టూరిన్‌తో సహా ఉత్తర ఇటలీలోని పలు నగరాల్లో జరిగిన నిరసనలు హింసాత్మకంగా మారాయని, ఈ ఘటనలో డజన్ల కొద్దీ ప్రజలు గాయపడ్డారని ఇటాలియన్ మీడియా నివేదికలు పేర్కొన్నాయి. ప్రజా సేవల దుస్థితి, నానాటికీ పెరుగుతున్న జీవన వ్యయాలపై ప్రజల్లో పేరుకుపోయిన అసంతృప్తి వీధి పోరాటాలకు దారితీసింది.

పొరుగున ఉన్న ఫ్రాన్స్‌లోనూ పెరుగుతున్న జీవన వ్యయాలు, క్షీణిస్తున్న ప్రజా సేవలపై ప్రజలు పెద్దఎత్తున వీధుల్లోకి వచ్చారు. ఇప్పుడు ఇటలీలోనూ ఇలాంటి పరిణామాలు చోటుచేసుకోవడం ఐరోపా దేశాల్లో ప్రజా అసంతృప్తిపై చర్చకు దారితీస్తోంది. నిత్యావసరాల ఖర్చులు పెరగడం, ప్రజా సేవలు ఆశించిన స్థాయిలో లేకపోవడం సామాన్యులను ఇబ్బందులకు గురిచేస్తున్నాయన్న ఆగ్రహం నిరసనలకు ప్రధాన కారణాలుగా కనిపిస్తోంది.

మరో ఏడాది ఎన్నికలను ఎదుర్కోనున్న ఇటలీ ప్రధాని జార్జియా మెలోని తాజా హింసాత్మక ఘటనలను తీవ్రంగా ఖండించారు. అశాంతిపై పోలీసుల స్పందన సరిపోవడం లేదని తన రాజకీయ ప్రత్యర్థులు విమర్శిస్తున్న నేపథ్యంలో, ఇటలీ భద్రతా పరిస్థితిపై చర్చించడానికి సోమవారం అత్యవసర సమావేశం నిర్వహించారు. “హింస, గందరగోళం సృష్టించడానికి చట్టబద్ధమైన ప్రదర్శనలను వాడుకుంటున్న వారిపై తదుపరి చర్యలను తమ మితవాద కూటమి సమీక్షిస్తుంది” అని మెలోని పేర్కొన్నారు.

ఇదిలా ఉండగా, ఇటలీ ఉక్కు కార్మికులు, ట్రక్కు డ్రైవర్లు సోమవారం నిరసనలు చేపట్టారు. దీంతో ఒక విమానాశ్రయంలో, రహదారులపై అంతరాయం ఏర్పడింది. వారాంతంలో, ఫ్రాన్స్‌ను కుదిపేసిన విధ్వంసకర దృశ్యాలను ప్రతిబింబిస్తూ, ఇటలీలోని పలు ప్రధాన నగరాలతో పాటు బెల్జియం, అల్బేనియాలలో కూడా యువ ఆందోళనకారులు పోలీసులతో ఘర్షణలకు దిగారు. ఫ్రాన్స్, ఇటలీతో సహా పలు దేశాల్లో జాతీయవాద, వలస వ్యతిరేక పార్టీలు బలపడుతున్న యూరోపియన్ ఎన్నికల పరంపరకు ముందు ఈ నిరసనలు చోటుచేసుకున్నాయి.

మిలాన్‌లో ఆదివారం జరిగిన ఆందోళనలు హింసాత్మకంగా మారడంతో పోలీసులు 271 మంది యువకులను అదుపులోకి తీసుకున్నారు. నిరసనకారులు పోలీసులతో తలపడ్డారు. దుకాణాలను లూటీ చేయడంతోపాటు పలు ప్రాంతాల్లో ఆస్తులను ధ్వంసం చేశారు. దీంతో నగరంలో ఉద్రిక్త పరిస్థితులు నెలకొన్నాయి. ముఖాలకు ముసుగులు ధరించిన వందలాది మంది నిరసనకారులు నగర కేంద్రంలో చెత్తకుండీలకు నిప్పంటించి, దుకాణాలపై విరుచుకుపడ్డారు.

డెకాథ్లాన్‌, ఆర్క్‌టెరిక్స్‌ వంటి క్రీడా వస్తువుల విక్రయ కేంద్రాలతోపాటు వొడాఫోన్‌ దుకాణంలోనూ లూటీ జరిగినట్లు టెలివిజన్‌ దృశ్యాలు వెల్లడించాయి. పరిస్థితిని అదుపులోకి తీసుకొచ్చేందుకు అల్లర్లను ఎదుర్కొనే ప్రత్యేక దుస్తులు ధరించిన పోలీసులు బాష్పవాయువు ప్రయోగించారు. వాటర్‌ కెనన్లతో నిరసనకారులను చెదరగొట్టే ప్రయత్నం చేశారు. అయితే, అప్పటికే నగరంలోని పలు ప్రాంతాల్లో విధ్వంసం చోటుచేసుకోవడంతో భద్రతా బలగాలు అప్రమత్తమయ్యాయి.