అశాంతి నెలకొన్న సమయంలో మీడియా సిబ్బంది భద్రతపై ప్రెస్ కౌన్సిల్ ఆఫ్ ఇండియా (పీసీఐ) ఆందోళన వ్యక్తం చేసింది. నిరసనలు, ప్రదర్శనలను కవర్ చేసే జర్నలిస్టుల కోసం సవివరంగా మార్గదర్శకాలను జారీ చేసింది. ఈ మార్గదర్శకాలు వ్యక్తిగత భద్రత, వృత్తిపరమైన ప్రవర్తన, నైతిక రిపోర్టింగ్‌పై దృష్టి సారిస్తాయి. అదే సమయంలో జర్నలిస్టులు, మీడియా సంస్థలు, చట్ట అమలు సంస్థల మధ్య మెరుగైన సమన్వయాన్ని ప్రోత్సహిస్తాయి.
ఈ మార్గదర్శకాల లక్ష్యం “జర్నలిస్టిక్ విధులను సమర్థవంతంగా నిర్వర్తించడాన్ని సులభతరం చేయడం. అదే సమయంలో మీడియా సిబ్బంది భద్రతను, బాధ్యతాయుతమైన రిపోర్టింగ్‌ను ప్రోత్సహించడం, జర్నలిస్టులు, మీడియా సంస్థలు, చట్ట అమలు అధికారుల మధ్య మెరుగైన సమన్వయాన్ని పెంపొందించడం” అని కౌన్సిల్ పేర్కొంది.
గుర్తింపు, వృత్తిపరమైన ప్రవర్తన
జర్నలిస్టులు తమ మీడియా సంస్థలు జారీ చేసిన చెల్లుబాటు అయ్యే గుర్తింపు కార్డులను లేదా ప్రెస్ ఇన్ఫర్మేషన్ బ్యూరో (పీఐబీ) లేదా సమాచార, పౌర సంబంధాల శాఖ (డీఐపీ) జారీ చేసిన అక్రిడిటేషన్ కార్డులను తమ వెంట ఉంచుకోవాలని పీసీఐ ఆదేశించింది. ఈ గుర్తింపు కార్డులు అన్ని వేళలా స్పష్టంగా కనిపించేలా ఉండాలి. పరికరాలు లేదా ఇతర వస్తువులలో చిక్కుకునే ప్రమాదాన్ని తగ్గించే విధంగా భద్రపరిచిన లాన్యార్డ్‌లను ఉపయోగించాలని కూడా జర్నలిస్టులకు సూచించారు.
ప్రదర్శనలను కవర్ చేసేటప్పుడు జర్నలిస్టులు తటస్థంగా, వృత్తిపరంగా ఉండాల్సిన అవసరాన్ని ఈ మార్గదర్శకాలు నొక్కి చెబుతున్నాయి. వారు నిరసనలలో పాల్గొనకూడదు. పక్షపాతం వహించకూడదు. ఘర్షణలను రెచ్చగొట్టకూడదు లేదా నిరసనకారులు, ప్రతి-నిరసనకారులు లేదా పోలీసు సిబ్బందికి ఆటంకం కలిగించకూడదు. ఉద్రిక్త పరిస్థితులలో గౌరవంగా ఉండాలని, చట్టబద్ధమైన పోలీసు ఆదేశాలను పాటించాలని కూడా కౌన్సిల్ పాత్రికేయులకు సలహా ఇచ్చింది. వారు తమను తాము మీడియా సభ్యులుగా ప్రశాంతంగా పరిచయం చేసుకుంటూ అనవసరమైన వాదనలకు దూరంగా ఉండాలి.
దూరం పాటించడం, జనసమూహ భద్రతను నిర్ధారించడం
ఉద్రిక్తతలు పెరిగినప్పుడు లేదా పోలీసు చర్యలు ఆశించినప్పుడు, జనసమూహాలకు సురక్షితమైన దూరం పాటించాలని పీసీఐ పాత్రికేయులకు పి.సి.ఐ. సలహా ఇచ్చింది. గాయాల ప్రమాదాన్ని తగ్గించడం, భద్రతా కార్యకలాపాలకు ఆటంకం కలిగించకుండా మీడియా సిబ్బంది తమ పనిని కొనసాగించడానికి వీలు కల్పించడం దీని ఉద్దేశ్యం.
కదలికలకు ఆటంకం కలిగించే లేదా ఆస్తికి నష్టం కలిగించే విధంగా పోలీసు బారికేడ్లు, వాహనాలు లేదా ఇతర పరికరాలకు కెమెరాలు లేదా రికార్డింగ్ పరికరాలను జతచేయడాన్ని కూడా ఈ మార్గదర్శకాలు పాత్రికేయులను నిషేధిస్తున్నాయి. నిరసనల సమయంలో మారుతున్న పరిస్థితుల పట్ల అప్రమత్తంగా ఉండాలని, పరిస్థితులు తీవ్రమవుతున్నప్పుడు అనవసరమైన ప్రమాదానికి గురిచేసే స్థానాలకు దూరంగా ఉండాలని మీడియా సిబ్బందికి విజ్ఞప్తి చేసింది.
అత్యవసర కిట్లు, వ్యక్తిగత భద్రతా చర్యలు
నిరసనలను కవర్ చేస్తున్నప్పుడు పాత్రికేయులు చిన్న అత్యవసర కిట్లను తమ వెంట ఉంచుకోవాలని కౌన్సిల్ సిఫార్సు చేసింది. ఈ కిట్లలో ప్రాథమిక ప్రథమ చికిత్స సామాగ్రి, త్రాగునీరు, అధిక ప్రోటీన్ ఉన్న చిరుతిళ్లు, ఫ్లాష్‌లైట్లు మరియు రక్షణ కళ్లద్దాలు లేదా గాగుల్స్ ఉండాలి. జన సమూహాలను నియంత్రించే ఆపరేషన్ల సమయంలో ఉపయోగించే ప్రమాదకరమైన వస్తువులను తాకవద్దని కూడా ఈ మార్గదర్శకాలు జర్నలిస్టులను హెచ్చరిస్తున్నాయి.
“కన్నీటి వాయువు క్యానస్టర్లు, ఫ్లాష్-బ్యాంగ్ పరికరాలు లేదా పొగ గ్రెనేడ్లను ఎప్పుడూ తాకవద్దు, తీయవద్దు లేదా కదిలించడానికి ప్రయత్నించవద్దు. అవి వేడిగా ఉండవచ్చు, పేలవచ్చు లేదా ప్రమాదకరమైన అవశేషాలను కలిగి ఉండవచ్చు,” అని ఆ సలహాలో పేర్కొన్నారు. జన సమూహాలను నియంత్రించే పరికరాలను ఉపయోగించిన తర్వాత కూడా వాటి వల్ల కలిగే ప్రమాదాలను ఈ హెచ్చరిక హైలైట్ చేస్తుంది.
క్షేత్రస్థాయి నుండి రిపోర్టింగ్ చేస్తున్నప్పుడు, అటువంటి వస్తువులను తనిఖీ చేయడానికి లేదా కదిలించడానికి ప్రయత్నించడం కంటే తమ భద్రతకు ప్రాధాన్యత ఇవ్వాలని జర్నలిస్టులకు సూచించారు.
నైతిక రిపోర్టింగ్, కార్యాచరణ భద్రత
నైతిక, బాధ్యతాయుతమైన రిపోర్టింగ్ విభాగానికింద, సమాచారాన్ని ప్రచురించడానికి లేదా ప్రసారం చేయడానికి ముందు బహుళ వనరుల ద్వారా ధృవీకరించుకోవాలని పీసీఐ జర్నలిస్టులను కోరింది. నిష్పక్షపాతమైన మరియు కచ్చితమైన కవరేజీని నిర్ధారించడానికి, వివిధ పక్షాలు చేసిన ప్రకటనలు, వాదనలను ఒకే స్థాయిలో పరిశీలించాలి. జర్నలిస్టుల భద్రత కంటే ప్రత్యేకమైన ఫుటేజీని సంపాదించాలనే ఒత్తిడికి లొంగిపోవద్దని కూడా కౌన్సిల్ మీడియా సంస్థలను హెచ్చరించింది.
పోలీసు సిబ్బంది వాస్తవ స్థానాలు, వారి వ్యూహాత్మక కదలికలు లేదా తప్పించుకునే మార్గాల వంటి సమాచారాన్ని పంచుకోవడం వల్ల ప్రజలకు ప్రమాదం వాటిల్లే అవకాశం ఉన్నప్పుడు లేదా భద్రతా కార్యకలాపాలకు ఆటంకం కలిగే అవకాశం ఉన్నప్పుడు, అటువంటి సమాచారాన్ని ప్రసారం చేయవద్దని లేదా ప్రచురించవద్దని ఈ మార్గదర్శకాలు పాత్రికేయులను మరింతగా నిర్దేశిస్తున్నాయి.
ఉద్రిక్తమైన, అనూహ్యమైన పరిస్థితులలో వృత్తిపరమైన ప్రమాణాలను పాటిస్తూనే, పాత్రికేయులు తమకు లేదా ఇతరులకు ప్రమాదం కలిగించకుండా బాధ్యతాయుతంగా నిరసనలపై వార్తలు అందించడం కొనసాగించేలా చూడటమే ఈ సలహా లక్ష్యం.
About The Author
More Stories
భారత్‌పై గూఢచర్య బడ్జెట్‌ను రూ. 1,300 కోట్లకు పెంచిన ఐఎస్ఐ
రాజ్యాంగ వ్యవస్థపై నిరంతరం దాడులతో కాంగ్రెస్ నాలుగో చారిత్రక తప్పిదం
యాదాద్రి పవర్ ప్లాంట్‌కు బొగ్గు కేటాయింపు.. కేంద్రం పూర్తి అండ