ఫ్లైదుబాయ్ పైలట్‌, ప్రయాణికులను కాపాడటంలో కీలకంగా చిన్నారి!

ఫ్లైదుబాయ్ విమానంలో ప్రయాణించిన ఆరేళ్ల చిన్నారి ఆ సమయంలో టాయిలెట్‌కు వెళ్లడం, భారత కెప్టెన్‌ స్మిత్ మచ్చర్‌తో పాటు ఇతర ప్రయాణికుల ప్రాణాలను కాపాడటంలో కీలకంగా మారింది. కాక్‌పిట్‌లో రక్తసిక్తంగా పడి ఉన్న భారత కెప్టెన్‌ స్మిత్‌ పరిస్థితిని గమనించిన ఆ బాలిక తన తండ్రిని అలెర్ట్‌ చేసి ఎంతో సహాయం చేసింది.  కాగా, ఇజ్రాయెల్‌కు చెందిన ఆరేళ్ల నీనా తన తండ్రితో కలిసి ఆ విమానంలో ప్రయాణించింది.

కాక్‌పిట్‌లో దాడి జరుగుతున్న సమయంలో ఆ బాలిక టాయిలెట్‌కు వెళ్లింది. కాక్‌పిట్ నుండి అరుపులు వినిపించడంతో ఆ చిన్నారి టాయిలెట్‌ నుంచి బయటకు వచ్చి కత్తిపోట్లతో రక్తసిక్తమైన భారత పైలట్ స్మిత్ మచ్చర్ కాక్‌పిట్‌ నుంచి తూలుతూ బయటకు రావడాన్ని చూసింది.  కత్తితో దాడి చేసిన ఒమన్ కో-పైలట్‌తో ఆయన పెనుగులాడటం చూసి ఆ చిన్నారి భయాందోళన చెంది గట్టిగా పిలువడంతో ముందు వరుసులో కూర్చొన్న ఆమె తండ్రి పరుగున అక్కడకు వెళ్లాడు.

‘నాన్నా, మనం చనిపోవాలనుకోవడం లేదు’ అని ఆమె అన్నది. మరోవైపు ఇది విన్నతండ్రి  వేగంగా కాక్‌పిట్‌ వైపు వెళ్లి, అక్కడి పరిస్థితి చూసి ఇతర ప్రయాణికులను అప్రమత్తం చేశాడు.  దీంతో మరో ఇద్దరు ప్రయాణికులైన అసఫ్ రాజువాన్, యానివ్ హయూన్ వెంటనే కాక్‌పిట్‌ వద్దకు చేరుకున్నారు. భారత పైలట్‌ స్మిత్‌పై కత్తితో దాడి చేసిన కో పైలట్‌ను అడ్డుకున్నారు. విమానంలోని హెడ్‌ఫోన్ సెట్‌ కేబుళ్లతో అతడ్ని కట్టేసి అదుపులోకి తీసుకున్నారు.

అదే సమయంలో దంత వైద్యుడైన డాక్టర్ షోటా ముసయేవ్, గాయపడిన భారత కెప్టెన్ మచ్చర్‌కు ప్రాథమిక చికిత్స అందించారు. రక్తస్రావాన్ని ఆపి ఆయన పరిస్థితిని స్థిరంగా ఉంచడంపై దృష్టిసారించారు. అయితే ఆ విమానం వేగంగా ఎత్తు కోల్పోవడంతో ప్రయాణికులు భయందోళనతో కేకలు వేశారు. కొందరు తమ సీట్ల నుంచి ఎగిరిపడ్డారు. విమానయాన కార్యక్రమాల టీవీ షోలను ఆసక్తిగా చూసే ఇజ్రాయోలీ ప్లంబర్ యానివ్ హయున్ చాలా కీలకంగా వ్యవహరించారు. పైలట్‌గా ఎలాంటి శిక్షణ లేనప్పటికీ తనకు ఉన్న పరిజ్ఞానంతో తక్షణం స్పందించారు. 

ప్రమాదకరంగా కిందకు దూసుకెళ్తున్న విమానాన్ని కంట్రోల్‌ చేశారు. స్టీరింగ్ లివర్లను పైకి లాగాలని తెలియడంతో ఆ పని చేశారు. దీంతో ఆ విమానం తిరిగి నియంత్రణలోకి వచ్చింది. అదృష్టవశాత్తు విధుల్లో లేని ఇద్దరు పైలట్లు ఆ విమానంలో ప్రయాణిస్తున్నారు. వారిద్దరూ వెంటనే పైలట్ బాధ్యతలు చేపట్టారు.  తోక భాగానికి భారీగా నష్టం వాటిల్లిన ఆ విమానాన్ని సౌదీ అరేబియాలోని తబూక్ విమానాశ్రయానికి మళ్లించి అత్యవసరంగా ల్యాండ్ చేశారు. ఆ ప్రయాణికులు ప్రత్యామ్నాయ ఫ్లైదుబాయ్ విమానంలో బుధవారం రాత్రికి ఇజ్రాయెల్‌కు సురక్షితంగా చేరుకున్నారు.