హర్మూజ్‌ జలసంధి తెరిచేందుకు ఇరాన్ కొత్త ప్రతిపాదనలు

* అమెరికా దిగ్బంధంతో చాబహార్ పోర్టు సమీపంలో నిలిచిపోయిన ఇరాన్ చమురు ట్యాంకర్లు

అమెరికా, ఇరాన్‌ మధ్య చర్చలపై సందిగ్ధత కొనసాగుతున్న సమయంలో ఇరాన్‌ కొత్త ప్రతిపాదన చేసింది. హర్మూజ్‌ జలసంధిని తెరుస్తామని, అయితే తమ షరతులను అంగీకరించాలని స్పష్టం చేసింది. ఇరాన్‌ చేసిన తాజా ప్రతిపాదనను పరిశీలిస్తున్నామని వైట్‌హౌస్‌ అధికారికంగా ప్రకటించింది. అణు కార్యక్రమంపై స్పష్టత లేకపోవడంతో ట్రంప్‌ ఈ ప్రతిపాదనపై అసంతృప్తిగా ఉన్నారని అమెరికా అధికారులు వెల్లడించారు.

ఇరాన్‌ ప్రతిపాదనలను పాకిస్తాన్‌ వాషింగ్టన్‌కు లిఖితపూర్వకంగా అందించింది. ఈ ప్రతిపాదనల్లో ప్రధానంగా మూడు అంశాలను ఇరాన్‌ లేవనెత్తింది. మొదటిది హర్మూజ్‌ జలసంధిపై అమెరికా నిర్బంధాన్ని ఆపేయాలి. రెండోది ఇరాన్‌ రేవులపై దిగ్బంధనాన్ని ఎత్తివేయాలి. మూడవది, యుద్ధం ముగిసిన తర్వాతే అణు కార్యక్రమంపై చర్చలు జరపాలని ఇరాన్‌ తెలిపింది. అమెరికా ‘అణు విషయాలపై చర్చలు మొదటి నుండే జరగాలి’ అని పట్టుబడుతోంది.

అమెరికా అధ్యక్షుడు ట్రంప్‌నకు ఈ ప్రతిపాదన నచ్చలేదని ఒక అమెరికా అధికారి మీడియాకు తెలిపారు. ‘ఇరాన్‌ పతనం అంచున ఉందని ఇప్పుడే తెలిపింది. హర్మూజ్‌ను తెరవాలని వేడుకుంటుంది’ అని సోషల్‌ ట్రూత్‌లో ట్రంప్‌ వెల్లడించారు. మంగళవారం నాడు అమెరికా విదేశాంగ మంత్రి మార్కో రుబియో మాట్లాడుతూ ‘ఇరాన్‌లో మత పెద్దల పాలన కొనసాగినంత కాలం అది అణ్వాయుధాల వైపు పరుగులు తీస్తూనే ఉంటుంది. ఆ ముప్పును వెంటనే పరిష్కరించాలి’ అని బెదిరించారు.