ప్రతిపక్షం పిటిషన్‌లో 14 లోపాలు.. రూ 220 తక్కువగా కోర్టు ఫీజు

ఓటర్ల జాబితా సవరణ ప్రక్రియపై ఎన్నికల సంఘానికి వ్యతిరేకంగా ఇండియా కూటమి నేతలు దాఖలు చేసిన పిటిషన్‌లో సుప్రీంకోర్టు రిజిస్ట్రీ 14 లోపాలను గుర్తించింది. సంతకాలు లేని న్యాయవాదుల అధికార పత్రాలు, అసంపూర్తి పత్రాలు, స్పష్టత లేని ప్రతులు, కోర్టు ఫీజులో రూ.220 తక్కువగా చెల్లించడం వంటి అంశాలను ప్రస్తావించింది. పిటిషన్‌లోని పత్రాలను పరిశీలించిన సుప్రీంకోర్టు రిజిస్ట్రీ పలు అభ్యంతరాలను లేవనెత్తింది. కాంగ్రెస్ అధ్యక్షుడు మల్లికార్జున ఖర్గే గుర్తింపు కార్డు స్పష్టంగా కనిపించే ప్రతిని సమర్పించాలని సూచించింది.

అలాగే కొన్ని అనుబంధ పత్రాల ప్రతులు స్పష్టంగా లేకపోవడం, పేజీల సంఖ్యలో వ్యత్యాసాలు ఉండటం వంటి అంశాలను గుర్తించింది. పిటిషన్‌కు గతంలో ఇచ్చిన తీర్పు కాపీని జత చేయలేదని రిజిస్ట్రీ కూడా ఎత్తి చూపింది. రాహుల్ గాంధీ, కాంగ్రెస్ అధ్యక్షుడు మల్లికార్జున్ ఖర్గే మినహా, తొమ్మిది మంది పిటిషనర్ల వద్ద వకాలత్ లు, అంటే న్యాయ ప్రాతినిధ్యం కోసం అధికార పత్రాలు లేవు. ఇన్ని లోపాలను మంగళవారం సరిదిద్దడం సాధ్యం కాకపోవచ్చు. దానితో మంగళవారం కోర్టులో ఈ కేసు ప్రస్తావనకు రాలేదు. తప్పులను సరిదిద్దిన తర్వాత పిటిషన్‌పై విచారణ జరుగుతుంది.
ఎన్నికల జాబితాల ఎస్ఐఆర్ లో పెద్ద ఎత్తున ఓటర్ల తొలగింపు, అవకతవకలు జరిగాయని ఆరోపిస్త పిటిషన్ దాఖలు చేశారు. కాంగ్రెస్ అధ్యక్షుడు మల్లికార్జున్ ఖర్గే, టీఎంసీ ఎంపీ సౌగతా రాయ్, సమాజ్‌వాదీ పార్టీ (ఎస్పీ) అధినేత అఖిలేష్ యాదవ్, రాష్ట్రీయ జనతా దళ్ నాయకుడు తేజస్వి ప్రసాద్ యాదవ్, నేషనలిస్ట్ కాంగ్రెస్ పార్టీ (పవార్) (ఎన్‌సిపి-ఎస్‌సిపి) నాయకురాలు సుప్రియా సూలే, శివసేన-యూబీటీ నాయకుడు సంజయ్ రౌత్, మరికొందరు ప్రతిపక్ష నాయకులు కూడా ఈ పిటిషన్‌లో పిటిషనర్లుగా ఉన్నారు.

ఈ పిటిషన్‌లో భారత ఎన్నికల సంఘం, ప్రధాన ఎన్నికల కమిషనర్ జ్ఞానేష్ కుమార్, ఇతర ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషిలను కూడా ప్రతివాదులుగా చేర్చారు. ఎస్‌ఐఆర్ సమయంలో చేసిన తొలగింపులు, మార్పులపై ఒక నిర్దిష్ట సమయంలోగా స్వతంత్ర ఆడిట్ నిర్వహించడానికి, విశ్రాంత సుప్రీంకోర్టు న్యాయమూర్తి నేతృత్వంలో, సాంకేతిక నిపుణులు, ఇతర ప్రముఖ పౌరుల సహాయంతో ఒక స్వతంత్ర కమిటీని ఏర్పాటు చేయాలని ఈ పిటిషన్‌లో కోరారు.

చట్టానికి అనుగుణంగా నోటీసు ఇవ్వకుండా, సహేతుకమైన విచారణ అవకాశం కల్పించకుండా ఏ ఓటరును కూడా ఓటర్ల జాబితా నుండి తొలగించకూడదని, అలాగే పంజాబ్, ఎన్నికలకు వెళ్తున్న ఇతర రాష్ట్రాల్లోని అర్హులైన వ్యక్తులు, చట్టం అనుమతించిన చివరి తేదీ వరకు ఓటర్ల జాబితాలో చేర్చబడటానికి దరఖాస్తు చేసుకునేందుకు అనుమతించాలని కూడా అది ఆదేశించాలని కోరారు.