ఎస్ఐఆర్ నిరసనలతో జంతర్ మంతర్ వద్ద ఉద్రిక్తత.. ఇంటర్నెట్ నిలిపివేత

నిరసనకు ఢిల్లీ పోలీసులు అనుమతి ఇవ్వలేదని అధికారులు ముందుగానే స్పష్టం చేశారు. దీంతో జంతర్‌ మంతర్‌కు వెళ్లే మార్గాల్లో భారీగా బారికేడ్లు ఏర్పాటు చేసి భద్రతను కట్టుదిట్టం చేశారు. పార్లమెంట్‌ స్ట్రీట్‌, జనపథ్‌, టాల్స్టాయ్‌ మార్గాలతో పాటు పరిసర ప్రాంతాల్లో పోలీసు, ర్యాపిడ్‌ యాక్షన్‌ ఫోర్స్‌ బలగాలను మోహరించారు. పోలీసులు నిరసనకారులను బస్సుల్లో తరలిస్తుండగా కొన్ని ప్రాంతాల్లో ఇతర ఆందోళనకారులు, మద్దతుదారులు వాహనాలను అడ్డుకునేందుకు ప్రయత్నించారు. దీంతో పోలీసులు, నిరసనకారుల మధ్య తోపులాట చోటుచేసుకుంది. పరిస్థితిని అదుపులో ఉంచేందుకు పోలీసులు అదనపు బలగాలను రంగంలోకి దించారు.