ఓటు చోరీపై ఆధారాలు ఇవ్వాలని కోరిన రాష్ట్రపతి ముర్ము

ప్రధాన ఎన్నికల కమిషనర్‌ గ్యానేశ్‌ కుమార్‌ వ్యవహారంపై కాంగ్రెస్‌ అగ్రనేత, లోక్‌సభ ప్రతిపక్ష నేత రాహుల్‌ గాంధీ నేతృత్వంలోని ఇండియా కూటమి ప్రతినిధి బృందం రాష్ట్రపతి ద్రౌపదీ ముర్మును శుక్రవారం రాత్రి కలిసింది. ఎన్నికల ప్రక్రియలో అక్రమాలు జరిగాయంటూ ప్రతిపక్షాలు చేస్తున్న ఆరోపణలను వివరిస్తూ వినతిపత్రం సమర్పించింది. ఈ భేటీ అనంతరం రాహుల్‌ గాంధీ మీడియాతో మాట్లాడుతూ తమ వాదనలకు సంబంధించిన ఆధారాలను సమర్పించాలని రాష్ట్రపతి కోరినట్లు వెల్లడించారు.

రాష్ట్రపతిని కలిసిన బృందంలో రాహుల్ గాంధీ, మల్లికార్జున్ ఖర్గే, మమతా బెనర్జీ, సీపీఎం ప్రధాన కార్యదర్శి ఎంఏ బేబీ, సీపీఐకి చెందిన డి రాజా, సమాజ్‌వాదీ పార్టీ నేత రాజీవ్‌రాయ్, ఎన్సీపీ(ఎస్పీ) నేత సుప్రియా సూలే, జమ్మూకశ్మీర్ సీఎం ఒమర్ అబ్దుల్లా, ఆర్జేడీ ఎంపీ మనోజ్ ఝా, వీసీకే నేత మనోజ్ ఝా, వీసీకే నేత తిరుమావన్ ఝా తదితరులు ఉన్నారు.

ప్రతినిధి బృందం రాష్ట్రపతితో దాదాపు గంటసేపు సమావేశమైన తర్వాత, రాష్ట్రపతి భవన్ బయట విలేకరులతో మాట్లాడుతూ ఆ కాంగ్రెస్ నేత ఇలా పేర్కొన్నారు: “మేము రాష్ట్రపతికి ఒక వినతిపత్రాన్ని సమర్పించాము. భారత ప్రజాస్వామ్యాన్ని నాశనం చేయడానికి ప్రధాన మంత్రి నరేంద్ర మోదీ, హోంమంత్రి అమిత్ షా, ప్రధాన ఎన్నికల కమిషనర్ జ్ఞనేష్ కుమార్ కుట్ర పన్నారని మేము చెప్పాము. మేము చెప్పిన విషయాన్ని రాష్ట్రపతి ఏమాత్రం ఖండించలేదు.” 

“మేము చెప్పిన దానిని ఆమె ఏమాత్రం ప్రశ్నించలేదు. లేదా దానిపై ఎలాంటి వాదన కూడా చేయలేదు. ఆమె మా మాటలను అంగీకరించారు, ఆపై మాకు తగిన ఆధారాలు సమర్పించాలని సూచించారు. `ఓట్ల చోరీ’  జరుగుతోందనడానికి సాక్ష్యం దేశం మొత్తానికి తెలుసునని నేను చెప్పాను. ఒకదాని తర్వాత మరొక రాష్ట్రంలో ఎన్నికల ఫలితాలను తారుమారు చేశారు. 24 ఎన్నికల్లో ఇలా జరిగింది. అయినప్పటికీ, రాష్ట్రపతికి ఆధారాలు కావాలి. ఆమె ఆధారాలను స్వీకరించడానికి సిద్ధమైనప్పుడు, అదే బృందం వాటిని సమర్పిస్తుంది.” 

“‘ఓట్ల చోరీ’ జరుగుతోందన్న విషయాన్ని భారత రాష్ట్రపతి ఖండిస్తారని నేను భావించాను. ‘భారతదేశంలో స్వేచ్ఛాయుతమైన, నిష్పక్షపాతమైన ఎన్నికలు జరుగుతున్నాయి’ అని ఆమె అంటారని నేను ఆశించాను” అని ఆయన తెలిపారు.  అయితే, రాహుల్ చేసిన ఆరోపణలను రాష్ట్రపతి భవన్ గట్టిగా ఖండించింది. “ప్రతిపక్ష నాయకుడి ఆరోపణలు సరికావు.ఈ విషయంలో రాష్ట్రపతిని వివాదంలోకి లాగడం దురదృష్టకరం” అని పేర్కొంది.

అంతకుముందు, రాష్ట్రపతిని కలిసే అవకాశం లభించకపోతే రాష్ట్రపతి భవన్ బయట నిరసన తెలుపుతామని ‘ఇండియా’ కూటమి వర్గాలు పేర్కొన్నాయి. గాంధీ నేతృత్వంలో ప్రతిపక్ష ఎంపీలు, పార్టీ నాయకుల బృందం పార్లమెంట్ నుండి రాష్ట్రపతి భవన్ వైపు పాదయాత్ర చేయగా, ఒక చిన్న బృందం అనంతరం రాష్ట్రపతిని కలిసి, ప్రధాన ఎన్నికల కమిషనర్‌గా జ్ఞానేష్ కుమార్ రాజీనామా చేయాలని డిమాండ్ చేసింది.

వారి వినతిపత్రంలో నాలుగు ప్రధాన డిమాండ్లు ఉన్నాయి: జ్ఞానేష్ కుమార్ రాజీనామా; ప్రధాన ఎన్నికల కమిషనర్, ఎన్నికల సంఘాలకు జీవితకాల రక్షణ కల్పించే 2023 చట్టాన్ని రద్దు చేయడం; ఎస్ఐఆర్ ను తక్షణమే నిలిపివేయడం; ఓటర్ల జాబితా నుండి తొలగించిన 13.3 కోట్ల మంది ఓటర్లందరినీ పునరుద్ధరించడం; అన్ని ఎన్నికలకు తిరిగి కాగితపు బ్యాలెట్లను ప్రవేశపెట్టడం; “ఓటు చోరీకి నిశ్చయాత్మకమైన ఆధారాలు సమర్పించిన” గత రెండేళ్లలోని అన్ని అసెంబ్లీ ఎన్నికలను రద్దు చేయడం. 

ఈ పాదయాత్రకు ముందు, పార్లమెంట్ సెంట్రల్ హాల్‌లో ఇండియా బ్లాక్‌కు చెందిన సుమారు 150 మంది ఎంపీలు, ఇతర నాయకులు సమావేశమయ్యారు. ఈ సమావేశంలో 16 విభిన్న పార్టీలకు చెందిన 16 మంది నాయకులు, భారత ఎన్నికల సంఘం పనితీరుపై ఆందోళన వ్యక్తం చేస్తూ రాష్ట్రపతికి వినతిపత్రంపై సంతకాలు చేశారు. 

రాష్ట్రపతి భవన్ ను రాజకీయాల్లోకి లాగిన కాంగ్రెస్… బిజెపి 

ఇలా  ఉండగా, రాష్ట్రపతి కార్యాలయాన్ని కాంగ్రెస్ రాజకీయాల్లోకి లాగిందని బీజేపీ అధికార ప్రతినిధి సుధాన్షు త్రివేది తర్వాత విమర్శించారు. “దేశ రాజ్యాంగ సంస్థల గురించి గందరగోళం సృష్టించడం, నిరాధారమైన, తప్పుదోవ పట్టించే ప్రకటనలు చేయడం, వాటి ద్వారా రాజకీయ లబ్ధి పొందడమే కాంగ్రెస్ పార్టీ ఏకైక లక్ష్యమని స్పష్టంగా తెలుస్తోంది. ఈ రోజు రాష్ట్రపతి భవన్ బయట వారు చేసిన పని ఆ అనుమానాన్ని మరింత బలపరుస్తోంది,” అని ఆయన ధ్వజమెత్తారు. 

కాంగ్రెస్ నేతృత్వంలోని కూటమి కేవలం ఓటమిని అంగీకరించలేని సాకులు వెతుకుతోందని అధికార పార్టీ చేసిన వాదనను బీజేపీ నాయకుడు జేపీ నడ్డా పునరుద్ఘాటించారు. శుక్రవారం వెలువడిన ఉప ఎన్నికల ఫలితాల్లో బీజేపీ సాధించిన విజయాలను ఆయన ఉదహరించారు. “ప్రజల నమ్మకం, విశ్వాసమే ఎన్డీఏకు అతిపెద్ద బలం! నాగావ్‌లో లోక్‌సభ ఫలితం, నందిగ్రామ్, రేజినగర్, తట్టన్‌చావడి అసెంబ్లీ ఫలితాలు [ప్రధాని మోదీ] నాయకత్వం, దార్శనికత, విధానాలపైనా, సుపరిపాలన, ప్రజా సంక్షేమం కోసం బీజేపీ-ఎన్డీఏ అజెండాపైనా ప్రజల విశ్వాసాన్ని పునరుద్ఘాటిస్తున్నాయి,” అని ఆయన ఎక్స్ లో పోస్ట్ చేశారు.

రాష్ట్రపతితో సమావేశం అనంతరం ప్రతిపక్ష నేతలు సుప్రీంకోర్టును కూడా ఆశ్రయించనున్నట్లు రాహుల్‌ గాంధీ తెలిపారు. సోమవారం భారత ప్రధాన న్యాయమూర్తి జస్టిస్‌ సూర్యకాంత్‌ను కలిసి, రాష్ట్రపతికి సమర్పించిన వినతిపత్రం ప్రతిని అందజేయనున్నట్లు చెప్పారు. సీఈసీ వ్యవహారంపై న్యాయపరమైన జోక్యం కోరే దిశగా ఈ నిర్ణయం తీసుకున్నట్లు వెల్లడించారు.