కార్గిల్ అమరవీరుని భార్య సుధా యాదవ్ కర్ణాటక గవర్నర్

* ఆరు రాష్ట్రాలకు గవర్నర్లు నియామకం

రాష్ట్రపతి ద్రౌపది ముర్ము సోమవారం ఆరు రాష్ట్రాలకు గవర్నర్లను నియమించారు. సిక్కిం, ఒడిశా, కేరళం, కర్ణాటక, తమిళనాడు, ఉత్తరాఖండ్ రాష్ట్రాలను నూతన గవర్నర్ లను ముర్ము నియమించారు. ఇందులో భాగంగా హర్యానాకు చెందిన ప్రముఖ బీజేపీ నేత సుధా యాదవ్‌ను కర్ణాటక కొత్త గవర్నర్‌గా ఎంపిక చేశారు. బీజేపీ అత్యున్నత నిర్ణయాత్మక విభాగమైన పార్లమెంటరీ బోర్డులో ఏకైక మహిళా సభ్యురాలైన సుధా యాదవ్, తన కుమారుడు సిద్ధార్థ్, యాదవ్ బీజేపీ మీడియా సహ-ఇన్‌ఛార్జ్‌గా నియమితులైన కొద్ది రోజులకే ఈ కీలక గవర్నర్ పదవిని చేపట్టనున్నారు.

గురుగ్రామ్‌కు చెందిన సుధా యాదవ్, కార్గిల్ యుద్ధంలో వీరమరణం పొందిన మాజీ బిఎస్ఎఫ్ డిప్యూటీ కమాండెంట్ సుఖ్‌బీర్ సింగ్ యాదవ్ భార్య. మహేంద్రగఢ్ మాజీ బీజేపీ ఎంపీ, జాతీయ వెనుకబడిన తరగతుల కమిషన్ మాజీ సభ్యురాలైన సుధా యాదవ్, థావర్‌చంద్ గెహ్లాట్ స్థానంలో బాధ్యతలు స్వీకరించనున్నారు. 1999 నుండి 2002 వరకు పనిచేసిన వి.ఎస్. రమాదేవి తర్వాత, ఈ రాష్ట్రానికి గవర్నర్‌గా వ్యవహరించనున్న రెండవ మహిళగా ఆమె నిలవనున్నారు.

ఇతర గవర్నర్ నియామకాలలో భాగంగా, రాష్ట్రపతి ముర్ము సీనియర్ బీజేపీ నేత ఓం మాథుర్‌ను సిక్కిం నుండి కేరళకు బదిలీ చేశారు. కేరళలో ఆర్లేకర్ స్థానంలో బాధ్యతలు చేపట్టనున్న మాథుర్, రాజస్థాన్‌కు చెందిన సీనియర్ బీజేపీ నేత, మాజీ రాజ్యసభ సభ్యుడు. ఆయన జూలై 2024లో సిక్కిం గవర్నర్‌గా బాధ్యతలు స్వీకరించారు. నాలుగు కొత్త నియామకాలలో, బ్రజ్ మోహన్ రామ్ ఒడిశా గవర్నర్‌గా, ధల్ సింగ్ బిసెన్ ఉత్తరాఖండ్ గవర్నర్‌గా నియమితులయ్యారు. పాలము నియోజకవర్గానికి ప్రాతినిధ్యం వహించిన మాజీ లోక్‌సభ ఎంపీ బ్రజ్ మోహన్ రామ్, డాక్టర్ కె. హరి బాబు కంభంపాటి స్థానంలో ఒడిశా గవర్నర్‌గా బాధ్యతలు చేపట్టనున్నారు.

మధ్యప్రదేశ్‌లోని బాలాఘాట్ మాజీ లోక్‌సభ ఎంపీ ధల్ సింగ్ బిసెన్, పదవీ విరమణ చేసిన లెఫ్టినెంట్ జనరల్ గుర్మీత్ సింగ్ స్థానంలో ఉత్తరాఖండ్ గవర్నర్‌గా నియమితులయ్యారు. ఢిల్లీకి చెందిన మాజీ బీజేపీ జాతీయ ప్రధాన కార్యదర్శి , పార్టీ సీనియర్ దళిత నేత దుష్యంత్ గౌతమ్, సిక్కిం కొత్త గవర్నర్‌గా వ్యవహరించనున్నారు. కేరళ గవర్నర్‌గా ఉన్న రాజేంద్ర విశ్వనాథ్ ఆర్లేకర్, తమిళనాడు గవర్నర్‌గా నియమితులయ్యారు. ప్రస్తుతం ఆయన ఆ రాష్ట్ర గవర్నర్ గా అదనపు బాధ్యతలు నిర్వహిస్తున్నారు.