ఎటువంటి వివరణ లేకుండా అర్ధరాత్రి ఏఐఎంఐఎం ఎమ్మెల్సీ మీర్జా రహ్మత్ బేగ్ను పార్టీ నుంచి బహిష్కరించిన అనంతరం, తెలంగాణ బీజేపీ అధ్యక్షుడు ఎన్. రామచందర్ రావు, బేగ్ ఒక మైనర్ బాలికపై లైంగిక దాడికి పాల్పడ్డారని ఆరోపించారు. ఈ విషయంపై మౌనం వహించిన రాజకీయ పార్టీలను ఆయన తీవ్రంగా విమర్శించారు.
“మజ్లిస్ పార్టీ ఎమ్మెల్సీ ఒక మైనర్ బాలికపై లైంగిక దాడికి పాల్పడుతూ పట్టుబడ్డారు. ఈ విషయం ముందే బయటకు రావాల్సింది, కానీ పార్టీ ఇప్పుడే చర్య తీసుకుంది,” అని రావు పేర్కొన్నారు. బేగ్ ఎమ్మెల్సీ పదవి గెలవడానికి కాంగ్రెస్, బీఆర్ఎస్ పార్టీలు సహాయపడ్డాయని కూడా ఆయన ఆరోపించారు. ఈ విషయంపై ఇప్పుడు బయటకు వచ్చి మాట్లాడాలని వారిని కోరారు.
“గతంలో ఇలాంటి కేసులు ఏమైనా ఉన్నాయేమో విచారణ జరపాలి. ఇలాంటి వాటిలో చాలా మంది ఎంఐఎం నాయకులు పాలుపంచుకున్నారు,” అని రావు ఆరోపించారు. భూ వివాదాలు, లైంగిక కుంభకోణం వంటి ఆరోపణలతో సహా రహ్మత్ బేగ్కు సంబంధించి సోషల్ మీడియాలో ప్రచారంలో ఉన్న వాదనలు, ఆరోపణలను గోషామహల్ ఎమ్మెల్యే టి. రాజా సింగ్ కూడా ప్రస్తావించారు.
ఈ ఆరోపణలకు పార్టీ నిర్ణయంపై ఏమైనా ప్రభావం ఉందా? అని ఆయన ప్రశ్నించారు. సోషల్ మీడియాలో ప్రచారంలో ఉన్న ఆరోపణలు స్వతంత్రంగా ధృవీకరించబడలేదు. వాటి వాస్తవికతను నిర్ధారిస్తూ పోలీసులు లేదా ఇతర సంబంధిత అధికారుల నుండి ఎటువంటి నిర్ధారణ లేదు.
ఇదిలా ఉండగా, స్థానిక కార్యకర్త, న్యాయవాది డాక్టర్ లుబ్నా సర్వత్, పార్టీ నుండి ఎమ్యెల్సీ బహిష్కరణకు గల కారణాన్ని ప్రజలకు తెలియజేయాలని డిమాండ్ చేశారు. ఒకవేళ ఏవైనా నేరపూరిత చర్యల కారణంగా ఈ చర్య తీసుకోవలసి వస్తే, బేగ్పై ఏదైనా చట్టపరమైన చర్య తీసుకున్నారా లేదా అనే విషయాన్ని ఏఐఎంఐఎం తప్పక వెల్లడించాలని, కేవలం రాజీనామాతో న్యాయం జరగదని కూడా ఆమె స్పష్టం చేశారు.
“అర్ధరాత్రి బహిష్కరణకు దారితీసేంతగా ఎమ్మెల్సీ చేసిన అనుచిత చర్యలు ఏమిటి? ఏవైనా నేరపూరిత చర్యలు ఉంటే, చట్టపరమైన చర్యలు ప్రారంభించారా? ప్రజలు తెలుసుకోవాలి. జర్నలిస్టులు ప్రచారం చేస్తున్న సోషల్ మీడియా వీడియోలు ఒక మైనర్ బాలిక/మహిళపై రహ్మత్ బేగ్ దాడి/అత్యాచారానికి పాల్పడ్డాడని సూచిస్తున్నప్పటికీ, వెంటనే క్రిమినల్/పోక్సో కేసు నమోదు చేయడం అవసరం; కేవలం రాజీనామాలు, బహిష్కరణలతో న్యాయం జరగదు,” అని తెలంగాణ డైరెక్టర్ జనరల్ ఆఫ్ పోలీస్ సి.వి. ఆనంద్కు రాసిన లేఖలో సర్వత్ పేర్కొన్నారు.
“ఎమ్మెల్సీ రహమత్ బేగ్పై అత్యాచారం/పోక్సో నేరం జరిగిందని సూచిస్తూ సోషల్ మీడియాలో వైరల్ అవుతున్న వీడియోలను తెలంగాణ మహిళా కమిషన్ స్వీకరించి, ఆ బాలిక/మహిళ గొంతు నొక్కబడకుండా విముక్తి పొందేలా న్యాయం చేయాలని మేము కోరుతున్నాము. వైరల్ వీడియోలలోని సూచనలు నిజమైతే, ఆ బాలిక/మహిళ ఎందుకు ఫిర్యాదు చేయలేదు? ఆమె/ఆమె కుటుంబం అణచివేతకు గురవుతోందా?” అని ఆమె ప్రశ్నించారు.
అత్తాపూర్లో ఒక బాలికతో మీర్జా రహ్మత్ బేగ్ శృంగారం చేస్తుండగా, స్థానికులు గమనించి చితకబాదారంటూ ఓ వీడియో సోషల్ మీడియాలో చక్కర్లు కొట్టింది. ఈ వ్యవహారం వెలుగులోకి రాగానే రహ్మత్ బేగ్ హుటాహుటిన ఉమ్రాకు వెళ్లినట్లు సమాచారం. అయితే, బాలిక పట్ల ఎమ్మెల్సీ మీర్జా రహ్మత్ బేగ్ అసభ్యంగా ప్రవర్తించారంటూ తమకు ఎలాంటి ఫిర్యాదు రాలేదని అత్తాపూర్ ఇన్స్పెక్టర్ సీతయ్య తెలిపారు. మీర్జా రహ్మత్ బేగ్పై కొందరు దాడి చేశారన్న ప్రచారం గురించి ప్రశ్నించగా.. తనకు తెలియదని జవాబు ఇచ్చారు.
ఇదే సమయంలో, మైనర్ బాలిక పట్ల అసభ్యకరంగా ప్రవర్తించారని తెలిసీ రహ్మత్బేగ్ను కాపాడేందుకు మజ్లిస్ అధిష్ఠానం ఉమ్రాకు పంపిందని, వీడియోలు సోషల్ మీడియాలో వైరల్ కావడంతో కారణం చెప్పకుండా పార్టీ నుంచి తొలగించిందన్న విమర్శలు వినిపిస్తున్నాయి. మరోవైపు హిమాయత్నగర్లో ఓ భూవివాదానికి సంబంధించి రహ్మత్ బేగ్ పెద్ద మొత్తంలో డబ్బులు తీసుకున్నారని, అందుకే పార్టీ నుంచి బహిష్కరించారని చెప్పుకొంటున్నారు. లండన్లో జరిగిన ఎమ్మెల్యే అక్బరుద్దీన్ ఒవైసీ కుమార్తె వివాహానికి సంబంధించినవీడియోలు బయటకు రావడంలో మీర్జా పాత్ర ఉందని, బహిష్కరణకు ఇదీ ఓ కారణమన్న వాదన వినిపిస్తోంది.
కాగా, ఏఐఎంఐఎం నుంచి ఆయనను ఆకస్మికంగా బహిష్కరించడం, ఆయనపై లైంగిక వేధింపుల ఆరోపణల నేపథ్యంలో, ఆన్లైన్లో ప్రచారంలో ఉన్న డీప్ఫేక్ వీడియోలపై ఎమ్మెల్సీ మీర్జా రహమత్ బేగ్ స్పందించిన ఒక వీడియో వెలుగులోకి వచ్చింది. పార్టీ నుంచి ఆయనను బహిష్కరించడానికి ముందు, ఆగస్టు 27న ఈ వీడియోను చిత్రీకరించినట్లు సమాచారం.
ఆ వీడియోలో బైగ్ ఇలా అంటున్నట్లు వినిపిస్తుంది: “నేను ప్రస్తుతం మక్కాలో ఉన్నాను. 10 రోజుల ఉమ్రా కోసం నా కుటుంబంతో కలిసి ఆగస్టు 26 రాత్రి ఇక్కడికి వచ్చాను. ఈలోగా, హైదరాబాద్లోని నా స్నేహితులు నాకు ఫోన్ చేసి, సోషల్ మీడియాలో కొన్ని అశ్లీల వీడియోలు షేర్ అవుతున్నాయని చెప్పారు. ఇది తప్పు. కొంతమంది నాపై కుట్ర పన్నుతున్నారు. నేను ఏ తప్పూ చేయలేదు. ఈ వీడియోలను ఏఐతో తయారు చేశారు.”
తనను, తన పార్టీని అప్రతిష్టపాలు చేసే ఉద్దేశంతోనే ఆ వీడియోలను విడుదల చేశారని బైగ్ ఆరోపించారు. ఆ వీడియోలకు తనతోనూ, పార్టీ అధినేత అసదుద్దీన్ ఒవైసీతోనూ, లేదా అక్బరుద్దీన్ ఒవైసీతోనూ ఎలాంటి సంబంధం లేదని ఆయన స్పష్టం చేశారు. “ఈ వీడియోలపై నేను ఇప్పటికే సైబర్ క్రైమ్ పోలీసులకు, గోల్కొండ పోలీసులకు ఫిర్యాదు నమోదు చేశాను. ఈ విషయం దర్యాప్తులో ఉంది,” అని ఆయన తెలిపారు.
మరోవంక, ఎమ్మెల్సీని అకస్మాత్తుగా బహిష్కరించడం వెనుక గల కారణాలను ఏఐఎంఐఎం బహిరంగంగా వెల్లడించాలని హైదరాబాద్ యూత్ కరేజ్ (హెచ్వైసి) అధ్యక్షుడు సల్మాన్ ఖాన్, భారతీయ జనతా యువ మోర్చా (బిజెవైఎం) నాయకుడు నితిన్ నందేకర్ డిమాండ్ చేశారు. ప్రజలకు వాస్తవాలు వెల్లడించకుండా నిశ్శబ్దంగా బహిష్కరించడం ఆమోదయోగ్యం కాదని సల్మాన్ ఖాన్ చెప్పారు.
పార్టీ బహిరంగ వేదికలపై నైతిక విలువలు, హక్కుల గురించి మాట్లాడుతుండగా, దాని ఎన్నికైన ప్రతినిధులు మూసి తలుపుల వెనుక బాధ్యతారహిత ప్రవర్తనకు పాల్పడుతున్నారని ఆయన ఆరోపించారు. ఈ వివాదం బేగ్కు మాత్రమే పరిమితం కాదని, ఒక సిట్టింగ్ ఏఐఎంఐఎం ఎమ్మెల్యే, ఒక పార్టీ కార్పొరేటర్ కూడా ఇలాంటి దుష్ప్రవర్తనకు పాల్పడ్డారని ఖాన్ ఆరోపించారు. వారిపై తన వద్ద పక్కా ఆధారాలు ఉన్నాయని ఆయన తెలిపారు.
ఏఐఎంఐఎం ప్రతినిధులందరి ప్రవర్తనను క్షుణ్ణంగా పరిశీలించాలని ఆయన ఒవైసీని కోరారు. షేక్ సయీద్ బవాజిర్ హత్య కేసుతో సహా పరిష్కారం కాని ప్రజా సమస్యలను కూడా ఖాన్ ప్రస్తావిస్తూ, గతంలో చర్యలు తీసుకుంటామని హామీలు ఇచ్చినప్పటికీ తీవ్రమైన నేరాలతో సంబంధం ఉన్న వ్యక్తులు పార్టీ పదవులలో కొనసాగుతున్నారని ఆయన విమర్శించారు.
ఇదిలా ఉండగా, గోషామహల్ ప్రాంతంలోని స్థానిక కార్యకర్తలను, మున్సిపల్ అధికారులను బెదిరించడానికి బేగ్ తన పదవిని దుర్వినియోగం చేశారని నందేకర్ ఆరోపించారు. ఆయన నిరంతర దుష్ప్రవర్తన కారణంగానే ఏఐఎంఐఎం ఆయనపై చర్య తీసుకోవలసి వచ్చిందని పేర్కొన్నారు. “గోషామహల్ తన సొంత ఆస్తి అన్నట్లుగా వ్యవహరిస్తూ, గోరక్షణ కార్యకర్తలను బెదిరించేవాడు, పోలీస్ స్టేషన్లలోనే అధికారులను భయపెట్టేవాడు,” అని నందేకర్ ఆరోపించారు.
More Stories
`భిన్నత్వంలో ఏకత్వం’ రాజకీయ నినాదం కాదు.. భారతీయ డిఎన్ఏ!
ప్రమోషన్ కోసం మతం మారమని వత్తిడిపై నిరసనలు
ముఖ్యమంత్రులపై సానుకూలత.. ఎమ్యెల్యేలపై ఆగ్రహం!