యూనస్ ఇంటి ముందు హింసాయుత ప్రదర్శనలు

కాగా, తొమ్మిదో పే కమిషన్‌ను అమలు చేయాలని కోరుతూ బంగ్లాదేశ్ నలుమూలల నుంచి ప్రభుత్వ ఉద్యోగులు ఢాకాకు తరలివచ్చి షాహీద్ మీనార్ వద్ద సమావేశమై ‘జమునా’కు ర్యాలీగా బయలుదేరి వెళ్లారు. నిరసనకారులు ప్రభుత్వం తమ జీవనోపాధి సమస్యలను విస్మరించిందని ఆరోపించారు. నిరసనకారులను అడ్డుకోడానికి పారామిలటరీ బలగాలను కూడా రప్పించారు. దీంతో భద్రతా సిబ్బంది, ఆందోళనకారుల మధ్య ఘర్షణ జరిగింది.

‘ఎన్నికల ప్రక్రియను అడ్డుకోడానికే మీరు జమునాకు వచ్చారా?’ అని డిప్యూటీ కమిషనర్ మసూద్ ఆలం నిరసన తెలుపుతున్న ఓ అధికారిని ప్రశ్నించడంతో ఉద్రిక్తతలు మరింత పెరిగాయి. పోలీసు చర్య కొనసాగితే తీవ్రమైన రాజకీయ పరిణామాలు ఉంటాయని ప్రభుత్వ ఉద్యోగులు హెచ్చరించారు.‘దాడులు కొనసాగితే మేము ఎన్నికలను బహిష్కరిస్తాం’ అని నిరసనకారులు హెచ్చరించారు. 

హై సెక్యూరిటీ ఉన్న యూనస్ ఇంటిలోపలికి చొచ్చుకెళ్లేందుకు నిరసనకారులు ప్రయత్నించారు. బారికేడ్లు తొలగించి, గేట్లు ఎక్కి మరీ ఇంట్లోకి వెళ్లేందుకు ప్రయత్నించారు. దీంతో వారిని అడ్డుకునేందుకు పోలీసులు లాఠీచార్జి చేశారు. వాటర్ కెనాన్లు ప్రయోగించారు. అయినప్పటికీ ఆందోళనకారుల్ని అడ్డుకోలేకపోయారు. పైగా వీరు పోలీసులపై తిరుగబడ్డారు. ఇరువర్గాల తోపులాటతో ఘర్షణ వాతావరణం నెలకొంది.